Abaturiye ikibuga cy’indege cya Gisenyi ntibavuga rumwe n’akarere ku kwimurwa binyuranyije n’amasezerano bagiranye

Yanditswe na Mukwaya Olivier
Kuya 23 Mutarama 2018 saa 01:00
Yasuwe :
0 0

Bamwe mu baturage batuye mu mbago z’ahagiye kwagurirwa Ikibuga cy’Indege cya Gisenyi mu Karere ka Rubavu, bavuga ko batishimiye icyemezo cyafashwe n’ubuyobozi bw’akarere cyo kubimura aho batuye mu gihe kitarenze iminsi icumi.

Itariki ya 31 Mutarama 2018, ni yo nyirantarengwa yahawe bamwe mu baturage batuye haruguru y’ikibuga cy’indege ngo babe bimutse bashake ahandi batura, kuko aho batuye ubu ari mu mbago iki kibuga cy’indege kigiye kwagurirwamo.

Aba baturage bavuga ko uyu mwanzuro uhabanye n’amasezerano bari bagiranye n’ubuyobozi.

Bavuga ko basabwa kwimuka batarishyurwa amafaranga yose y’ingurane bemerewe ndetse bakabuzwa no gusenya inzu zabo ngo batware amatafari n’amabati zubakishije ngo bajye kubyubakisha aho bagiye kwimukira.

Karenzi Honoré, umwe muri aba baturage yavuze ko batunguwe no kumva basabwa kwimuka mu gihe ibyo bumvikanyeho n’ubuyobozi bitararangira.

Yagize ati “Twatunguwe no kubona akarere kavuga ko tugomba kuva mu nzu zacu bitarenze tariki 31 z’uku kwezi kwa mbere kandi n’amasezerano twahanye ataruzura kuko bagombaga kuduha 5% y’ubukererwe ateganywa n’itegeko; ayo mafaranga ntiturayabona ntitwumva ukuntu bashobora kutuvana mu nzu nyuma y’iminsi 10 dutegujwe ngo bikunde kandi twanasezeranye ko bazaduha ibikoresho byacu tukabijyana bagasigarana ubutaka. Tuba twaranimutse ni uko hakiri bagenzi bacu batarishyurwa. Turasaba ko bakubahiriza amasezerano tukabona kuvamo.’’

Kabayiza Rwaburindi Elie utuye mu Kagari ka Byahi, Umurenge wa Rubavu avuga ko amafaranga 5% bari bategereje ngo bimure ibyabo yari atarabageraho asaba ko bayahabwa bagahabwa n’amezi atatu yo kwimuka.

Ati “Icyi cyemezo cyarantunguye cyane kuko biragoye cyane kuba wimutse mu minsi icumi ahantu wari utuye. Bisaba kwitegura kandi hari amafaranga twari dutegereje badusigayemo y’ubukererwe; icyo nifuza ni uko baduha nk’amezi atatu bakanatwishyura amafaranga baturimo, ikindi batureke tujyane ibikoresho nk’uko twabyumvikanye ko twisenyera tukabasigira ubutaka.’’

Umuyobozi w’Akarere wungirije ushinzwe iterambere ry’ubukungu, Murenzi Janvier, yavuze ko aba baturage mu gihe bamaze kwishyurwa bakagombye kuba baramaze kwimuka nk’uko amategeko abiteganya.

Ati “Ubundi umuntu ahabwa amezi ane ngo abe yamaze kwimuka; ayo mezi abamaze kwishyurwa barayagejeje bamwe yararenze. Uwaba atarayagezaho byakwigwaho. Kuba tubasaba kwimuka bishingiye ku itegeko. Twe nk’ubuyobozi twafashe umwanya tubiganiraho n’abaturage turanabibasobanurira tubereka ko bazasabwa kuvamo hari n’abatangiye kubikora hari n’ababonye amafaranga bahita bigendera."

"Ku birebana n’ibikoresho iyo inzu yabazwe ibarwa agaciro kose n’ibikoresho biriho haba amabati n’ibindi byose. Ubundi biba ari umutungo wa leta kuko iba yatanze amafaranga ahwanye n’inzu. 5% y’ubukererwe bavuga ko batarayabona bakwegera ibiro by’ubutaka tukabiganiraho n’ikigo gishinze ibibuga by’indege kugira ngo dukore ubuvugizi.’’

Akomeza vuga ko ibyo kwimukana ibikoresho ntabirimo kuko iyo wishyuwe uba wishyuwe byose.

Ati "Ntabwo twanyuranya n’itegeko kuko ntiritwemerera gutanga ibikoresho kuko niba umuntu yishyuwe amafaranga ibikoresho arabijyana he ?Ubundi ntabwo ari akarere kishyuye bariya baturage, ni Ikigo cy’Igihugu Gishinzwe Ibibuga by’Indege mu Rwanda. Niba barishyuwe amabati barayajyana he ko n’uwabishyuye ashobora kuyakoresha ahandi? Kuba haremejwe ko bazatwara ibikoresho si byo rwose."

Iki kibazo cy’abaturage baturiye ikibuga cy’indege cya Gisenyi kimaze imyaka myinshi; abaturage babaruriwe bagomba kwimurwa ni 309 ariko kugeza ubu hamaze kwishyurwa 212 naho 97 ntibarishyurwa.

Abaturiye ahazagurirwa Ikibuga cy'Indege cya Gisenyi barinubira kwimurwa badahawe ibyo basezeranye n'ubuyobozi
Abimurwa mu nkengero z'Ikibuga cy'Indege cya Gisenyi ntibemerewe gutwara ibikoresho byubatse inzu zabo
Kabayiza Rwaburindi Elie asaba ko bahabwa igihe cyo kwitegura kwimuka
Karenzi Honoré, yavuze ko batunguwe no gusabwa kwimuka ibyo bumvikanyeho n’ubuyobozi bitararangira
Umuyobozi w’Akarere wungirije ushinzwe iterambere ry’ubukungu, Murenzi Janvier, yavuze ko aba baturage mu gihe bamaze kwishyurwa bakagombye kuba baramaze kwimuka nk’uko amategeko abiteganya
Bamwe mu baturiye Ikibuga cy'Indege cya Gisenyi bavuga ko batishimiye uburyo bagiye kwimurwamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza