Abacuruzi n’abashoferi b’amakamyo yambukiranya imipaka bagiye kujya babanza gupimwa COVID-19

Yanditswe na Ntabareshya Jean de Dieu
Kuya 11 Gashyantare 2021 saa 04:07
Yasuwe :
0 0

Minisiteri y’Ibikorwa Remezo yatangaje ko abashoferi b’amakamyo n’abakora ubucuruzi bwambukiranya imipaka, bagiye kujya bemererwa gutambuka ari uko bagaragaje icyemezo cy’uko bipimishije COVID-19 kitarengeje iminsi itanu.

Itangazo ryashyizwe hanze kuri uyu wa Kane, rivuga ko Guverinoma y’u Rwanda yabonye ko abakora imirimo yambukiranya imipaka n’abashoferi b’amakamyo, bakwiriye kujya babanza kwipimisha COVID-19 mu rwego rwo kugabanya ibyago byinshi byo kwandura.

Igendeye ku mabwiriza y’Umuryango wa Afurika y’Iburasirazuba agendanye no koroshya urujya n’uruza rw’ibicuruzwa na serivisi muri ibi bihe bya COVID-19 yo ku wa 24 Mata 2020 no kugabanya ubucucike ku mipaka, Minisiteri y’Ibikorwa Remezo yavuze ko abacuruzi n’abashoferi b’amakamyo bifuza gukora ingendo zambukiranya imipaka bagomba kwipimisha mbere yo gutangira ingendo zabo, bagahabwa icyemezo cy’uko batarwaye COVID-19 mu masaha atarenze 120 mbere yo guhaguruka.

Abacuruzi n’abashoferi b’amakamyo yambukiranya imipaka basabwa kudakoresha uburyo bwo kwipimisha buzwi nka Rapid text.

Itangazo rikomeza riti “Igipimo cyemewe ni icya SARS-CoV2 Real Times Poymerase Chain Reaction, (RT-PCR) cyafashwe byibuze mu masaha 120, ni ukuvuga iminsi itanu y’urugendo mbere y’urugendo ibindi bipimo ntibyemewe.”

MININFRA kandi isobanura ko ibyemezo byerekanwa ari ibyafatiwe mu bigo by’ubuzima byemewe na Minisiteri y’Ubuzima gusa. Ikindi ni uko uzajya afatwa atubahirije amabwiriza azajya ajyanwa ahabugenewe kandi akiyishyurira ikiguzi kirebana n’urugendo, ibizamini n’ibindi byose bimugendaho.

Leta yashyize imbaraga mu gupima abinjira n’abasohoka mu gihugu hagamijwe gukomeza kugenzura no gukumira ikwirakwira ry’icyorezo cya Coronavirus.

IGIHE yamenye ko inzego zitandukanye ziri kwiga ku buryo abazajya barenga kuri aya mabwiriza bazajya bacibwa amande y’amafaranga.

Kuva COVID-19 iterwa n’agakoko ka Coronavirus igaragaye mu Rwanda hamaze gufatwa ibipimo 931 150, byasanzwemo 16 941 bamaze kwandura mu gihe 13 389 bayikize.

Abagera ku 3323 ni bo bari gukurikiranirwa mu ngo zabo mu gihe abandi bari kwitabwaho kwa muganga. Abantu bamaze guhitanwa n’iki cyorezo ni 229 mu gihe abarwayi barembye ari 18.

Abacuruzi n’abashoferi b’amakamyo yambukiranya imipaka bagiye kujya babanza gupimwa COVID-19. Iyi foto yafashwe yerekana imodoka zambukaga Umupaka wo ku Rusumo ziterwa imiti yica Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .