Uwase wihangiye umurimo ahereye ku 2000, afite inzozi zo gushinga uruganda rukora imyenda

Yanditswe na Claude Bazatsinda
Kuya 3 Werurwe 2017 saa 12:08
Yasuwe :
0 0

Uwase Céline, umukobwa w’imyaka 25 wo mu Kerere Ka Musanze ukora imirimo y’ubugeni avuga ko amaze gutera intambwe ishimishije kuko yatangije amafaranga ibihumbi bibiri by’amanyarwanda, akaba amaze kugera kuri miliyoni mu mwaka umwe.

Uwase atuye mu Murenge wa Muhoza akagari ka Cyabararika akaba akora ibikapu, inkweto n’amasakoshi yifashishije imyenda n’ibindi bikoresho bigenda bimuteza intambwe, akaba avuga ko azatuza ageze ku ruganda rukora imyenda.

Uwase Céline yarangije amashuri yisumbuye mu ishami ry’ibaruramari mu mwaka wa 2013 nyuma y’imyaka ibiri atagira icyo gukora nibwo yihangiye umurimo wo gukora ibikapu, amasakoshi n’inkweto mu bitenge.

Aganira na IGIHE Uwase yagize ati “Natangiye gukora ibi mu kwezi kwa cumi 2015, ntangiza ibihumbi bibiri nari nakuye mu gukuba ibitenge nifashishije imashini idoda ya mama. Nahise ntangira kugura ibitambaro nkabidodamo amasakoshi gutyo gutyo ariko nari nkikoresha imashini ya mama. Byaje gukundwa cyane bituma nkomeza kubikora kugeza n’ubu.”

Uwase kandi avuga ko kuri ubu amaze kwigurira ibikoresho akoresha birengeje ibihumbi 700 kandi agahemba n’abakozi bane akoresha.

Ati “Ubu naguze imashini nifashisha mu kudoda ifite agaciro k’ibihumbi 700 ngura inka, mfite ingurube ebyiri ndetse n’amaforomo nkoresha iyo nkora inkweto.”

Agira inama urundi rubyiruko gukangukira guhanga udushya bagendeye ku bikoresho bikunzwe kandi bagashishikara mu byo bakora kuko n’uwaguha ibya mirenge ugatekereza nabi cyangwa ukaba umunebwe ntacyo wageraho.

Ati “Ndakubwiza ukuri nta nkunga nari nabona, urubyiruko ndarushishikariza guhanga udushya ariko dukenewe kandi bagashishikara kuko ibyo wagira byose udatekereje neza byayoyoka.”

Uyu mukobwa atuye mu karere ka Musanze mu murenge wa Muhoza agacururiza ibyo yakoze mu isoko rya Musanze riri muri gare, avuga ko ibi yabikoze mu rwego rwo guhangana n’ubushomeri yari amazemo imyaka ibiri kandi byamuhaye umusaruro uhagije ndetse afite inzozi zo gukomeza kugera ageze ku ruganda rwe bwite rukora imyenda.

Uwase avuga ko azaruhuka ashinze uruganda rukora imyenda
Uwase akora ibikapu mu bitenge bigakundwa na benshi ku buryo bimaze kumuteza imbere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza