AERG na GAERG bagabiye inka uwarokoye Abatutsi muri Jenoside, uwayirokotse n’uwarwanye urugamba rwo kuyihagarika

Yanditswe na Prudence Kwizera
Kuya 4 Mata 2021 saa 08:05
Yasuwe :
0 0

Umuryango w’Abanyeshuri barokotse Jenoside yakorewe Abatutsi, AERG, ku bufatanye n’ Umuryango w’abahoze ari abanyeshuri barokotse Jenoside yakorewe Abatutsi (GAERG), yagabiye inka uwarokoye abahigwaga muri Jenoside, uwayirokotse ndetse n’umwe mu barwanye urugamba rwo kuyihagarika.

Ni igikorwa cyatangiye kuri uyu wa Gatandatu tariki ya 3 Mata 2021 mu cyumweru cy’ibikorwa byitwa AERG - GAERG Week 2021.

Umwe mu bahawe inka ni Rutagengwa Simon wo mu Mudugudu wa Birambo mu Kagari ka Karama mu Murenge wa Cyanika mu Karere ka Nyamagabe, warokoye umwana w’imyaka itatu witwa Mukamurenzi Louise muri Jenoside yakorewe Abatutsi muri Mata 1994. Yahawe inka y’ineza kubera icyo gukorwa cy’urukundo n’ubumuntu yakoze.

Undi wahawe inka ni Rugigana Jean Baptiste wo mu Murenge wa Kiziguro mu Karere ka Gatsibo warokotse Jenoside yakorewe Abatutsi.

Biteganyijwe ko kuri iki Cyumweru tariki ya 4 Mata 2021 mu Karere ka Rusizi hazatangwa indi nka ku wamuguriye ku rugamba rwo guhagarika Jenoside yakorewe Abatutsi.

Rutagengwa yabwiye IGIHE ko uwo mwana yarokoye yamusigiwe n’ababyeyi be bahunze mu gihe cya Jenoside, birangira batagarutse kumureba, yiyemeza kumuhisha kugira ngo abicanyi batamwica.

Ati “Nibwo nari ngishaka umugore mfite imyaka 36. Icyatumye muhisha ni uko ababyeyi be bari inshuti zacu duturanye ku buryo nabo bamunsigiye bavuga ngo ‘turahita tugaruka’ ni uko musigarana ntyo kandi numva ko abo bantu bari banyizeye ntashobora kubahemukira.”

Akomeza avuga ko Interahamwe zagiye zimutera kenshi zishaka kwica uwo mwana ariko akamwimana kugeza igihe na we bashatse kumwica.

Yavuze ko yishimira inka ahawe kandi ayitezeho kumuhindurira ubuzima we n’umuryango we.

Ati “Iyi nka nzayorora kugeza igihe ingiriye akamaro nanjye nkakagirira undi muntu. Iyi nka ni iy’ineza izajya inyibutsa gukomeza gukora ibyiza.”

Umugore we Mukankusi Anne Marie yavuze ko yishimiye inka y’ineza bahawe, ashimira imiryango AERG na GAERG yabazirikanye.

Ati “Icyo gihe muri Jenoside nanjye barampigaga, uwahaze ubuzima ni umugabo wanjye kuko ari we washoboraga kujya ku irembo, naho njyewe na Mukamurenzi Louise ntitwashoboraga gusohoka. Twabaga mu nzu akadushakira ibyo kurya agahangana n’ibitero byose biza, abaza ku manywa na nijoro bose agahangana nabo.”

Umunyamabanga Nshingwabikorwa wa AERG, Bakina Ismaél, yavuze ko ibikorwa byabo ari ngarukamwaka ariko kuri iyi nshuro babikoze mu buryo bwihariye hirindwa icyorezo cya Covid-19 bituma badahuza abantu benshi ngo bakore umuganda nk’uko byari bisanzwe.

Ati “Ariko kimwe mu bikorwa dukora harimo icyo gutanga inka, dutanga inka mu buryo butatu. Hari inka turemera uwarokotse Jenoside kugira ngo yongere anywe amata; hari inka duha umuntu wagize uruhare mu kurokora Abatutsi yitwa ‘inka y’ineza’ ari nayo duhaye uyu musaza; hari n’indi nka duha uwamugariye ku rugamba rwo guhagarika Jenoside.”

Yakomeje avuga ko igisobanuro cy’inka yahawe Rutagengwa Simon gikomeye kuko isobanura ineza n’urukundo.

Ati “Iyi nka tuyitanga mu buryo bwo kuzirikana ineza ku bantu bahaze ubuzima bwabo bakitandukanya n’abarimo bakora Jenoside bakarokora Abatutsi. Ni muri urwo rwego duhaye ino nka Rutagengwa Simon mu bikorwa bya AERG - GAERG Week.”

Justin Rutikanga umwe mu bagize Umuryango GAERG akaba abarizwa muri Famille yitwa Inshongore ikorera mu Karere ka Huye, yavuze ko bafitanye igihango na Rutagengwa Simon.

Ati “Uyu muryango icyo twawubwira ni ukongera kuwushimira urukundo umurava n’ubutwari byaranze uyu mugabo Rutagengwa Simon. Twamwijeje ko tuzakomeza gukurikirana imibereho ye kuko dufite igihango twagiranye.”

Abaturanyi ba Rutagengwa bakozwe ku mutima

Bamwe mu baturanyi ba Rutagengwa Simon bavuze ko bashimishijwe no kubona yiturwa ineza, yagize bavuga ko mu gihe cya Jenoside iyo habaho abantu benshi bameze nka we byari gutuma harokoka Abatutsi benshi.

Uwingabire Véneranda ati “Simon ni intwari kuko yakoze ibintu byiza, yatubera urugero nk’abantu duturanye na we. Iyo muri Jenoside haboneka abantu benshi bameze nka Simon bagahisha abahigwaga kandi bakabikorana umutima w’urukundo, ntabwo abantu bari gushira nk’uko byagenze.”

Nzindukiyimana Emmanuel uyobora Umudugudu wa Birambo, yavuze ko usibye igikorwa cy’ubutwari Rutagengwa Simon mu gihe cya Jenoside, no muri iki gihe ari inyangamugayo.

Ati “Simon ni umusaza w’inyangamugayo no muri iki gihe kuko tumwigiraho byinshi. Ni umusaza utugira inama akaduhanura.”

Uhagarariye Ibuka mu Murenge wa Cyanika, Kanamugire Venuste, yavuze ko muri icyo gice Jenoside yakoranywe ubugome n’ubukana ku buryo gushisha umuntu byasabaga ubutwari budasanzwe.

Ati “Mu cyari Gikongoro mu Murenge hano wa Cyanika, jenoside yari ikomeye. Uyu musaza rero icyo yakoze ni ubutwari, habayeho nko kwitera ikinya mbese yaritanze, kuko abasirikare bamugendagaho cyane bashaka kumwambura uwo mwana ngo bamwice ariko umusaza Simon ababera ibamba arakomera.”

Icyumweru cy’ibikorwa AERG- GAERG Week 2021 cyatangijwe ku wa 23 Gashyantare, kikaba gikubiyemo ibikorwa bitandukanye mu rwego rwo gutegura Abanyarwanda by’umwihariko abarokotse Jenoside yakorewe Abatutsi mu 1994 kwinjira mu bikorwa byo Kwibuka bakomeye.

AERG - GAERG Week ni ibikorwa byatangijwe mu guhera mu mwaka wa 2015.

Intego nyamukuru y’iyi miryango yombi ni uguhangana n’ingaruka za Jenoside yakorewe Abatutsi mu 1994, by’umwihariko haremwa imiryango mishya (Famille) hagamijwe komorana ibikomere nk’abagize iyi miryango ndetse n’abandi barokotse Jenoside yakorewe Abatutsi mu 1994; gusigasira imibereho yabo no kubaka u Rwanda ruzira jenoside, ivangura n’andi macakubiri ayo ariyo yose.

Babanje gusenga mbere yo gutangira igikorwa
Uhereye ibumoso, Rutagengwa Simon n'umugore we Mukankusi Anne Marie na bamwe mu baturanyi babo
Uhagarariye Ibuka mu Murenge wa Cyanika, Kanamugire Venuste, yashimye ubutwari bwa Rutagengwa Simon
Rutagengwa Simon n'umugore we Mukankusi Anne Marie basimiye imiryango AERG na GAERG
Rugigana Jean Baptiste warokotse Jenoside yakorewe Abatutsi n'umugore we bita ku nka bari bamaze guhabwa
Rugigana Jean Baptiste warokotse Jenoside yakorewe Abatutsi utishoboye n'umugore we batuye mu Karere ka Gatsibo bagabiwe inka n'imiryango AERG na GAERG
Rutagengwa Simon ashyikirizwa inka y'ineza yagenewe n'imiryango Imiryango AERG na GAERG
Inka yahawe Rutagengwa Simon ayitezeho kumuhindurira ubuzima
Justin Rutikanga umwe mu bagize Umuryango GAERG akaba abarizwa muri Famille yitwa Inshongore ikorera mu Karere ka Huye, yavuze ko bafitanye igihango na Rutagengwa Simon
Nyuma y'igikorwa bafashe ifoto y'urwibutso

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .