00:00:00 IGIHE NETWORK KN KINYARWANDA EN ENGLISH FR FRANCAIS

Inkotanyi cyane! Dore urugamba ngo rurahinda (Amafoto)

Yanditswe na Philbert Girinema
Kuya 4 Nyakanga 2021 saa 05:46
Yasuwe :
0 0

Twaje Inkotanyi z’amarere, intwari ku rugamba, twaje u Rwanda turwubake… indirimbo zirimo amagambo nk’ayo, ziherekejwe n’amashyi y’urufaya n’akaruru nizo zumvikanaga mu Mujyi wa Kigali ku wa Mbere tariki ya 04 Nyakanga 1994 ubwo FPR Inkotanyi yabohoraga igihugu.

Ni urugendo rw’imyaka ine rwarimo ibizazane byinshi, rwaguyemo abasore bakiri bato benshi banze ko amaraso yabo apfa ubusa, bagahitamo kuyaha igihugu.

Benshi mu bari muri uru rugamba, bari barakuriye i mahanga mu buhingiro aho bacunaguzwaga bitwa ko “ba kanyarwanda” mu kubapfobya ko aho bari atari ku butaka bwabo, mu gihe iwabo bwite bitwaga ’Abanyamahanga’ ari nacyo cyatumye bafata umuheto.

Urugamba rwo kubohora igihugu rwatangiye nta bufasha na bumwe, bamwe aho bari mu gisirikare cya Uganda babura uko bavayo gusa umwe ku wundi bagerageza gutoroka ku buryo hari n’aburiye amakamyo y’imyaka bakajya hagati y’imifuka bakayavamo benda guhera umwuka ariko ’u Rwanda rutabarwe’.

Amafoto 70 akurikira, akubiyemo ibihe by’ingenzi byaranze urugamba rwo kubohora igihugu, guhera ku myitwarire yarangaga ingabo irimo ubusabane, n’ibindi bituma bagumisha umutima hamwe.

Ni amafoto azamura amarangamutima ya benshi bitewe n’ubwitange bwaranze urubyiruko rwari muri urwo rugamba.

Benshi mu basirikare ba FPR bari urubyiruko. Aha aba bafotowe ku wa 26 Gicurasi 1994 bari mu nzira bagana mu Mujyi wa Kigali
Ingabo za RPA ubwo zari i Kagitumba ku wa 22 Ukwakira 1990 mu ntangiriro z’urugamba rwo kubohora igihugu
Aba basirikare ba FPR bafotowe bari ahantu mu rutoki mu Mujyi wa Kigali mu gihe cy'urugamba rwo kubohora igihugu
Aha ni Ingabo za RPA ziri i Nyamata. Ku rugamba zabaga zifite uturadiyo tuzifasha kumenya amakuru y’uko urugamba rumeze. Radio Muhabura niyo zumvaga
Gen Maj Paul Kagame yakundaga kuvugana n'itangazamakuru agaragaza ko icyo ingabo ze zishaka ari ukugira uburenganzira ku gihugu, ko zigamije kurengera abanyarwanda bamaze imyaka myinshi bameneshwa
Ubwo Ingabo za RPA zahagurukaga ku Mulindi zerekeje muri CND
Hafi ya bose mu basirikare ba RPA babohoye u Rwanda, bari bakiri urubyiruko ubwo bajyaga ku rugamba. Bemeye guhara amashuri n'ubuzima buzira imihangayiko, maze bafata urugendo rwari rugoye ariko rwaganishije aheza u Rwanda
RPA yahereye ku busa, nta bikoresho, ntaho gukorera, ariko birangira igeze ku ntsinzi kubera kurwanira ukuri
Aho babaga bari hose barangwaga na morali. Aha ni hamwe mu ho ingabo za RPA zari muri morale mu masaha y'ijoro zimurikiwe n'itara rya peteroli
Morali ni kimwe mu byabongereraga imbaraga ntibite ku nzitizi ziri mu rugamba cyangwa ku kuba bagenzi babo batakaje ubuzima
Gen Major Paul Kagame byabaye ngombwa ko acikiriza amasomo ye, maze ava muri Leta Zunze Ubumwe za Amerika ayobora urugamba rwo kubohora igihugu kandi ingabo ze zirarutsinda
Bamwe mu basirikare ba RPA bari abarinzi ba Gen Major Paul Kagame barimo Mugisha Pepekale, Happy Ruvusha, James Kabarebe, Alex Kagame, Charles Kayonga na John Gasana wicaye
Nyuma yo kubohora igihugu hatangiye urugendo rwo kucyubaka, ubu ibintu byarahindutse, ahazwi nko kwa Lando ni uku hasaga ariko ubu huzuye imiturirwa
Rtd Col Ludovic Dodo Twahirwa wambaye ingofero itukura ni umwe mu bari bazi gushushanya uko urugamba rugomba kugenda
Amanywa n'ijoro babaga bari kwiga amayeri bakoresha kugira ngo babashe gutsinda urugamba, barokore abatutsi bicwaga umusubirizo
Bemeye guhara ubusore bwabo, biyemeza kujya gutabarira igihugu
Ingabo za RPA ubwo zageraga kuri CND ku Kimihurura ku Nteko Ishinga Amategeko maze zikarokora abatutsi hamwe n'abanyapolitiki ba FPR bari bahari
Lt. Gerald Mbanda (usigaye ari Umuyobozi ushinzwe Iterambere ry’Itangazamakuru mu Rwego rw’Igihugu rushinzwe Imiyoborere, RGB) ari kumwe na bagenzi be bakoraga kuri Radio Muhabura yari ishamikiye kuri RPA
Gen Maj Paul Kagame ari kumwe n’abandi banyamuryango ba FPR barimo n’abanyapolitiki nka Tito Rutaremara (iburyo)
Gen Maj Paul Kagame ubwo yarahiriraga inshingano zo kuba Minisitiri w'Ingabo nyuma yo kubohora igihugu
Nyuma y'urugamba rwo kubohora igihugu, Ingabo za RPA zakomeje ibikorwa byazo by'ubumuntu, zigashakisha ahari abarokotse bakavanwa aho bari bihishe, bakitabwaho
Ingabo za RPA ntizigeze ziheza impunzi zagiye zizigana
Kuva ku munsi wa Mbere, RPA yari ifite itsinda rifasha abandi basirikare gususuruka
Iyi ntama yari ifite batayo ibarizwamo, iyigumamo kugeza yishwe
Ingabo za RPA ubwo zari zimaze gufata Ikibuga cy'Indege cya Kigali
Gen Maj Paul Kagame ubwo yari ku Rusumo mu minsi ya mbere y'urugamba rwo kubohora igihugu
RPA yarwanaga urugamba inarokora Abatutsi bahigwaga, abageze mu maboko yayo bakiruhutsa
RPA yakajije urugamba kugeza Kigali ifashwe maze itangaza intsinzi
Bamwe mu basirikare ba RPA bakoraga kuri Radio Muhabura ubwo bari bicaye hanze bafata akaruhuko
Bamwe mu basirikare ba RPA barwanye urugamba rwo kubohora igihugu
Imigano yo mu Birunga yafashije ingabo za RPA kwigaranzura bikomeye ingabo za FAR
Bari bafite za mudasobwa nke bifashishaga mu kwandika cyangwa se mu gutanga amakuru nubwo zari nke
Rtd captain Daphrosa Intaramirwa ni umwe mu barwanye urugamba rwo kubohora igihugu, rwaranzwe n'ubutwari n'impuhwe za kibyeyi. Aha yari ateruye umwana wari umaze kurokorwa
Uyu musirikare ni umwe muri benshi bakoze ibikorwa by’ubutwari, bakarokora ubuzima bwa benshi uhereye ku bana bato. Aha hari i Kabgayi ku wa 25 Gicurasi 1994
Iyi foto yo ku wa 4 Nyakanga 1994 aho Umugaba Mukuru w'Ingabo za APR, Gen Maj Paul Kagame (uwo ibara ry’ubururu ryerekeyeho), ari kumwe n’abandi basirikare bari bageze mu Mujyi wa Kigali rwagati
Mu gihe cy'urugamba rwo kubohora igihugu, byari bigoye kubona n'aho abaganga bavurira inkomere ku buryo bikingaga mu gihuru
Gen James Kabarebe ni umwe mu basirikare barwanye urugamba rwo kubohora igihugu, bagakomeza n'urw'iterambere ryarwo kugeza ubu
Ingabo za RPA ntizari zifite ibikoresho bizibashisha guhangana n'umwanzi ariko zari zifite ibitekerezo bizibashisha kugera kure
Mukotanyi, ni impuzankano ifatwa nk'iy'amateka adasanzwe mu Rwanda
Abakobwa bemeye guhara ubukumi bwabo biyemeza kwitangira igihugu
N'ibikomere ntibyababuzaga gukomeza urugamba
Iyi foto yafashwe nyuma gato yo guhagarika Jenoside yakorewe Abatutsl. Aha umusirikare wa FPR Inkotanyi yari i Kanombe aganira n'abasirikare ba Amerika bari mu Rwanda
Aba basirikare ba FPR bafotowe bari ahantu mu rutoki mu Mujyi wa Kigali mu gihe cy'urugamba rwo kubohora igihugu
Nta mikoro bari bafite ku buryo urugamba rwose barurwanye bapfundikanya ubushobozi. Aha bari mu nzira zigana mu Mujyi wa Kigali, bamwe bikoreye udusanduku dutwarwamo amasasu
Iyo foto igaragaza umusirikare wa FPR Inkotanyi ari mu nkengero za Byumba ahari imbunda ya Machine gun. Hari ku wa 17 Mata 1994
Uyu musore ukiri muto, ni umwe mu bemeye guhara ubusore bwabo bagahitamo kwitangira igihugu. Aha yafotorewe i Byumba ku wa 7 Mata 1994
Uyu yafotorewe i Byumba nyuma gato y’ihanurwa ry’indege ya Habyarimana
Uyu musirikare yafotorewe hafi y’i Nyanza mu ntangiriro za Kamena. Yari afite agasanduku karimo amasasu
Ubwo Ingabo za FPR Inkotanyi zari zimaze gufata Umujyi wa Kigali nibwo ubuzima bwashushe n’ubugaruka mu gihugu
Iyi foto ya Gen Maj Paul Kagame yafashwe ku wa 11 Gicurasi 1994 ari i Byumba. Icyo gihe yari mu nama na Jose Ayala Lasso wari ukuriye ishami rya Loni rishinzwe uburenganzira bwa muntu
Ku wa 02 Kamena 1994 ubwo Ingabo za RPA zari mu rugendo mu nzira zigana i Nyanza. Icyo gihe zarwanye inkundura n’ingabo za FAR
Uyu musirikare wa FPR yari ari kunyura mu nzira muferege wari waracukuwe wifashishwaga nk'inzira. Aha ni i Byumba
Ibikoresho bike bari bafite, babikoresheje kimwe mu bikorwa by'ubutwari mu mateka y'u Rwanda
Iyi foto yafatiwe mu Majyepfo y’u Rwanda ubwo ingabo za RPA zari zirimbanyije urugamba rwo kubohora igihugu. Ahantu henshi zagendaga n’amaguru kubera kubura ubushobozi
Bamwe mu basirikare ba RPA bafotowe bahagaze kuri umwe mu mihanda y’i Kigali ku wa 26 Gicurasi 1994
Uyu musirikare wa RPA yafotorewe i Byumba mu ntangiriro za Mata 1994
Barwanye urugamba bafite icyizere ko bazarutsinda ku buryo ibyo ubwabyo byabongereraga akanyamuneza mu mutima
Umunsi ku wundi nubwo babaga bari mu bizazane, morale yabaga iri hejuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .