00:00:00 IGIHE NETWORK KN KINYARWANDA EN ENGLISH FR FRANCAIS

U Budage: Himbaza yateguye imurika ry’amafoto y’ibyiza by’u Rwanda

Yanditswe na IGIHE
Kuya 1 Ugushyingo 2021 saa 02:54
Yasuwe :
0 0

Himbaza Pacifique ufite ubuhanga budasanzwe mu gufata amafoto yisunze abafatanyabikorwa batandukanye mu gutegura imurikagurisha ry’amafoto, amajwi n’amashusho rizibanda ku bikorwa bigamije gushaka ibisubizo ku kibazo cy’ingufu.

Iri murika ryibanda ku bikorerwa mu Rwanda, riteganyijwe kubera ku Cyicaro cya Ambasade y’u Rwanda mu Budage iri mu Mujyi wa Berlin guhera ku wa 1 - 5 Ugushyingo 2021.

Himbaza amaze imyaka irenga 10 afotora, ibikorwa bye abimurikira muri ‘Inganzo Art Café’, inzu imurikirwamo ikanagurishirizwamo amafoto n’ibindi bihangano bitandukanye.

Yabwiye IGIHE ko akoresha uburyo butandukanye mu kugeza ibyo bihangano ku babikeneye.

Yakomeje ati “Nkoresha imbuga nkoranyambaga mu gushyikiriza ibihangano byanjye abo bigenewe ndetse no gukora imurika nkerekana ibyo nkora, nkanacuruza amafoto.’’

Aha ni ho havuye igitekerezo cyo gukorana na Kaminuza y’u Rwanda n’abafatanyabikorwa batandukanye, hanozwa gahunda yo gufata amafoto, akazerekanirwa kuri Ambasade y’u Rwanda mu Budage.

Ni amafoto yerekana umwihariko w’u Rwanda mu cyerekezo rwihaye cyo kubaka ubukungu bushingiye ku ngufu zitangiza.

Ambasaderi w’u Rwanda mu Budage, Igor Cesar, yashimye igitekerezo cyo kumurika ibihangano bifite umwihariko Nyarwanda.

Yagize ati “U Rwanda twishimiye cyane kwakira iri murika. Ni amahirwe yo kwerekana ibikeneye gukorwa mu rwego rw’ingufu ku buryo biganirwaho n’impande zose harimo n’Abadage.’’

Yakomeje avuga ko iyi ngingo ari ingenzi cyane kuko yashyizwe ku meza y’ibiganiro mu Nama ku Ihindagurika ry’Ikirere izwi nka COP26 iteraniye mu Mujyi wa Glasgow muri Écosse.

Iri murika ryateguwe ku bufatanye na Kaminuza y’u Rwanda biciye mu Kigo cyayo cyigisha Ibijyanye n’Ingufu hagamijwe Iterambere rirambye (African Centre of Excellence in Energy for Sustainable Development, ACE-ESD), Technische Universität Berlin, TUB Institute for Energy Engineering na HEDERA Sustainable Solutions.

Byitezwe ko muri iri murika amafoto, amajwi n’amashusho bizifashishwa mu kugaragaza bimwe mu bikorwa n’abafatanyabikorwa mu gushaka ibisubizo ku bibazo by’ingufu zaba ingufu karemano ndetse n’ingufu zisubira (renewable energy).

Ryateguwe ku buryo hazumvwa ubuhamya bw’abagenerwabikorwa basobanura umumaro babona mu bikorwa bitandukanye by’abafatanyabikorwa mu iterambere ry’ingufu mu Rwanda.

Rizajya riba isaha imwe buri munsi, kuva ku wa 1 Ugushyingo 2021, umunsi ritangizwaho ku mugaragaro.

Himbaza Pacifique asanzwe afite umushinga yise ‘Inganzo Art Café’, ugizwe na studio irimo ahatunganyirizwa indirimbo n’ahagurishirizwa amafoto mu Mujyi wa Kigali.

Abinyujije mu kigo yashinze cya Color Play Ltd, Himbaza Pacifique arateganya gukomereza mu bihugu birimo u Bubiligi n’u Bufaransa yerekana ibyiza bitatse u Rwanda biciye mu mafoto.

Himbaza Pacifique ashyikiriza Ambasaderi w’u Rwanda mu Budage, Igor Cesar, bimwe mu bihangano byavuye mu mafoto yafashe
Himbaza Pacifique yeretse Ambasaderi Igor Cesar ibihangano byose bizerekanwa mu imurikagurisha ry'amafoto i Berlin
Himbaza Pacifique yateguye imurika ry’ibihangano by’umwihariko Nyarwanda ribera mu Mujyi wa Berlin mu Budage
Ibi bihangano bizamurikirwa mu nyubako ikoreramo Ambasade y'u Rwanda mu Budage
Ibi bihangano bifite umwihariko wo kwerekana ibikorerwa mu Rwanda n'imbaraga Leta yabishyizemo
Himbaza Pacifique afite ubuhanga budasanzwe mu gufata amafoto kuva mu myaka isaga icumi ishize
Himbaza Pacifique yakusanyije amafoto atandukanye agaragaza umwihariko w'ibikorerwa mu Rwanda
Imurikagurisha ry'amafoto n'amashusho byibanda ku bikorerwa mu Rwanda ryabereye ku Cyicaro cya Ambasade y’u Rwanda mu Budage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .