Abagize Inteko y’u Rwanda bashinje iya EU kuvogera ubusugire bw’igihugu bitwaje Rusesabagina

Yanditswe na Akayezu Jean de Dieu
Kuya 16 Gashyantare 2021 saa 08:09
Yasuwe :
0 0

Inteko Ishinga Amategeko y’u Rwanda, imitwe yombi yanzuye ko igiye gutegura inyandiko ivugurura imyanzuro yatanzwe n’Inteko Ishinga Amategeko y’Ubumwe bw’Uburayi yasabye ko Paul Rusesabagina yazahabwa ubutabera bwuzuye.

Kuri uyu wa Mbere tariki 15 Gashyantare 2021, nibwo Inteko Ishinga Amategeko y’u Rwanda yagejejweho Raporo ya Komisiyo z’Ububanyi n’Amahanga, Ubutwererane n’Umutekano z’imitwe yombi ku isuzumwa ry’ibikubiye mu cyemezo cy’Inteko Ishinga Amategeko y’ubumwe bw’u Burayi cyafashwe ku Rwanda.

Ni nyuma y’uko ku wa Kane tariki 11 Gashyantare 2021, Abadepite bo mu Nteko Ishinga Amategeko y’Umuryango w’Ubumwe bw’u Burayi bateranye batora imyanzuro 14 irimo uvuga ko Paul Rusesabagina ukurikiranywe n’inkiko z’u Rwanda atazahabwa ubutabera bwuzuye.

Mu bindi aba badepite ba EU bavuze, harimo ko Rusesabagina ari intwari yabiherewe ibihembo n’imidari mpuzamahanga bityo adakwiye gukurikiranwa.

Abadepite n’Abasenateri b’u Rwanda bateranye kuri uyu wa Mbere hifashishijwe ikoranabuhanga bagaragaje ko ibyakozwe n’Inteko ya EU birimo amakosa n’imvugo zidahwitse zigamije kuvogera ubusugire n’imikorere y’inzego z’u Rwanda.

Perezida wa Komisiyo y’Ububanyi n’Amahanga, Ubutwererane n’Umutekano, mu mutwe w’Abadepite, Fidèle Rwigamba yavuze ko iyo myanzuro yuzuyemo ibinyoma, muri rusange igamije kunenga inzego z’u Rwanda no kwivanga mu mikorere y’ubutabera bw’u Rwanda.

Yagize ati “Abagize Komisiyo basanze uriya mwanzuro wiganjemo ibinyoma muri rusange ugamije kunenga inzego z’igihugu cyacu no kwivanga mu mikorere y’inzego z’ubutabera bw’u Rwanda bitwaje Paul Rusesabagina. Twasanze ndetse udaha agaciro ihame ry’ubwigenge bw’ubucamanza ukanahakana kandi ugapfobya Jenoside yakorewe Abatutsi hashingiwe ku mvugo zakoreshejwe.”

Yakomeje agira ati “Komisiyo yamaganye ibyo Inteko Ishinga Amategeko ivuga bidafite ishingiro ko Paul Rusesabagina atazahabwa ubutabera buboneye kandi iributsa ko abakoze ibyaha banyuranye baturutse mu bihugu by’u Burayi n’ahandi hose bahawe ubutabera buboneye n’inkiko z’u Rwanda.”

Biteganyijwe ko nyuma yo gukora raporo y’Inteko Ishinga Amategeko y’u Rwanda, imyanzuro yayo igiye gushyikirizwa inzego zitandukanye zirimo n’Inteko ya EU, Umuryango wa Afurika Yunze Ubumwe ndetse n’uwa Afurika y’Uburasirazuba ndetse ikazashyirwa no mu ndimi zitandukanye.

Abadepite b’u Rwanda bariye karungu!

Mu byirengagijwe n’Abadepite b’u Burayi harimo abaturage b’inzirakarengane b’i Nyabimata n’ahandi hatandukanye umutwe wa FLN wagiye ugaba ibitero ukica abantu, ugakomeretsa benshi abandi bagakurwa mu byabo.

Bavuze ko ibyakozwe byubahuka u Rwanda nk’igihugu kigendera ku mategeko. Bashinje abadepite ba EU gasuzuguro no kuvogera igihugu kigenga.

Depite Uwamariya Venelanda yavuze ko Inteko y’u Burayi yakoze bikabije ari ukwinjirira mu buyobozi bw’ibindi bihugu, ari ukwirengagiza ko u Rwanda ari igihugu cyigenga, gifite ubusugire bwacyo kigendera ku mategeko kandi ubutabera ari urwego rwigenga kandi rudahabwa amabwiriza n’uwo ariwe wese nk’uko Itegeko Nshinga rya Repubulika y’u Rwanda ribiteganya.

Yakomeje agira ati “Ariko banirengagije ko Rusesabagina ubwe yiyemereye ko yateye inkunga umutwe wa gisirikare wa FLN, wivugira ko urwanya ubutegetsi bw’u Rwanda, ari nawo wakomeje guhekura u Rwanda.”

“Birababaje kumva ukuntu yemeye ibyaha yakoze, ariko inteko yo ikamugira umwere. Aba bantu birengagije ukuri bakumva ko umuntu wese ubonye ubwenegihugu agomba kuza guhekura u Rwanda.”

Depite Marie Claire Uwumuremyi yagize ati “Turagira ngo twerekane ko ibyo Inteko Ishinga Amategeko y’Uburayi yakoze bikabije, ari ukwinjira mu buyobozi bw’ikindi gihugu, birengagije ko u Rwanda ari igihugu kigendera ku mategeko.”

Depite Muhongayire Christine yagize ati “Ni agasuzuguro no kuvogera ubusugire bw’iki gihugu ndetse no gupfobya Jenoside yakorewe Abatutsi mu 1994. Iyi jenoside iba bari bahari, nta jambo na rimwe bigeze bayivugaho, nta n’umwe wigeze ahaguruka ngo arwanye Jenoside, abana n’abasaza barimo gupfa, bajugunya mu mazi imirambo indi iri ku misozi, bakubita ku biti impinja, nta n’umwe wigeze agira icyo avuga.”

“Uyu munsi barimo kubahuka kuvuga ku Rwanda kandi mu by’ukuri tumaze kuba igihugu kimaze gusigasira imibereho myiza y’abaturage, kirimo kugerageza kunga abanyarwanda ndetse no kongera kutubanisha. Hanyuma iyi Nteko Ishinga Amategeko ikaba aribwo yongera kubahuka gufata iyi myanzuro ihakana Jenoside ikanayipfobya.”

Rusesabagina yemera byinshi mu byo ashinjwa

Ku wa 31 Kanama 2020 nibwo Urwego rw’Igihugu rw’Ubugenzacyaha rweretse itangazamakuru Paul Rusesabagina wari ukandagiye mu gihugu ku nshuro ye ya mbere kuva mu 2004. Niwe wari uyoboye impuzamashyaka y’imitwe ya politiki irwanya u Rwanda, MRCD, ikagira n’umutwe wa gisirikare FLN.

MRCD ishinjwa gutegura no gushyira mu bikorwa ibitero bitanu byagabwe ku butaka bw’u Rwanda muri bimwe mu bice bikikije ishyamba rya Nyungwe mu 2018.

Mu Murenge wa Nyabimata, mu Karere ka Nyaruguru no mu Murenge wa Uwinkingi mu Karere ka Nyamagabe, niho hari abaturage ba mbere bashegeshwe n’ibikorwa by’inyeshyamba za FLN.

Ibitero bya mbere bya FLN byabaye ku itariki ya 03 Kamena 2018, aho izi nyeshyamba zasahuye, zikanashimuta bamwe mu baturage b’i Nyabimata zikabikoreza ibyo zari zasahuye.

Mu ijoro ryo ku wa Kabiri tariki ya 19 Kamena 2018 kandi inyeshyamba za FLN ya Rusesabagina zagabye igitero ku Biro by’Umurenge wa Nyabimata, zikomeretsa Umunyamabanga Nshingwabikorwa w’Umurenge, bamusanze mu nzu yari acumbitsemo ndetse batwika n’imodoka ye.

Muri icyo gitero bishe uwitwa Munyaneza Fidèle wari Perezida wa Njyanama y’Umurenge wa Nyabimata, uwitwa Maniriho Anatole wari ushinzwe amasomo ku Rwunge rw’Amashuri rwa Nyabimata n’umuturage witwa Habimana Joseph.

Ku wa 15 Ukuboza 2018 nabwo abarwanyi b’uyu mutwe bishe abaturage batandatu, abandi 19 barakomereka. Icyo gihe mu bapfuye harimo Mutesi Diane, Niwenshuti Isaac, Atete Sine Ornella, Mukabahizi Hiralie, Samuel Ntiziryayo na Niyomugabo Jeannine.

Mu bihe bitandukanye, Rusesabagina yagiye aburana mu rukiko, yagaragazaga ko hari bimwe mu byaha yemera ndetse akabisabira imbabazi.

Ubwo yabwirwaga iby’abo bantu bose baguye muri ibyo bitero ,nyuma yo kumva ko FLN yishe abantu i Nyaruguru na Nyamagabe, yagize ati “Mbisabiye imbabazi, nsabye imbabazi iyo miryango ndetse n’igihugu muri rusange.”

Rusesabagina akurikiranyweho ibyaha birimo kurema kurema umutwe w’igabo utemewe cyangwa kuwujyamo, iterabwoba ku nyungu za politike, gukora cyangwa kugira uruhare mu bikorwa by’iterabwoba, kuba mu mutwe r’iterabwoba, kugambana no gushishikariza abandi gukora iterabwoba.

Mu byaha aregwa harimo kandi ubufatanyacyaha mu byaha by’ubwicanyi, ubufatanyacyaha mu cyaha cyo kwiba hakoreshwejwe intwaro, ubufatanyacyaha mu gufata umuntu nk’ingwate, ubufatanyacyaha mu cyaha cyo gutwikira undi ku bushake inyubako, ubufatanyacyaha mu cyaha cyo gukubita no gukomeretsa ku bushake, ubufatanyacyaha mu cyaha cyo gushyira abandi mu mirwano.

Amakuru avuga ko ku wa 17 Gashyantare 2021, ari bwo Paul Rusesabagina na Nsabimana Callixte wiyitaga Sankara , bazongera kwitaba urukiko baburana mu mizi, urubanza rukazabera mu cyumba cy’iburanisha cy’Urukiko rw’Ikirenga giherereye ku Kimihurura mu Mujyi wa Kigali.

Abadepite n'Abasenateri b'u Rwanda bavuze ko ibyemezo byafashwe n'Inteko ya EU, harimo agasuzuguro no gushaka kuvogera ubuyobozi bw'u Rwanda
Perezida w'Umutwe w'Abadepite, Donatille Mukabalisa ubwo yari mu mirimo y'inteko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .