Ibyishimo byasendereye ibihumbi by’abitabiriye itahwa rya Kigali Arena (Amafoto)

Yanditswe na Philbert Girinema
Kuya 9 Kanama 2019 saa 04:11
Yasuwe :
0 0

Abanyakigali baganuye ku nshuro ya mbere Stade y’akataraboneka igenewe imikino y’intoki n’ibitaramo ya Kigali Arena; basazwe n’ibyishimo ndengakamere kubera iyi ntambwe u Rwanda rwateye.

Ahagana saa saba z’amanywa nibwo aba mbere batangiye kwinjira muri iyi nyubako, umubare munini ni urubyiruko rwiga mu mashuri yisumbuye, aho bamwe bagaragazwa n’impuzankano y’ishuri.

Ubarebye ku maso, ubona ko abenshi ari abasore n’inkumi bihebeye imikino y’intoki ku buryo ari umunezero kuri bo kubona ikibuga mpuzamahanga bashobora kuzajya berekaniraho impano zabo.

Akanyamuneza ni kose kuri buri wese witabiriye uyu muhango wo kumurikira Kigali Arena. Mbere y’uko umuhango nyir’izina utangira, abari muri iyi nyubako basusurukijwe n’abahanzi batandukanye barimo nka Charly na Nina ndetse n’itsinda rikunzwe muri iki gihe mu njyana ya Hip Hop rya KinyaTrap.

Kapiteni wa APR BBC yatsinzwe na Patriots BBC muri ½ cya Playoffs, Ishimwe Parfait, yabwiye IGIHE ko bishimishije kuba u Rwanda rufite iyi nzu y’imikino ndetse yemeza ko abakinnyi bayitashye ku mugaragaro hari icyo barusha abandi.

Ati” Birashimishije kuba dufite ikibuga nk’iki noneho kiri mu rugo iwacu. Hari amakipe yo hanze azajya aza twipime na yo.”

“Nishimiye bagenzi banjye babashije kugera ku mukino wa nyuma bakaba bafunguye Kigali Arena. Natwe twaje kubatera ingabo mu bitugu no kubafana gusa ndakeka ari byiza kuri bo kuba batashye iyi Stade y’umwahariko kandi y’Ikitegererezo, bafite icyo baturusha.”

Umwe mu bitabiriye uyu muhango wo gutaha Kigali Arena, Ndikumana Cyprien, umunyeshuri muri Kepler University na we yabwiye IGIHE ko yashimishijwe no kubona iyi nzu y’imikino.

“Nkiyibona natangaye kuko urabona ko ari nini. Ubusanzwe nkunda Basketball kandi bizanshimisha nindamuka nyikiniyemo. Abenshi byabatunguye ariko buri wese yakoze uko ashoboye kugira ngo aze hano.”

U Rwanda rwahisemo kubaka iyi mikino kugira ngo ruzajye rwakira amarushanwa mpuzamahanga, inama zikomeye, ibitaramo n’ibindi bikorwa bihuriza hamwe abantu benshi.

Ibihumbi by'abakunzi b'imikino y'intoki byitabiriye uyu munsi wo gufungura Kigali Arena
Abahanzi batandukanye nabo bitabiriye ibi birori. Ku ifoto ni Tonzi na Makanyaga Abdul nka bamwe mu bashobora kwifashisha iyi nyubako mu bitaramo
Umuyobozi w'ishyirahamwe ry'umukino wo gusiganwa mu modoka, Gakwaya Christian, nawe yitabiriye
BK itera inkunga umukino wa Basketball mu Rwanda iriganje cyane muri stade mu mabara
Abayobozi batandukanye bitabiriye bitabiriye uyu muhango
Abasore bo muri Kinyatrap bashimishije abantu muri Kigali Arena

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza