Abubatse inzu zabo biganje mu basabye guhabwa amacumbi aciriritse mu mushinga wa BRD

Yanditswe na Twarabanye Venuste
Kuya 24 Ugushyingo 2019 saa 08:57
Yasuwe :
0 0

Banki y’igihugu Itsura Amajyambere (BRD Plc) yatangaje ko ku rutonde rw’abantu barenga 7000 bamaze kugaragaza ko bakeneye inzu ziciriritse leta igiye kubakira abashaka gutunga inzu bwa mbere, nibura abasanga 20% gusa aribo bigaragara ko bakeneye izo nzu.

Ku wa 20 Ugushyingo 2019 nibwo BRD yatangaje ko ku bufatanye na Banki y’Isi, Guverinoma y’u Rwanda igiye gushora miliyoni $ 150 mu mushinga wo kubaka amacumbi aciriritse azahabwa abanyarwanda badafite inzu, kandi bafite umushahara uri munsi y’ibihumbi 700 Frw.

BRD izakurikirana uwo mushinga yashimangiye ko ari Politiki ya leta yo guteganyiriza imiturire, hirindwa akajagari gashobora kuzabaho bitewe n’ubwiyongere bw’abajya gutura mu mijyi, no gufasha abadafite inzu kuzitunga.

Kuri ubu BRD iratangaza ko ku rutonde rw’abagera ku bihumbi 700 bamaze kugaragaza ko bakeneye izo nzu, 80% basanzwe bazifite kandi ari abantu babayeho neza.

Umuyobozi wa BRD, Eric Rutabana avuga ko nibura 20% aribo bujuje kuba abagenerwabikorwa b’umushinga wo gufasha abantu gutunga inzu bwa mbere.

Ati “Unyujijemo n’amaso uhita ubona abantu uzi basanzwe batunze inzu bariho neza. Ugiye gusesengura mu by’ukuri ushobora gusanga nka 20 % y’aba bantu aribo bari muri cya cyiciro dushaka.”

Nyamara abo basanzwe bifite, bagaragaza inyota yo gushaka izo nzu cyane kuko hari n’aho umugabo n’umugore buri wese yiyandikisha ko ayikeneye kugira ngo bahabwe ebyiri.

At “Hamwe usanga harimo umugore n’umugabo bombi bariyandikishije, kandi bombi uzi y’uko batarimo, abandi abo uzi basanzwe batunze inzu, abandi bari muri za nzego wumva zidakwiye kuba ziri muri bya byiciro.”

Rutabana yavuze ko icyo kibazo bagifatiye ingamba, agira ati “Niyo mpamvu mu by’ukuri bigomba kubanza kunyura hano no mu kigo cy’igihugu cy’imiturire kugira ngo turebe koko ibyo bintu bibiri byubahirijwe.”

Miliyoni $150 BRD izaziguriza amabanki atandukanye, hanyuma abakeneye inguzanyo y’inzu iciriritse bujuje ibisabwa bayagabane.

Uretse gukurikirana niba uhawe inzu yujuje ibisabwa, BRD itangaza ko izanakurikirana niba amasezerano bagiranye na banki yubahirizwa. Harimo inyungu ufashe inguzanyo acibwa n’igihe cyo kwishyura.

Bivugwa ko ibijyanye no kuba inguzanyo y’inzu yahabwa utayikwiye bikorerwa mu mabanki kuko ariyo atanga inguzanyo.

Kuki leta itubaka inzu ngo yivuganire n’uyishaka bikabanza guca mu mabanki?

Hari abibaza impamvu BRD itafata iyo ngengo y’imari ngo ikorane n’ikigo cy’Imiturire bubake inzu ubundi bavugane n’abazishaka nta wundi muntu uje hagati aho.

Umuyobozi w’Ikigo cy’Imiturire, Serubibi Eric, asobanura ko bigenze bityo haba habeyeho gukumira abafatanyabikorwa. Ariko anasobanura ko hari uburyo leta igira uruhare mu bijyanye n’imyubakire y’izo nzu.

Ati “Hari ibikorwa leta ijyamo mu bijyana n’inzu, buriya leta igira uruhare mu buryo bubiri mu bijyanye no kubaka inzu, bwa mbere mujya mwumva ibyo bita gutuza abantu bafite ibibazo, aha ngaha leta ijyamo 100% ishaka n’ubutaka, ikubakira abantu, kubera impamvu runaka mujya mwumva abava mu manegeka, abahuye n’ibiza bitandukanye n’abandi bagenerwabikorwa kubera impamvu zitandukanye zituma bakeneye amacumbi. Aho leta irabikora byose ikabubakira ikanabimura.”

Yakomeje agira ati “Iyo tugeze mu macumbi aciriritse rwa ruhare rwa leta rugaragara muri bya bikorwa remezo by’ibanze. Amazi, amashanyarazi, n’imihanda kugira ngo igiciro cy’inzu kigabanyukeho 35%.”

Yavuze ko abifite nibagura za nzu, bazahindukira bakazikodesha abo leta yifurizaga gutunga inzu n’ubundi bahere mu bukode.

Inguzanyo y’inzu iciriritse izajya ifatwa kuri miliyoni 10 Frw ariko itarengeje miliyoni 35 Frw yishyurwe mu myaka igera kuri 20.

Mu 2018/19 hubatswe amacumbi aciriritse agera kuri 54. Biteganyijwe ko mu 2019/20 azagera ku 1,128 naho mu 2024 u Rwanda ruzaba nibura rufite amacumbi 1,500.

Kuri ubu BRD iratangaza ko ku rutonde rw’abagera ku bihumbi 700 bamaze kugaragaza ko bakeneye izo nzu, 80% basanzwe bazifite kandi ari abantu babayeho nez

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza