00:00:00 IGIHE NETWORK KN KINYARWANDA EN ENGLISH FR FRANCAIS

Mu mafoto: Ibyaranze iminsi ibiri ya Perezida Kagame mu nama ya G20

Yanditswe na Iradukunda Serge
Kuya 1 Ugushyingo 2021 saa 07:51
Yasuwe :
0 0

Ku Cyumweru tariki 31 Ukwakira 2021, nibwo hasojwe inama y’iminsi ibiri y’ibihugu bya mbere 20 bikize ku Isi, G20. Ni Inama yari yanatumiwemo Perezida w’u Rwanda Paul Kagame nk’uhagarariye Ihuriro ry’Ibihugu bya Afurika rigamije Ubufatanye mu Iterambere, NEPAD.

Muri iyi nama y’iminsi ibiri Perezida Kagame yatanze ibiganiro ku ngingo zitandukanye. Ku munsi wa mbere wayo, mu ijambo rye, Perezida Kagame yagaragarije ibihugu bikize ibyo byafasha mu guhangana na Covid-19.

Icya mbere ni uko inkingo zakwizwa mu bihugu bikennye ku buryo intego y’uko 70% by’abatuye Isi yose baba bamaze gukingirwa Covid-19 mu 2022 hagati yagerwaho.

Ikindi kintu Perezida Kagame yavuze gikenewe, ni uko ubushobozi bw’ibihugu mu gukingira bwakongerwa naho icya gatatu yakigize ikorwa ry’inkingo.

Ku munsi wa kabiri Perezida Kagame yavuze ku ngingo ebyiri, imwe ijyanye n’imihindagurikire y’ibihe n’ibidukikije, mu gihe indi yagarutse ku iterambere rirambye.

Mu bijyanye n’imihindagurikire y’ibihe, Perezida Kagame yagaragaje ko nubwo Afurika atari yo irekura imyuka myinshi ihumanya ikirere, yiteguye gufatanya n’Isi yose mu gushakira iki kibazo igisubizo ndetse asaba ibihugu bikize gusohoza intego byihaye yo guha amafaranga ibikiri mu nzira y’amajyambere mu guhangana n’ingaruka z’imihindagurikire y’ibihe.

Ku ngingo y’iterambere rirambye, Perezida Kagame yasabye ibihugu bikize ku Isi, kongera imbaraga mu buvugizi no gutera inkunga ibihugu bikiri mu nzira y’amajyambere byashegeshwe na Covid-19 kugira ngo byongere kuzahuka bisubire mu nzira y’iterambere.

Uretse mu birebana n’iyi nama, Perezida Kagame ni n’umwe mu bakuru b’Ibihugu bya Afurika bakiriwe na Perezida w’u Bufaransa Emmanuel Macron.

Perezida Macron yakiriye aba bakuru b’ibihugu ku mugoroba wo ku wa Gatandatu, mu nama yabereye mu nyubako ya Palazzo Farnese isanzwe ikoreramo Ambasade y’u Bufaransa mu Butaliyani.

Iyi nama yahuje abakuru b’ibihugu bya EU-AU yaganiriwemo imyiteguro y’inama izahuza imiryango yombi mu mwaka utaha wa 2022.

Perezida Kagame kandi yagize umwanya wo kuganira n’abandi bantu batandukanye barimo Umuyobozi w’Ishami ry’Umuryango w’Abibumbye ryita ku buzima, Dr Tedros Adhanom Ghebreyesus; Umuyobozi Mukuru w’Umuryango Mpuzamahanga w’Ubucuruzi, Ngozi Okonjo-Iweala na Minisitiri w’Intebe wa Singapore, Lee Hsien Loong.

Perezida Kagame ni umwe mu bayobozi bo muri Afurika batumiwe muri iyi nama
Perezida Kagame yatumiwe muri iyi nama nk’uhagarariye Ihuriro ry’Ibihugu bya Afurika rigamije Ubufatanye mu Iterambere, NEPAD
Aha hari ku munsi wa kabiri Perezida Kagame yitabira iyi nama
Perezida Kagame ubwo yakirwaga na Minisitiri w'Intebe w'u Butaliyani, Mario Draghi
Angela Merkel uyobora u Budage aganira na Perezida Kagame
Mu bo Perezida Kagame yabonanye nabo harimo n'Umuyobozi wa OMS, Dr Tedros Adhanom Ghebreyesus
Perezida Kagame aganira na Minisitiri w'Intebe wa Singapore, Lee Hsien Loong
Perezida Kagame aganira n'Umuyobozi wa Komisiyo ya AU, Moussa Faki Mahamat
Perezida Kagame aganira na mugenzi we wa Repubulika Iharanira Demokarasi ya Congo, Félix Antoine Tshisekedi
Perezida Kagame yaganiriye n’Intumwa Idasanzwe y’Umunyamabanga Mukuru wa Loni ku Bukungu budaheza mu Iterambere, Umwamikazi Máxima w’u Buholandi.
Perezida Kagame yagiranye ibiganiro n'Umuyobozi Mukuru w'Umuryango Mpuzamahanga w'Ubucuruzi, Ngozi Okonjo-Iweala
Perezida Kagame aganira na mugenzi we w'u Bufaransa, Emmanuel Macron
Perezida Kagame asuhuzanya na Emmanuel Macron uyobora u Bufaransa
Perezida Kagame ni umwe mu bakuru b’Ibihugu bya Afurika bakiriwe na Perezida w’u Bufaransa, Emmanuel Macron
Muri iyi nama Perezida Kagame yavuze imbwirwaruhame ku ngingo zitandukanye
Iyi nama yari yitabiriwe n'Ibihugu 20 bikize ku Isi ndetse n'abatumirwa batandukanye
Perezida Kagame yahuye kandi na Charles Michel uyobora Akanama k’Umuryango w’Ubumwe bw’u Burayi
Perezida Kagame yitabiriye umusangiro wateguwe na Perezida w’u Butaliyani, Sergio Mattarella
Perezida Kagame yari yicaye yegeranye na Lee Hsien Loong
Abari muri iyi nama bafashe ifoto y'urwibutso

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .