00:00:00 IGIHE NETWORK KN KINYARWANDA EN ENGLISH FR FRANCAIS

Amafoto 100 y’uruzinduko rw’amateka rwa Perezida Samia mu Rwanda

Yanditswe na IGIHE
Kuya 5 Kanama 2021 saa 08:10
Yasuwe :
0 0

Tariki ya 2 n’iya 3 Kanama 2021 zinjiye mu mateka mashya y’umubano w’u Rwanda na Tanzania nyuma y’uruzinduko Perezida Samia Suluhu Hassan yagiriye mu rw’Imisozi 1000 rugamije kunoza imibanire y’ibihugu byombi.

Umubano w’u Rwanda na Tanzania warushijeho kujya mu murongo muzima mu 2015 ku ngoma ya nyakwigendera Dr John Pombe Magufuli, uwo Samia Suluhu Hassan yari abereye Visi Perezida.

Kuva icyo gihe ibihugu byombi byarushijeho guteza imbere imibanire ifitiye inyungu abaturage babyo byombi.

Uru rugendo rwo kunoza umubano ni rwo rwanashimangiwe mu ruzinduko rw’iminsi ibiri, Perezida Samia Suluhu yagiriye mu Rwanda.

Uyu Mukuru w’Igihugu yakandagiye ku butaka bw’u Rwanda mu gitondo cyo ku wa 2 Kanama 2021. Akigera ku Kibuga Mpuzamahanga cy’Indege cya Kigali i Kanombe yakiriwe na Minisitiri w’Ububanyi n’Amahanga, Dr Vincent Biruta.

Samia Suluhu yahise akomereza urugendo rwe muri Village Urugwiro aho yakiriwe na Perezida Kagame. Abakuru b’ibihugu bagiranye ibiganiro byihariye bigamije kunoza umubano w’impande zombi; banakurikiranye isinywa ry’amasezerano atandukanye arimo ay’ubufatanye mu ikoranabuhanga n’itumanaho; urujya n’uruza rw’abantu n’ibintu, uburezi n’amabwiriza agenga ibijyanye n’imiti.

Kuri uwo munsi kandi banatanze imbwirwaruhame zagarutse ku gushimangira umubano umaze guhama hagati y’u Rwanda na Tanzania.

Perezida Samia wari ufite umunsi urimo akazi kenshi ku mugoroba wo ku wa Mbere yasuye Urwibutso rwa Jenoside rwa Kigali ku Gisozi, yunamira inzirarengane zisaga ibihumbi 250 ziharukiye.

Umunsi we wa mbere yawusoreje muri Kigali Convention Centre aho yakiriwe ku meza na Perezida Kagame mu musangiro witabiriwe n’abayobozi bakuru mu bihugu byombi.

Perezida Samia w’imyaka 61 yasoje uruzinduko rwe ku wa Kabiri nyuma yo gutemberezwa mu Cyanya cyahariwe inganda i Masoro mu Mujyi wa Kigali aho we na mugenzi we w’u Rwanda, Paul Kagame basuye uruganda rwa Volkswagen n’urwa Mara Phones zombi zikorera muri aka gace.

Aba bakuru b’igihugu banasuye Inyange Industries, uruganda rutunganya, amata, imitobe n’amazi rukorera i Masaka. Aho banyuze hose basobanuriwe imikorere y’izo nganda n’uburyo yahinduye ubuzima bw’abaturage, aho cyatanze akazi ku barenga ibihumbi 13.

Perezida Kagame yavuze ko uruzinduko rwa Samia Suluhu rwasize hari imbaraga zongerewe mu mishinga ibihugu byombi bihuriyeho n’izindi nzego zitandukanye ibihugu byafatanyamo.

IGIHE yakusanyije amafoto ijana yerekana incamake y’iby’ingenzi byaranze uruzinduko rwa Perezida Samia mu Rwanda, urwa mbere rwe muri iki gihugu kuva agiye ku butegetsi muri Werurwe 2021.

Perezida Samia ubwo yageraga mu Rwanda

Ahagana saa Tatu zo ku wa Mbere, tariki ya 2 Kanama 2021, ni bwo Indege ya Air Tanzania, yagejeje Perezida Suluhu Hassan i Kigali
Yasuye u Rwanda mu ruzinduko rw'iminsi ibiri, ku butumiwe yahawe na Perezida Kagame
Ni uruzinduko rwa mbere, Perezida wa Tanzania, Samia Suluhu Hassan, yagiriye mu Rwanda kuva muri Werurwe 2021 agiye ku butegetsi aho yasimbuye nyakwigendera Dr John Pombe Magufuli
Minisitiri w'Ububanyi n'Amahanga, Dr Vincent Biruta, ni we wakiriye Perezida Samia Suluhu ubwo yageraga ku Kibuga Mpuzamahanga cy'Indege cya Kigali i Kanombe
Perezida Suluhu Hassan n'itsinda rye, bagiranye ibiganiro bigufi na Minisitiri w'Ububanyi n'Amahanga w'u Rwanda, Dr. Vincent Biruta, mbere yo kuva ku kibuga cy'indege cya Kigali
Perezida Suluhu Hassan yasinye mu gitabo cy'abashyitsi ku kibuga cy'indege cya Kigali
Nyuma y'ibiganiro bigufi, Minisitiri w'Ububanyi n'Amahanga w'u Rwanda, Dr. Vincent Biruta, yaherekeje Perezida Suluhu ku modoka yamukuye i Kanombe
Yahise akomereza muri Village Urugwiro ku Kacyiru
Yatwawe mu modoka yo mu bwoko bwa Range Rover isanzwe igendamo abanyacyubahiro basuye u Rwanda
Amabendera arimo iry'u Rwanda, EAC ba Tanzania yazamuwe mu kumuha ikaze

Yahise yakirwa na mugenzi we w’u Rwanda, Perezida Kagame muri Village Urugwiro

Perezida Kagame ategereje mugenzi we wa Tanzania, Samia Suluhu wavaga ku Kibuga Mpuzamahanga cy'Indege cya Kigali i Kanombe yerekeza ku Kacyiru muri Village Urugwiro
Perezida Kagame ubwo yakiraga Samia Suluhu muri Village Urugwiro. Basuhuzanyije bakoresheje inkokora nk'uburyo bwo gutanga urugero ku bandi ko bakwiye kwirinda ikwirakwira rya COVID-19
Yahise ajya kumwakirira muri Village Urugwiro aho bagiranye ibiganiro byihariye
Perezida Samia Suluhu yaherukaga mu Rwanda mu 2016, yari akiri Visi Perezida ku butegetsi bwa nyakwigendera Magufuli yaje no gusimbura
Bahise bakomereza aho yamwakiririye muri Village Urugwiro
Uruzinduko rwa Perezida Samia Suluhu rwashimangiye umubano umaze gushinga imizi hagati y'u Rwanda na Tanzania
U Rwanda rwabaye igihugu cya kane mu Karere, Perezida Samia yasuye; ni nyuma ya Uganda, Kenya n'u Burundi
Abakuru b'ibihugu byombi bashimangiye umubano uhuriweho bizeza gukomeza kuwubagarira ku buryo ugirira inyungu abaturage
Perezida Kagame na Samia ubwo haririmbwaga indirimbo zubahiriza ibihugu byombi
Uruzinduko rwa Perezida Suluhu i Kigali rwashimangiye imibanire myiza u Rwanda na Tanzania bisanzwe bifitanye
Perezida Samia Suluhu yakiriwe mu cyubahiro gikwiriye Umukuru w'Igihugu
Bahawe icyubahiro binyuze mu karasisi ka gisirikare ndetse n'amabendera arazamurwa...
Nk'uko bisanzwe, umuhango wo kwakira Perezida Suluhu wabaye hubahirizwa amabwiriza yo kwirinda COVID-19. Nubwo abakuru b'ibihugu byombi bakingiwe ndetse bakaba babanza no gupimwa mbere yo guhurira n'abandi mu ruhame, bubahirije ingamba z'ubwirinzi zirimo guhana intera no kwambara neza agapfukamunwa n'amazuru
Perezida Kagame yagendaga aganiriza mugenzi we wa Tanzania, Samia Suluhu
Perezida Samia Suluhu yereka mugenzi we w'u Rwanda, Paul Kagame abayobozi batandukanye bamuherekeje
Perezida Kagame asuhuza bamwe mu bayobozi baherekeje Samia Suluhu wa Tanzania
Perezida Kagame yereka Samia Suluhu bamwe mu bayobozi bakuru b'igihugu bari bambariye kumwakira; baserutse mu myambaro iranga umuco gakondo
Akarasisi ka gisirikare kari kateguriwe kwakira Umukuru w'Igihugu cya Tanzania, Samia Suluhu
Perezida Samia Suluhu yahawe ikaze n'Ingabo z'u Rwanda mu cyubahiro kimukwiye
Uyu Mukuru w'Igihugu ni ubwa mbere yagiriye uruzinduko rw'akazi mu Rwanda
Perezida wa Tanzania, Samia Suluhu, aha icyubahiro ibendera ry'u Rwanda
Bimaze kumenyerwa ko ingabo z'u Rwanda zitabusanya...
Ubwo akarasisi kari gasoje, ingabo zitashye zagendaga mu mujyo umwe

Abakuru b’ibihugu bagiranye ibiganiro byihariye

Perezida wa Tanzania, Samia Suluhu Hassan, yagiriye uruzinduko rw'amateka mu Rwanda, urwa mbere kuva agiye ku butegetsi
Ibiganiro byahuje abakuru b'ibihugu byombi byanitabiriwe n'abandi bayobozi mu nzego nkuru
Perezida Kagame na mugenzi we Samia Suluhu baganiraga bafite akanyamuneza ku maso
Ibiganiro byahuje Perezida Kagame na Samia Suluhu byashimangiye umuhate wo kunoza umubano uhuriweho
Perezida w’u Rwanda, Paul Kagame na mugenzi we wa Tanzania, Samia Suluhu Hassan, bagiranye ibiganiro byihariye muri Village Urugwiro
Nyuma yo kugirana ibiganiro byihariye bafashe ifoto y'urwibutso
U Rwanda na Tanzania byasinye amasezerano arimo ay’ubufatanye mu ikoranabuhanga n’itumanaho; urujya n’uruza rw’abantu n’ibintu, uburezi n’amabwiriza agenga ibijyanye n’imiti
Minisitiri w’Ububanyi n’Amahanga w’u Rwanda, Dr. Vincent Biruta, ahererekanya amasezerano y’ubufatanye na mugenzi we wa Tanzania
U Rwanda na Tanzania byasinyanye amasezerano y’ubufatanye mu by’ikoranabuhanga n’itumanaho. Ku ruhande rw'u Rwanda yashyizweho umukono na Minisitiri w’Ikoranabuhanga na Inovasiyo, Ingabire Paula
Minisitiri Ingabire Paula ahererekanya amasezerano y’ubufatanye na mugenzi we wa Tanzania
Perezida Samia Suluhu yashimiye Perezida Kagame ku bw’ubutumire yamuhaye, yashimangiye ko amufata nk’umuvandimwe kandi byamweretse ko u Rwanda ruba hafi ya Tanzania
Perezida Kagame yavuze ko u Rwanda na Tanzania ari ibihugu by’inshuti bisangiye ibirenze umupaka ndetse bikaba bifitanye ubushake bwo gutanga ibyiza ku baturage
Perezida Kagame na Suluhu bashimangiye umubano usanzwe hagati y’u Rwanda na Tanzania kuva mu myaka ishize
Ni umuhango wabaye hubahirizwa ingamba zo kwirinda icyorezo cya Coronavirus zirimo guhana intera no kwambara agapfukamunwa
Nyuma y'ibiganiro byabereye mu muhezo, abakuru b'ibihugu batanze imbwirwaruhame zagarutse ku bikubiye mu byo baganiriye n'ibyo bemeranyijeho

Perezida Samia Suluhu yunamiye inzirakarengane za Jenoside ziruhukiye ku Gisozi

Minisitiri w’Ububanyi n’Amahanga w’u Rwanda, Dr. Vincent Biruta, yereka Perezida Samia Suluhu bamwe mu bayobozi bakuru barimo Minisitiri w’Ubutabera, Johnston Busingye (hagati), Umunyamabanga Nshingwabikorwa wa Komisiyo y'Igihugu yo kurwanya Jenoside (CNLG), Dr Bizimana Jean Damascène n'abandi
Perezida wa Tanzania, Samia Suluhu, ubwo yageraga ku Rwibutso rwa Kigali ku Gisozi. Yari aherekejwe n'abayobozi batandukanye mu nzego nkuru z'ibihugu byombi
Umuyobozi w’Urwibutso rwa Jenoside rwa Kigali, Gatera Honoré, aganira na Perezida Samia Suluhu mbere yo gutangira kumutambagiza ibice bigize urwibutso
Perezida Samia Suluhu ku wa 2 Kanama 2021 yasuye Urwibutso rwa Jenoside rwa Kigali ruri ku Gisozi
Perezida Samia Suluhu yasobanuriwe amateka yagejeje kuri Jenoside yakorewe Abatutsi, yahitanye ubuzima bw'inzirakarengane zirenga miliyoni mu mezi atatu gusa
Perezida Samia Suluhu yasobanuriwe amateka y'itegurwa n'ishyirwa mu bikorwa rya Jenoside yakorewe Abatutsi kuva mu gihe cy'Abakoloni
Yanasuye igice cyahariwe abana, yerekwa uko abo baziranenge bishwe bazira uko bavutse
Perezida Samia Suluhu yakozweho n'amateka yaboneye ku Rwibutso rwa Kigali
Umuyobozi w’Urwibutso rwa Jenoside rwa Kigali, Gatera Honoré, ni we watambagije Perezida Samia Suluhu ibice bigize Urwibutso rwa Jenoside rwa Kigali ku Gisozi
Aha Perezida Samia yerekwaga bimwe mu bikoresho Interahamwe zakoreshaga muri Jenoside yakorewe Abatutsi mu 1994
Perezida wa Tanzania, Samia Suluhu Hassan, yunamiye inzirakarengane z’Abatutsi zisaga ibumbi 250 zishyinguye mu Rwibutso rwa Jenoside rwa Kigali
Perezida Samia Suluhu yashyize indabo ku mva rusange zishyinguwemo Abatutsi bishwe mu 1994
Mu butumwa yanditse mu gitabo cy'abashyitsi ku Rwibutso rwa Kigali ku Gisozi, Perezida Samia Suluhu, yavuze ko "abayobozi ba Afurika bakwiye kumva ko amacakubiri mu bantu atari inzira ikwiye kunyurwa"

Umunsi wa mbere yawusoje yakirwa ku meza na Perezida Kagame

Perezida Paul Kagame na mugenzi we wa Tanzania, Samia Suluhu Hassan, ubwo bageraga muri Kigali Convention Center ahabereye uyu musangiro
Perezida Paul Kagame yakiriye ku meza Suluhu Hassan wa Tanzania mu musangiro wabereye muri Kigali Convention Centre ku mugoroba wo ku wa Mbere
Ku buzima bwacu n'abaturage....
Perezida Kagame yasabye mugenzi we wa Tanzania, Samia Suluhu Hassan, ubufasha bw’abarimu batanga umusanzu mu Rwanda mu kwigisha Igiswahili
Minisitiri ushinzwe Imirimo y'Inama y'Abaminisitiri, Inès Mpambara, ni umwe mu bayobozi bakuru bitabiriye uyu musangiro
Perezida Kagame na Samia Suluhu bagize umunsi waranzwe n'akazi kenshi hagamijwe gushaka icyateza imbere abaturage b'ibihugu byombi
Perezida Samia Suluhu Hassan yashimye ikaze yahawe mu Rwanda, ashimangira ko umubano uhuriweho ugiye kurushaho kunozwa
Perezida Kagame yavuze ko Igiswahili ari ururimi ruhuza abantu bityo ko Tanzania yafasha u Rwanda mu kurwigisha abaturage
Meya w'Umujyi wa Kigali, Pudence Rubingisa na Minisitiri w'Uburezi, Dr Uwamariya Valentine bitabiriye uyu musangiro
Uyu musangiro witabiriwe n'abayobozi mu nzego nkuru z'igihugu ku ruhande rw'u Rwanda na Tanzania
Itsinda ricuranga umuziki ugezweho ni ryo ryasusurukije abitabiriye uyu musangiro
  • Umunsi wa kabiri wa Perezida Samia i Kigali

Yasuye ahateranyirizwa imodoka za Volkswagen

Perezida Kagame na Samia Suluhu wa Tanzania basuye Icyanya cy’inganda i Masoro mu Mujyi wa Kigali. Bari baherekejwe n'abayobozi mu nzego nkuru z'igihugu
Beretswe urugendo rwo guteranyiriza imodoka mu Rwanda kugeza zirangiye
Abakuru b'ibihugu byombi banyuzagamo bakaganira ubwo basuraga ahateranyirizwa imodoka za Volkswagen
Perezida Kagame na mugenzi we wa Tanzania, Samia Suluhu, banyuzagamo bakaganira n'uwabasobanuriraga imikorere y'uru ruganda
Baneretswe ahari sitasiyo zikoreshwa n'imodoka zifashisha amashanyarazi
Izi modoka ziteranyirizwa mu Rwanda, hari abenegihugu benshi batangiye kuziganuraho ndetse mu mihanda imwe ya Kigali zirahaboneka
Mu Rwanda hateranyirizwa ubwoko butandatu bw’imodoka za Volkswagen zirimo VW Polo, VW Passat, VW Tiguan, VW Teramont na VW Amarok
Ubwo bari mu Ruganda rw’imodoka rwa Volkswagen Rwanda bafatiye ifoto ku modoka yo mu bwoko bwa Volkswagen Teramont
Umuyobozi wa Volkswagen Rwanda, Serge Kamuhinda (iburyo) n'Umuyobozi Mukuru wa CFAO, Ikigo gishinzwe gucuruza no gukwirakwiza imodoka za Volkswagen mu Rwanda, Levy Ouso (ibumoso) bafashe ifoto y'urwibutso hamwe n'abayobozi bombi

Perezida Samia na Kagame basuye Uruganda rwa Mara Phones

Perezida Kagame na mugenzi we wa Tanzania, Samia Suluhu Hassan, basuye icyanya cyahariwe inganda i Masoro basobanurirwa imikorere y'inganda zitandukanye zirimo urwa Mara Phones rukora za telefoni zigezweho
Umuyobozi Mukuru w'Uruganda rwa Mara Phone mu Rwanda, Eddy Sebera, yasobanuriye abakuru b'ibihugu byombi imikorere yarwo kuva rutangijwe mu gihugu
Uruganda rwa Mara Phone rufite icyicaro mu cyanya cy’inganda cya Kigali mu Karere ka Gasabo, rwafunguwe na Perezida Paul Kagame ku wa 7 Ukwakira 2019. Rukora ubwoko butatu harimo telefone zo mu bwoko bwa Mara S, Mara Z na Mara X
Umuyobozi Mukuru wa Mara Phone mu Rwanda, Eddy Sebera, yabwiye abakuru b'ibihugu ko telefoni za mbere uru ruganda rwakoreye mu gihugu zamuritswe muri Kamena 2019 ndetse rwakomeje kwaguka
Usibye kuba uru ruganda ruri ku butaka bw'u Rwanda, urubyiruko narwo rwabonye amahirwe yo kwiyungura ubumenyi mu bijyanye n'ikoranabuhanga
Mara Phone ni rwo ruganda rwa mbere muri Afurika rukora telefoni zigezweho za smartphones, rwatangiranye ubushobozi bwo gukora nibura 1,200 ku munsi zigurishwa mu Rwanda no hanze

Banasuye Uruganda rwa Inyange Industries

Perezida Paul Kagame ni we watwaye mugenzi we wa Tanzania, Samia Suluhu Hassan, mu modoka berekeza, banava ku Ruganda rwa Inyange Industries
Perezida Paul Kagame na mugenzi we wa Tanzania, Samia Suluhu Hassan, basuye Uruganda rwa Inyange Industries rukorera i Masaka mu Karere ka Kicukiro
Basobanuriwe imikorere y'uru ruganda rutunganya amata n’imitobe y’imbuto z’ubwoko butandukanye
Perezida Kagame na Suluhu babwiwe ko Inyange Industries yatangiye ibikorwa byayo ku butaka bw'u Rwanda mu 1997
Uruganda Inyange Industries rusanzwe rutunganyiriza ibinyobwa bitandukanye mu Rwanda. Mu 2001 ni bwo rwatangiye gutunganya amazi no kuyashyira mu macupa n'amajerekani yabugenewe. Ubu rufite isoko ryagutse mu gihugu no mu Karere

Perezida Kagame yasezeye kuri mugenzi we wa Tanzania

Perezida Kagame yaherekeje mugenzi we, Samia Suluhu nyuma yo gusoza uruzinduko rw'iminsi ibiri mu Rwanda
Perezida Suluhu yagendaga asezera ku bayobozi batandukanye mbere yo gushingura ikirenge ku Kibuga Mpuzamahanga cy'Indege cya Kigali asubira muri Tanzania
Abakuru b'ibihugu byombi bagendaga baganira mbere y'uko uwa Tanzania afata rutemikirere
Perezida wa Tanzania, Samia Suluhu Hassan, yasoje uruzinduko rwe rw’iminsi ibiri mu Rwanda, ku wa Kabiri, tariki ya 3 Kanama 2021
Perezida Kagame asezera kuri mugenzi we wa Tanzania wasoje uruzinduko rw'iminsi ibiri mu Rwanda
Perezida Kagame yitegereza indege yo mu bwoko bwa Airbus A220-300 yatwaye mugenzi we wa Tanzania, Suluhu uko ifata ikirere
Perezida Kagame ubwo yari avuye guherekeza mugenzi we Samia Suluhu wa Tanzania ku Kibuga Mpuzamahanga cy'Indege cya Kigali i Kanombe
Air Tanzania yashinzwe ku wa 11 Werurwe 1977. Nyuma yo kumara igihe idakora yabyukijwe na nyakwigendera Perezida John Pombe Magufuli mu 2016 nk'umwe mu mishinga igamije guteza imbere ubukerarugendo, ubucuruzi n’ishoramari

Amafoto: Niyonzima Moïse (IGIHE), Village Urugwiro, Kigali Today


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .