Abakora mu by’imikino y’amahirwe basabye kuzirikanwa mu Nama y’Abaminisitiri itaha

Yanditswe na Thamimu Hakizimana
Kuya 20 Gashyantare 2021 saa 07:13
Yasuwe :
0 0

Bamwe mu bashoramari batandukanye mu bucuruzi bw’imikino y’amahirwe basabye kuzatekerezwaho mu gihe Inama y’Abaminisitiri izongera guterana ifata ingamba zo kwirinda icyorezo cya COVID-19.

Kuri uyu wa Gatanu tariki 19 Gashyantare 2021 nibwo Inama y’Abaminisitiri yateranye isuzuma ingamba zari zimaze iminsi zikurikizwa mu kwirinda COVID-19 no gufata izindi. Hari ibikorwa bimwe na bimwe byakomorewe ariko utubari n’imikino y’amahirwe biri mu byakomeje gufungwa.

Abakora ibijyanye n’imikino y’amahirwe bagaragaje ko bakomeje kugongwa n’ingamba zo kwirinda COVID-19, ku buryo nabo bakeneye gutekerezwaho.

Umwe baganiriye na Radio Rwanda yagize ati “Iyo ukorera ikigo buri kwezi ubona umushahara runaka, bigufasha gutunga umuryango. Abenshi dufite imiryango, dufite inshingano rero ubuzima buhita bukomera. Kuvuga ngo kumara amezi 10 nta kazi ufite ubuzima buba bugoye, noneho by’umwihariko mu mikino y’amahirwe. Abenshi bagiye bahagarikwa mu kazi kuko ibigo dukorera byagiye bibura ubushobozi bwo kubahemba.”

Undi ati “Bibaye byiza nk’uko mbere bari babitekerejeho bakadusubiza mu kazi bakongera bakakadusubizamo kuko biri kutugiraho ingaruka nyinshi cyane. Twumva ngo hari ibyo leta yageneraga abandi, ntabwo twebwe nk’abakozi yabitugeneraga kuko yari izi ko dufite akazi, badufashije n’uko badusubiza mu kazi.”

Ibi kandi banabihuriraho n’abashoramari muri uru rwego rw’imikino y’amahirwe bavuga ko baramutse bongerewe gufungurirwa nta kabuza bakubahiriza amabwiriza yo kwirinda COVID-19.

Umuyobozi wa Forrza Bet Rwanda, Eric Rutayisire, yavuze ko nibura ahomba miliyoni 50 z’amafaranga y’u Rwanda buri kwezi.

Ati “Abantu bose ndetse n’ibihugu byose byagizweho ingaruka ikomeye na COVID-19 ariko twebwe by’umwihariko nk’uko ubivuze tumaze amezi 10 twahagaritse. Umwaka ushize n’iminsi mike twabashije gufungura nabwo ni mu Mujyi wa Kigali kuko mu Ntara ntituremererwa gufungura twafunguye amezi abiri nabwo dukora amasaha ane ku munsi.”

Yongeyeho ko bari mu gihombo gikomeye yaba mu byo bashoye no mu bikorwa byabo no mu bijyanye n’abakozi babo, aboneraho gusaba ko nabo ubutaha bazazirikanwa.

Kugeza ubu mu Rwanda habarizwa ibigo 19 bikora imirimo y’amahirwe mu buryo bwemewe n’amategeko.

Ingamba zashyizweho zo kwirinda COVID-19 zizongera gusuzumwa tariki 15 Werurwe 2021.

Abakora mu by’imikino y’amahirwe basabye gukomorerwa mu Nama y’Abaminisitiri itaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .