Abanyarwanda 10 bagiye kurushanwa kuvuga inyuguti z’amagambo y’Icyongereza i Mombasa na Dubai

Yanditswe na Ferdinand Maniraguha
Kuya 6 Nyakanga 2018 saa 09:01
Yasuwe :
0 0

Abanyeshuri icumi b’Abanyarwanda biga mu bigo bitandukanye mu mashuri abanza n’ayisumbuye, bagiye kwitabira amarushanwa mpuzamahanga yo kuvuga inyuguti zigize amagambo mu Cyongereza arimo azabera i Mombasa n’andi azabera i Dubai.

Aba banyeshuri bagiye guhagararira u Rwanda nyuma yo gutsinda bagenzi babo mu marushanwa yo kuvuga inyuguti zigize amagambo y’Icyongereza n’Ikinyarwanda amaze iminsi abera mu bigo by’amashuri hirya no hino mu gihugu.

Ayo marushanwa azwi nka ’Spelling bee competition’ yateguwe n’Umuryango Brain Teasers Rwanda ufatanyije na Minisiteri y’Uburezi.

Muri ayo marushanwa, abana bahabwaga amagambo y’Icyongereza cyangwa Ikinyarwanda bitewe n’ururimi baje guhatanamo, bakavuga inyuguti ziyagize mu gihe gito baba bahawe.

Umuyobozi wa Brain Teasers Rwanda, Richard Kaweesi yavuze ko amarushanwa nk’aya afasha abanyeshuri kwiyungura ubumenyi mu rurimi kandi bigatuma bigirira icyizere mu ruhame.

Yagize ati “Ibi bintu bifasha cyane abanyeshuri kubera ko biteza ururimi imbere, bikabongerera inyunguramagambo. Bituma umwana yigirira icyizere, akagira ubundi bumenyi butandukanye.”

Umwe mu barimu bategura ibibazo byo mu rurimi rw’Ikinyarwanda muri aya marushanwa, Jean Pierre Twiringiyimana, yavuze ko binafasha abana kuvuga neza indimi batazivangavanga.

Ati “Intego yacu ni ukugira ngo batinyuke kuvuga ururimi yaba ari Icyongereza cyangwa Ikinyarwanda ariko batabivanga. Bizarushaho guteza imbere abana mu mivugire y’Ikinyarwanda n’izindi ndimi batabivanga.”

Butera Manzi Oreste wiga muri Riviera High School, nyuma yo kwitabira aya marushanwa agahiganwa na bagenzi be mu Rwanda, yavuze ko byatumye yigirira icyizere cyo kuvuga mu ruhame.

Yagize ati “Nigiriye icyizere kubera ko hari hari abantu benshi, amashuri menshi, bisaba ko wigirira icyizere kugira ngo ubashe kuvuga inyuguti zigize ijambo wahawe. Abantu benshi banga ibi byo gusoma amagambo bakeka ko ari iby’abantu biga cyane ariko nkanjye nabonye binejeje.”

Aya marushanwa yabereye mu ntara zose zigize igihugu. Mu barushanyijwe mu rurimi rw’Ikinyarwanda hahembwe batanu ba mbere bo mu mashuri abanza na batanu ba mbere mu mashuri yisumbuye. Ni nako byagenze mu barushanyijwe mu rurimi rw’Icyongereza.

Abahize abandi mu Rwanda bagiye kujya ku rwego mpuzamahanga

Amarushanwa mpuzamahanga azitabirwa na batanu barushije abandi mu rurimi rw’Icyongereza mu mashuri abanza barimo Karire Nora wiga muri Espoir de l’Avenir, Niyonzima Jean de Dieu wiga muri Educational Institute for the Blind, Uzarama Aline wiga muri Orpcare, Gihozo Murekatete Anne wiga muri Ahazaza Independent School na Nduwingoma Marie Ange wiga muri Ecole Notre dame des Anges.

Mu yisumbuye hazagenda Musenga Marisa wiga kuri King David Academy, Uwera Marie Jeanne na Donatha Mukashyaka biga kuri Rafiki International School, Umurerwa Kalisa Tania wiga kuri Maranyundo Girls’ School na Adhija Jagan wiga kuri Green Hills Academy.

Muri Nzeli uyu mwaka, bazitabira amarushanwa yo kuvuga inyuguti zigize amagambo (African Spelling bee Competition) azabera i Mbombasa muri Kenya naho mu Ugushyingo 2018 bitabire amarushanwa mpuzamahanga azabera i Dubai muri Leta Zunze Ubumwe z’Abarabu (Intercontinental Spelling bee Competition).

Aya marushanwa yatangijwe mu Rwanda mu mwaka wa 2015.

Umwe mu banyeshuri bitabiriye aya marushanwa
Umunyeshuri yahabwaga inyuguti zo kuvuga mu gihe gito
Abanyeshuri bavugaga amagambo y'Ikinyarwanda cyangwa Icyongereza
Abanyeshuri barushije abandi barahembwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza