Abagore bahize abandi mu gukorera kawa kinyamwuga bahawe ibihembo

Yanditswe na Evariste Nsengimana
Kuya 5 Mata 2018 saa 07:46
Yasuwe :
0 0

Abagore 5940, barimo abibumbiye muri koperative 16 z’abahinzi n’abandi baturanye na zo bo mu Turere twa Rulindo, Gakenke na Gicumbi, basoje amahugurwa yo gukorera kawa kinyamwuga, bahawe impamyabushobozi n’ibihembo bya miliyoni zisaga 15 z’amafaranga y’u Rwanda.

Amahugurwa basoje kuri uyu wa 5 Mata 2018, bayakoreshejwe mu gihe cy’umwaka n’umuryango Sustainable Harvest Rwanda ufasha abahinzi ba kawa biganjemo abagore, ufatanije n’Ikigo cy’Igihugu gishinzwe kohereza mu mahanga ibikomoka ku buhinzi n’ubworozi (NAEB) na Minisiteri y’Uburinganire n’iterambere ry’umuryango (Migeprof).

Ibihembo bahawe byiganjemo matelas, ibikoresho by’ubuhinzi n’amatungo magufi n’ibindi.

Umuyobozi wa Sustainable Harvest mu Karere ka Afurika y’Uburasirazuba, Christine Condo, yavuze ko mu Rwanda Umuryango ukorera mu turere 13, ukaba uzahugura abagore barenga ibihumbi 14 bibumbiye muri koperative 54.

Biteganyijwe ko uzahembamo abahize abandi ibikoresho bifite agaciro ka miliyoni zirenga 48Frw kandi intego ni ukugira ngo abahinzi ba kawa babikore nk’umwuga ushobora kubateza imbere.

Yagize ati “Uyu munsi Sustainable Harvest Rwanda yaje gutanga ibihembo ku bahinzi babaye indashyikirwa mu gushyira mu bikorwa inyigisho bahawe muri gahunda yitwa ‘Wakoze neza muhinzi’, igamije kongera umusaruro mu bwiza no mu bwinshi, bakaba kandi bashyira mu bikorwa gahunda zose za Leta zigamije imibereho myiza.”

Amahugurwa yibanze ku kubasobanurira guhinga no gukorera kawa kinyamwuga birimo kuyibagarira, kuyisasira, gutunganya no gushyiraho ifumbire y’imborera, gukoresha inyongeramusaruro, kuyisarura kandi yeze neza, kuyigeza ku ruganda, kuyitungayizayo, imicungire n’imiyoborere myiza ya koperative, uburinganire, iterambere n’ibindi.

Umwe mu hahinzi bahawe ibihembo witwa Mukeshimana Costasie, yavuze ko amahugurwa bahawe ari ingirakamaro, kuko yahinduye uko umugore yafatwaga nk’utashobora gukorera no kwita kuri kawa, ariko ubu bakaba basigaye bafatanya n’abo bashakanye mu kuyikorera no guteza imbere urugo.

Umuyobozi Mukuru Wungirije wa NAEB, Sandrine Urujeni, yagize ati “Iki ni igikorwa dushyize imbere. By’umwihariko kawa ni igikorwa dushyize imbere no kubaka ubushobozi bw’abahinzi. Mu by’ukuri ntitwavuga ko umuhinzi atari azi ibyo akora, ariko kwiga ni uguhozaho. Iki gikorwa cyavuye ku banywa ikawa y’u Rwanda bishimiye ubwiza bwayo, bakavuga bati reka dusangire na ba bahinzi. Iki ni ikintu cyiza tugiye gushyiramo imbaraga kugira ngo umuhinzi aho ari amenye icyo ayihingira.”

Yakomeje avuga ko ikigamijwe ari ukugira ngo kawa y’u Rwanda igire ubwiza butuma itandukana n’iz’ibindi bihugu ikanakundwa.

Ubwo Minisitiri w’Intebe, Dr. Ngirente Edouard yagezaga ku Nteko Ishinga Amategeko ibikorwa bya Guverinoma birebana n’Ubuhinzi n’Ubworozi ku wa 2 Mata 2018, yagaragaje ko mu mwaka wa 2017 ibyoherezwa mu mahanga byazamutse ku kigero cya 39% u Rwanda rwinjiza amadolari ya Amerika miliyoni zisaga 428, aho mu mwaka wa 2015 yari miliyoni zisaga 262 $.

Yasobanuye ko mu byoherejwe mu mahanga byazamutse harimo igihingwa cya kawa, icyayi, ibireti, imboga n’imbuto, indabo n’ibindi, ko agaciro ka kawa kiyongereyeho 3%, kavuye kuri miliyoni 62,040,000$ mu 2015 kagera kuri 64,115,952 $ mu 2017.

Ibihembo bahawe birimo matelas n'ibindi bikoresho by'ubuhinzi
Umuyobozi mukuru wungirije wa NAEB, Sandrine Urujeni, atanga impanyabushobozi na matela
Bamwe bahawe amatungo magufi
Hari n'abahawe inkwavu
Umuyobozi mukuru wungirije wa NAEB, Sandrine Urujeni
Umwe mu hahinzi bahawe impamyabumenyi n’ibihembo witwa Mukeshimana Costasie
Umuyobozi wa Sustainable Harvest mu Karere ka Afurika y’Uburasirazuba, Christine Condo
Abagore bahize abandi mu gukorera no guhinga kawa bo mu turere twa Gakenke, Rulindo na Gicumbi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza