00:00:00 IGIHE NETWORK KN KINYARWANDA EN ENGLISH FR FRANCAIS

Himbaza yasangije abo mu Budage amafoto agaragaza iterambere ry’u Rwanda mu gukoresha ingufu zitangiza

Yanditswe na IGIHE
Kuya 7 Ugushyingo 2021 saa 09:34
Yasuwe :
0 0

Umuhanga mu gufata amafoto, Himbaza Pacifique, yamuritse amafoto n’amashusho agaragaza iterambere ry’u Rwanda mu gukoresha ingufu, mu imurika ryabereye mu Budage.

Iri murika ryabereye ku Cyicaro cya Ambasade y’u Rwanda kiri mu Mujyi wa Berlin mu Budage ku wa 1 - 5 Ugushyingo 2021.

Himbaza umaze imyaka irenga 10 afotora yagize igitekerezo cyo kumurika amafoto mu kugaragaza ko u Rwanda rufite ibyiza byakwizihira abarugana bitari ubukerarugendo gusa.

Yabwiye IGIHE ko iri murikagurisha ryitabiriwe n’abantu batandukanye ariko hubahirizwa amabwiriza yo kwirinda ikwirakwira rya COVID-19.

Yakomeje ati “Nabonye ko u Rwanda rufite ibintu byinshi byo kwerekana mu mafoto bitari mu bukerarugendo gusa. Ibi birimo n’uburyo Abanyarwanda bari kubaho mu buzima bugezweho.’’

Himbaza yavuze ko atorohewe no guhitamo ingingo azibandaho mu kumurika amafoto kuko ari ubwa mbere yari yinjiye mu bijyanye n’ingufu.

Mu mafoto yerekanye harimo agaragaza iterambere ry’ubwikorezi mu Rwanda kuva ku gukoresha igitogoto, igare, imodoka zikoresha lisansi kugera ku binyabiziga bikoresha amashanyarazi.

Yagize ati “Nka gafotozi guhitamo iyi ngingo bisaba igihe kidasanzwe kuko ntari nsanzwe mbyitaho cyane. Natanze ingero ku iterambere ry’ubwikorezi mu Rwanda aho twavuye ku gitogotogo none tukaba tugeze ku magare ya Guraride.’’

Yanasobanuye uko u Rwanda rwateye imbere mu gukoresha ibicanwa bitangiza ikirere ndetse n’amashanyarazi adafatiye ku muyoboro mugari muri Kigali ndetse no mu mijyi iyunganira.

Imibare igaragaza ko mu Rwanda kugeza ubu ingo zifite amashanyarazi muri rusange zisaga 65.4% harimo izikoresha afatiye ku muyoboro mugari n’izikoresha adafatiye ku muyoboro mugari yiganjemo akomoka ku mirasire y’izuba.

Himbaza yakomeje ati “Ntibemeraga kwemera ko ibintu naberetse ari ibyo mu Rwanda. Abadusuye bagaragaje inyota yo kuza mu Rwanda. Batangajwe n’ikoranabuhanga riri mu Rwanda kugera no ku gukoresha imodoka na moto zikoresha amashanyarazi.’’

Imurika yateguye ryafunguwe n’abanyacyubahiro barimo Ambasaderi w’u Rwanda mu Budage, Igor Cesar n’abandi barimo Prof Dr Tetyana Marazyuk wa TU Berlin, Kai Franke wa DAAD, Dr Charles Kabiri uyobora African Center of Excellence in Energy for Sustainable Development mu Kaminuza y’u Rwanda.

Ambasaderi Igor Cesar yabwiye abitabiriye iki gikorwa ko mu Rwanda ari ahantu heza ho kuba muri Afurika.

Yasobanuye inkomoko y’izina u Rwanda ryavuye ku nshinga kwanda cyangwa kwaguka.

Ati “Izina ryerekana ko Abanyarwanda bafite amateka menshi kandi batekereza cyane.’’

Himbaza afite ibikorwa anyuza muri ‘Inganzo Art Café’, inzu imurikirwamo ikanagurishirizwamo amafoto n’ibindi bihangano bitandukanye. Iyi nzu igizwe na studio irimo ahatunganyirizwa indirimbo n’ahagurishirizwa amafoto mu Mujyi wa Kigali.

Abinyujije mu kigo yashinze cya Color Play Ltd, Himbaza Pacifique arateganya gukomeza gukorera imurikagurisha mu bihugu birimo u Bubiligi n’u Bufaransa yerekana ibyiza bitatse u Rwanda biciye mu mafoto.

Imurika yakoreye mu Budage, yariteguye ku bufatanye na Kaminuza y’u Rwanda biciye mu Kigo cyayo cyigisha Ibijyanye n’Ingufu hagamijwe Iterambere rirambye (African Centre of Excellence in Energy for Sustainable Development, ACE-ESD), Technische Universität Berlin, TUB Institute for Energy Engineering na HEDERA Sustainable Solutions.

Amafoto y’umunsi wo gutangiza imurika

Ambasaderi w’u Rwanda mu Budage, Igor Cesar, yabwiye abitabiriye imurika ko u Rwanda ari igihugu kibereye gusurwa
Iri murika ryabereye muri Ambasade y'u Rwanda mu Budage
Himbaza Pacifique yasobanuye aho yavanye igitekerezo cyo kumurika amafoto agaragaza ingamba z'u Rwanda mu gukoresha ingufu
Himbaza yerekana amwe mu mafoto yafashe
Iri murika ryateguwe n'abafatanyabikorwa batandukanye

Abageze aho imurika ryabereye beretswe amafoto atandukanye

Ambasaderi w’u Rwanda mu Budage, Igor Cesar, asobanurira abitabiriye imurika amwe mu mafoto agaragaza ibyiza by'u Rwanda
Ambasaderi Igor Cesar aha yerekanaga amafoto arimo inyubako ya Kigali Convention Centre iri mu zakirirwamo inama zikomeye mu Rwanda
Abitabiriye imurika bubabihirije amabwiriza yo kwirinda COVID-19
Himbaza Pacifique na we yarebaga ibihangano bye birimo amafoto, agenda asobanurira abasuye igisobanuro cyayo
Nyuma yo gusura bafataga ifoto y'urwibutso
Imurikagurisha ry'amafoto n'amashusho byibanda ku bikorerwa mu Rwanda ryabereye ku Cyicaro cya Ambasade y’u Rwanda mu Budage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .