Abacuruzi basabye ubuvugizi ngo boroherezwe kwishyura ubukode bw’inzu kubera Covid-19

Yanditswe na Mukahirwa Diane
Kuya 20 Gashyantare 2021 saa 09:28
Yasuwe :
0 0

Kuva Coronavirus yagera mu Rwanda ibikorwa byinshi byarangiritse bitewe nuko ingamba zo kuyirinda zigongana na bimwe mu bikorwa,urugero ni nk’aho abikorera bagomba gufunga ibikorwa ku masaha yagenwe.

Gufunga ibikorwa by’abikorera byatewe n’ubwiyongere bwinshi bwa Covid-19 mu Mujyi wa Kigali, bituma hashyirwaho ingamba zidasanzwe zo kwirinda iki cyorezo zirimo no gutaha kare.

Abakora ubucuruzi mu Mujyi wa Kigali bo bavuga ko kwirinda bikwiye ariko ko nabwo babangamiwe no gutaha saa kumi n’imwe kandi badakora iminsi yose,bakaba basaba PSF kubasabira abo bakodesha amazu kuborohereza mu budoke.

Umucuruzi w’inyama n’amafi, Kubwimana Thiery yavuze ko babangamiwe no gutaha kare ndetse no kudakora iminsi yose kuko bituma ibicuruzwa byabo byangirika kandi ntibabone abakiriya nkuko bisanzwe.

Ati “Hano mu isoko dukora igice ukaza none ejo ugasiba wanaza ugataha saa kumi n’imwe. Nkatwe ducuruza ibintu bipfa iyo biraye bihita bipfa tukaba turahombye kuko ntuba uri bugaruke mu gitondo ngo ubihereho.”

“Urumva icyo gihombo tuba tugize kandi aya masaha dutahira nta bakiriya baba baboneka,ukwezi kwashira ba nyiri inzu bakatwaka amafaranga nk’ayo twatangaga kera kandi ubu nta bakiriya. Turasaba ko batugabanyiriza byibuze.”

Ibi bibazo abihuje na Bamurange Azela ucuruza imyenda uvuga ko kubera gutaha kare batabona abakiriya bakaba basaba ko ababakodesha amazu kuborohereza kuko nabo ntacyo bakibona.

Ati “Umuntu araza akirirwa yicaye nta bakiriya kuko abantu bazaga barangije akazi saa kumi n’imwe. Ubu tuba twafunze nta bakiriya. Twasabaga PSF kuba yatuvugira kuri ba nyiri inzu bakaba batworohereza mu bukode kuko buratugoye cyane.”

Urwego rw’abikorere (PSF) rwatanze inama yo kuba bakwegera abakozi bayo babegereye bakaba babafasha guhura na banyiri inzu bakaganira uburyo bakomeza ibikorwa byabo bose hatagize uhombye.

Umuvugizi w’Urugaga rw’Abikorera mu Rwanda, PSF, Ntagengerwa Théoneste yagize ati “Buriya na bariya bafite inzu nabo bavuga ko buriya aribwo bucuruzi bwabo kandi ko nabo batajenjeka kuko abenshi inzu ziba zikiri mu myenda bakeneye kuyishyura.”

“Igikwiye kubaho rero abacuruzi begere inzego za PSF zibegereye zibafashe guhura na binyiri inzu baganire bumvikane uburyo buri wese ashobora gukomeza gukora hatagize ubihomberamo.”

Yavuze ko ubwo buryo bushobora kugira icyo bafasha kuko no mu mwaka ushize ubwo habagaho guma mu rugo ya mbere,habayeho kumvikana hagati y’abacuruza naba nyiri mazu.

Abacuruzi bo mu Mujyi wa Kigali barasaba ba nyir'inzu kuborohereza ubudoke

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .