00:00:00 IGIHE NETWORK KN KINYARWANDA EN ENGLISH FR FRANCAIS

Abasakuza ngo ntabwo mukwiriye kuvana abantu mu bishanga bazategereze igihe cyabo-Perezida Kagame

Yanditswe na Evariste Nsengimana
Kuya 19 Ukuboza 2019 saa 01:33
Yasuwe :
0 0

Perezida Paul Kagame yavuze ko abayobozi badakwiye guha umwanya ibitekezo by’abantu barwanya umwanzuro Leta yafashe wo gukura abantu mu manegeka no mu bishanga mu rwego rwo kurinda ubuzima bwabo ko bwakwibasirwa n’ibiza, avuga ko abatumva impamvu y’uwo mwanzuro bazashyira mu bikorwa uwabo igihe bazaba ari abayobozi.

Yabigarutseho kuri uyu wa 19 Ukuboza 2019, ubwo yatangizaga inama y’igihugu y’Umushyikirano ya 17, iteraniye muri Kigali Convention Center ku wa 19-20 uku kwezi.

Mu mpera z’icyumweru gishize nibwo ubuyobozi bw’Umujyi wa Kigali, bwatangiye gahunda yo gukuraho inyubako z’abatuye mu manegeka uhereye ku bo mu bishanga kugira ngo hirindwe ko bahitanwa n’ibiza.

Ni gahunda yahereye mu bishanga by’ahitwa ku Mulindi, Bannyahe, Muhima no mu Rwampara mu Murenge wa Nyarugenge.

Biteganyijwe ko ari gahunda izakomeza hirya no hino mu gihugu hagamijwe gutabara ubuzima bw’abaturage.

Bamwe mu baturage bakuriweho ibikorwa bavuze ko batiyumvisha uburyo ubuyobozi buri kubasenyera inzu bukanabimura ku ngufu mu gihe bwari bwabahaye integuza y’iminsi 15 abandi bagasaba ko Leta yareka umwanzuro wo kubimurayo cyangwa bakabanza guhabwa ingurane.

Perezida Kagame yavuze ko iki gikorwa kigamije kurengera ubuzima bw’abanyarwanda ariko hari abarwanyije iyi gahunda kubera ko batasobanuriwe imvano yayo.

Ati “Abantu barasenyewe ariko ababikoze n’ababiyoboye barimo n’abaminisitiri kuki badasobanurira abantu kuko bifite ingaruka nyinshi byarangiza bikajyamo politiki. Kuki mwakora ibintu gutyo, ikibazo cyo gusobanura ibyo mukora binanirana gute ?”

Perezida Kagame yavuze ko hari abakwiriye kwimuka cyangwa kwimurwa kandi bafite ibyangombwa batuye ahantu hakwiriye guturwa ariko hafite ibibazo runaka.

Ati “Abo nibyo bahabwa indishyi ni ko bigenda urabibara ukagena uburyo kuko uhamurekeye imvura se izabura kuhamuvana ? Imisozi iriduka se tuyifiteho ubushobozi, ushobora kwanga kuhava ukahakurwa n’ibiza.”

Gusa ku rundi ruhande, Perezida Kagame yavuze ko hari abandi bagiye baturayo mu buryo bunyuranyije n’amategeko, wenda bigizwemo uruhare n’amakosa y’abayobozi bamwe ariko Leta idakwiye kubatererana ngo ibiza bibahitane.

Ati “Dufite inshingano ku banyagihugu bacu turabafasha bakimuka bakajya aho bakwiriye kuba bari ntabwo tuvuga ngo watuye mu gishanga genda ugwe aho uguye, oya ntabwo ariko bigenda leta nabo irabafasha.”

Perezida Kagame yanenze abayobozi barebereye abaturage bubaka mu manegeka ntibabahagarike kandi babona ko byashyira ubuzima bwabo mu kaga, ariko anenga abakomeje kuvuga ko abantu badakwiye kwimurwa.

Ati “Abasakuza ngo ntabwo mukwiriye kuvana abantu bazategereze igihe cyabo niba abanyarwanda babemereye ko babayobora bazabikore uko babyumva ingaruka z’ababigizemo uruhare barazirengera. Natwe reka twirengere ingaruka zo kuba abantu binuba ko bimurwa aho badakwiriye kuba bari, kandi abaturage babirimo bakagira uko babyumva n’uko bafashwa.”

Yanenze abayobozi batanga ubutaka mu bishanga

Perezida Kagame yavuze ko ubusanzwe ibishanga bitagenewe guturwamo, ko n’ababituyemo usanga byarakozwe mu buryo bunyiranyije n’amategeko, rimwe na rimwe bakingiwe ikibaba na bamwe mu bayobozi.

Perezida Kagame yavuze ko nubwo usanga umuntu yaratujwe mu gishanga muri ubwo buryo usanga igihe cyo kumwimura mu rwego rwo kurengera ubuzima bwe usanga ari mu bambere bashaka guhabwa ingurane kandi ubutaka atuyemo atari ubwe.

Ati “Umuntu agiriye ibyago mu gishanga, icya mbere akakubwira ngo aho atuye mu gishanga, barahamuhaye. Yahahawe n’inzego z’ubuyobozi abenshi muri hano, wajya kumuvanamo akakubwira ko adashaka kuhava kubera ko yahahawe cyangwa se ko niba ugiye kuhamuvana ugomba kumwishyura.”

“Muri mwe abayobozi bari hano ujya gutanga igishanga ngo giturwemo abihera he ? Igishanga ni icya nde ? Gikwiye kuba gikoreshwa iki ? Ujya kuvanwamo rero akavuga ngo murabanza munyishyure, barakwishyurira ibitari ibyawe gute ? Uragiye wubatse mu muhanda, bajya kugusenyera uti muranyishyura, barakwishyura se wari ukwiriye kuba wubaka mu muhanda?”

Ubuyobozi bw’Umujyi wa Kigali buhamya ko icyemezo cyo gukuraho ibikorwa biri mu manegeka kitatunguranye kuko hatanzwe amatangazo y’integuza ndetse hashyirwa ibimenyetso bya ‘Towa’ ku nyubako ariko ba nyirazo barinangira.

Mu Mujyi wa Kigali iyi gahunda ijya gutangira hari ibikorwa biri mu bishanga 7222, ibyinshi muri byo birenze 70% ni inzu zari zituyemo abantu. Hafi inzu 2600 nta cyangombwa na kimwe zari zifite.

Igikorwa gitangira hari hamaze kuvamo ingo zitageze ku 100 ni ukuvuga zitarenze 2% y’izagombaga kuvamo, uyu munsi hamaze kuvamo 2495.

Guverinoma ivuga ko yari ifite gahunda yo kubakira abatishoboye bagera ku 12 000 ariko kubera iyi gahunda yo gukura abantu mu manegeka bazagera ku 15 000 cyangwa 16 000.

Perezida Kagame yatunguwe no kuba ikibazo cy’abubatse Akarere ka Nyamagabe ntibishyurwe kitarakemuwe nyuma y'imyaka ine
Inama y'Umushyikirano yitabiriwe n'ingeri zose z'abanyarwanda
Mu nama y'Umushyikirano hatanzwe ibiganiro bitandukanye bigamije kunoza no guteza imbere gahunda z'iterambere ry'igihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .