Abasaga 1300 bakoze ibizamini by’impamyabumenyi z’ibaruramari ry’umwuga

Yanditswe na Herve Ugirumukunda
Kuya 29 Ugushyingo 2017 saa 08:12
Yasuwe :
0 0

Ikigo gishinzwe guteza imbere umwuga w’ibaruramari mu Rwanda, ICPAR, cyakoresheje ibizamini by’impamyabumenyi z’ibaruramari ry’umwuga ku nshuro ya 11 kuri uyu wa 29 Ugushyingo 2017.

Ibizamini byakozwe ni iby’impamyabumenyi ya CPA(Certified Public Accountant) byakozwe na 1336 na CAT(Certified Accounting Technician) byakozwe na 425. Byakorewe muri Kaminuza yigenga ya Kigali, ULK na Kaminuza y’u Rwanda, Ishami rya Huye.

Bazimya Vedaste wakoze ibizamini bya CPA usanzwe ari umukozi ushinzwe ibaruramari, avuga ko kwiga amasomo bizamufasha mu kazi akagenzura kinyamwuga imari y’ikigo akorera.

Ati “Iyo ukiri umunyeshuri muri kaminuza ntuba wari wamenya amahame yo gutanga raporo kuko hari ibigenderwaho ku rwego mpuzamahanga, kugira ngo umuntu ugiye gusoma ibyo wanditse ari mu Bwongereza asange ibyawe byo mu Rwanda biteguye kimwe n’iby’iwabo. Ibyo rero byose byigirwa muri aya masomo.”

Bazimya yatangiye kwiga aya masomo mu 2013, ubu ari gukora ibizamini bya nyuma akaba avuga ko yakererejwe no kwiga abifatanyije n’akazi kuko bamwe mu bo batangiranye barangije.

Abandi benshi bakoze ibizamini bya CPA na CAT ni abarangije muri Kaminuza y’u Rwanda Ishami ry’Ubukungu n’Ubucuruzi, CBE n’izindi kaminuza zigenga, bahisemo gutangira gukora ibi bizamini bakiri ku ntebe y’ishuri.

KAJE Ines urangije kwiga muri CBE avuga ko nubwo yarangije mu mwaka ushize akaba atarabona akazi yabonye neza ko amasomo atangwa na ICPAR akomeye akaba ari no ku rwego mpuzamahanga.

Ati “Nkatwe tutarabona akazi usanga batubaza impamyabumenyi y’icyiciro cya kabiri cya kaminuza bakongeraho n’iyi CPA, usanga bitandukanye n’usanzwe, ndumva niyizeye mu kuzabona akazi nubwo ibi bizamini biba bikomeye kubitsinda bitoroshye.”

Iki kigo kivuga ko cyiyemeje kongera ababaruramari bakenewe mu iterambere ry’igihugu kuko uko ubukungu bwiyongera ari na ko hakenerwa ababigize umwuga bashoboye kubucunga.

Abakoreye ibizamini bya CPA bakenerwa mu mabanki, amasoko y’imari n’imigabane, ibigega by’iterambere, ibigo by’ubwigishingizi n’ibindi bifite aho bihuriye n’imari.

Nubwo Leta y’u Rwanda icyemerera abatarakoze ibi bizamini gukora akazi, bashobora kuzahura n’imbogamizi mu minsi iri imbere ubwo ababitsinze bazaba bariyongereye ku isoko ry’umurimo.

ICPAR ivuga ko kuva yatangira gutanga ibizamini, abantu 19 ari bo bamaze gutsinda ibizamini byose bya CPA na 31 barangije ibya CAT.

Bamwe mu bakoze ibizamini by’impamyabumenyi z’ibaruramari ry’umwuga
Abakoreye ibizamini bya CPA bakenerwa mu mabanki, amasoko y’imari n’imigabane, ibigega by’iterambere, ibigo by’ubwigishingizi n’ibindi
Ikigo ICPAR kivuga ko cyiyemeje kongera ababaruramari bakenewe mu iterambere ry’igihugu
Abize amasomo y'ibaruramari ry'umwuga bibafasha mu kazi mu bigo bakorera
Benshi bakoze ibizamini bya CPA na CAT ni abarangije muri Kaminuza y’u Rwanda Ishami ry’Ubukungu n’Ubucuruzi, CBE n’izindi kaminuza zigenga
Abatarakoze ibi bizamini bashobora kuzahura n’imbogamizi mu minsi iri imbere ubwo ababitsinze bazaba bariyongereye ku isoko ry’umurimo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza