Abiga mu mashuri y’Uburezi bw’ibanze bw’imyaka 12 barinubira ubuke bwa laboratwari

Yanditswe na Ntabareshya Jean de Dieu
Kuya 3 Werurwe 2021 saa 12:12
Yasuwe :
0 0

Abanyeshuri biga mu mashuri y’uburezi bw’ibanze bw’imyaka 12 barinubira ubuke bw’ibikorwaremezo mu myigire yabo birimo na za laboratwari ku bazikenera, ibintu bavuga ko bibadindiza.

Ibyo bikorwa remeza biri muri gahunda yo kwimakaza uburezi kuri bose, Leta yafashe umwanzuro wo gushyiraho amashuri y’uburezi bw’ibanze bw’imyaka 9 na 12 kugira ngo buri mwana w’Umunyarwanda abashe kwiga ndetse bimurinde no gukora urugendo rurerure ajya ku ishuri.

Hari bimwe mu bigo by’amashuri usanga abanyeshuri biga amasomo y’ubumenyi (sciences) bavuga ko bagiye gusoza amashuri batarakandagira muri laboratwari kandi mu bizamini bakora harimo ibijyanye no gushyira mu bikorwa ibyo bize.

Bamwe mu biga mu rwunge rw’amashuri rwa Shaki mu karere ka Muhanga, babwiye IGIHE ko bageze mu mwaka wa nyuma batazi n’igikoresho na kimwe cyo muri Laboratwari kandi biga Ubugenge-Ubutabire n’imibare[PCM].

Nteziryayo Jean Marie wiga mu mwaka wa Gatandatu yagize ati “Dufite ikibazo kituremerereye, nk’ubu tugeze mu mwaka wa Gatandatu kandi ntituzi igikoresho na kimwe cya laboratwari, twibaza uko bizatugendera mu bizamini bya Leta bikadushobera.”

Yakomeje agira ati “Hari byinshi twakabaye tuzi mu rwego rw’ubumenyi ariko tugiye gusoza amashuri tutabizi, urumva ko nabyo ari ikibazo. Hari bagenzi bacu bagiye bacika intege kubera iki kibazo. Ubu se umuntu yazajya gukora ikizami akagitsinda ate kandi n’ibikoresho atanabizi.”

Nigena Deborah we yagize ati “Njyewe niga mu mwaka wa Gatanu ariko kuri bagenzi bacu bari mu mwaka wa gatandatu ntibarajya na rimwe muri laboratwari, natwe ntiturajyayo na rimwe. Ibaze ko nteganya kurangiza umwaka utaha ntarayikandagiramo. Byaraducanze twibaza iherezo ryabyo.”

Umuvugizi wa Minisiteri y’Uburezi, Sarafina Flavia yavuze ko hakiri ikibazo cy’amikoro make bituma ibigo binyuranye bitabasha kubona ibikoresho bihagije.

Ati “Kugeza ubu 26% by’amashuri yisumbuye ya Leta n’afashwa nayo afite ibikoresho ndetse na laboratwari bihagije. Ibi bikorwaremezo rero bizagenda byongerwa uko ingengo y’imari igenda iboneka kandi icyifuzo ni uko byagezwa ku mashuri yose.”

“Birumvikana ko mbere na mbere twarebaga aho abana bazigira ariko noneho ubwo amashuri yabonetse ikigiye gukurikiraho ni ugushaka ibikoresho bihagije birimo na za laboratwari.

Yakomeje avuga ko amashuri afite ibikoresho yasabwe gusaranganya n’atabifite kugira ngo bifashe abanyeshuri.

Ati “Amashuri atarabona laboratwari yifashisha ibikoresho byayo byatanzwe, aho bitaragera bifashisha izo mu yandi mashuri ya Leta byegeranye kugira ngo nabo bagire igihe cyo gushyira mu bikorwa ibyo biga.”

Ku bijyanye n’ibitabo by’ishuri, Sarafina yavuze ko hari icyo kwishimira kijyanye n’uko biri gucapirwa mu Rwanda kandi bizagenda bitanga umusaruro .

Muri gahunda ya Leta yo kwihutisha iterambere NST1 iteganya ko muri 2024 amashuri 100% azaba fite ibikoresho bijyanye na siyanse mu gihe azaba afite Laboratwari ari 61%.

Abanyeshuri basabye ko ibikorwa remezo nka laboratwari bigezwa hose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .