USA: Dr Nyirigira yabaye Umunyafurika wa mbere uhawe igihembo cyo kuvura no kugabanya ububabare

Yanditswe na Karirima A. Ngarambe
Kuya 14 Nzeri 2018 saa 09:06
Yasuwe :
0 0

Dr Nyirigira Gaston, inzobere mu gutera ikinya no kuvura indembe, yahawe igihembo cy’umuntu wakoze ubushakashatsi mu kuvura ububabare no kubugabanya kandi ubwo bushakashatsi bukanabyara umusaruro mu bihugu bikiri mu nzira y’amajyambere.

Dr Nyirigira asanzwe avura mu Bitaro bya Kaminuza bya Butare (CHUB), yagiye kwihugura mu bijyanye no kuvura ububabare (Pain) muri Queen’s University iri Ontario muri Canada, agaruka atangiza gahunda yo kuvura no kurwanya burundu ububabare mu bitaro bya CHUB.

Yaherewe igihembo i Boston muri Leta ya Massashusette muri Amerika kuri uyu wa 13 Nzeri 2018 kubera ubushakashatsi yakoranye n’itsinda rya Kaminuza ya Queen’s University, bwanahinduye uburyo bw’imivurire mu bitaro bya CHUB na CHUK.

Mu kiganiro na IGIHE yagize ati “Habayeho gukora amabwiriza, uko bikorwa, inyandiko zisobanura uko byakorerwa mu bitaro ndetse hagaragara impinduka mu mivurire y’ububabare mu bitaro ku buryo bugaragara.”

“Hamwe n’itsinda rya Queen’s University hakozwe ubushakashatsi ku bijyanye n’imivurire y’ububabare mu bitaro bikuru bya Butare n’ibya Kigali, ibyavuyemo bimurikwa mu nama igaragarizwamo ubushakashatsi bushya ku kugabanya ububabare yabereye Yokohama mu Buyapani mu 2016 ndetse bunasohoka mu kinyamakuru cya Canadian Journal of Pain muri Werurwe 2018.”

Ubushakashatsi bwashingiye ku bantu babagirwa mu bitaro bakoze impanuka cyangwa ibindi bibazo, n’umubare muto w’abahanga mu gutera ikinya mu Rwanda baba badafite ababafasha mu kugabanyiriza uburibwe umurwayi nyuma yo kubagwa.

Amateka atazibagirana kuri Dr Nyirigira

Kuva igihembo cya ‘Award of Excellence in Pain Management and Research in Low and Middle-income countries’ gitangwa na IASP cyashyirwaho mu mwaka wa 2005, ni ubwa mbere gihawe Umunyafurika, ari we Dr Nyirigira.

Uyu mwaka gihawe 2018 Rwanda, 2016 cyahawe Romania, muri 2014 gihabwa u Bushinwa, muri 2012 cyegukana u Buhinde, muri 2010 gitwarwa na Philippine, muri 2008 nabwo cyahawe China, muri 2005 mu ntagiriro cyegukanywe na Brazil.

Nyuma yo gukora amateka, Dr Nyirigira yagize ati “Nabyakiriye neza, cyane ko byambereye intandaro yo gukora uko nshoboye na bagenzi banjye ngo tugere kuri byinshi kandi niwo mugambi tugomba gukomeza kubigeraho.”

“Imbaraga turazifite, ubushake burahari ikindi kandi ubuyobozi bw’ibitaro bubidufashamo cyane iyo dukeneye ubufasha bwihariye.”

Dr Nyirigira avuga ko ari intambwe ikomeye bagezeho ariko hakiri byinshi byo gukora ngo ubu buvuzi bugere mu bitaro byose mu gihugu.

Ati “Sinibazaga ko ibyo dukora hari aho byagera nko kuri uru rwego ariko nabonye ko ibikorwa aribyo byivugira.”

Ashimira abo bakorana mu bitaro bya CHUB (Pain Committee/CHUB), ubuyobozi bw’ibitaro na Minisiteri y’ubuzima yamufashije kujya kwiga muri rusange ndetse n’abanyamahanga bafasha mu guteza imbere ubu buvuzi.

Dr Nyirigira ni muntu ki?

Dr. Gaston Nyirigira, asanzwe ari umuganga mukuru (Specialiste) mu bitaro bya Kaminuza i Butare (CHUB) mu bijyanye no gutera ikinya ndetse no kuvura indembe bita “Anesthesie et Reanimation”

Yarangije kwiga mu Buvuzi Rusange (General Medicine) muri 2009, akora umwaka n’igice mu bitaro bya CHUB nk’umuganga usanzwe, atangira kwihugura mu ishami rimwe muri Kaminuza y’u Rwanda, akomereza muri Canada n’u Bufaransa asoza amasomo muri 2015, ahita agaruka gukorera ibitaro bya CHUB.

Yagiye no kwihugura mu bijyanye no kuvura ububabare (Pain) n’ubushakashatsi muri kaminuza ya Queen’s University muri Canada, agaruka atangiza gahunda yo kuvura no kurwanya burundu ububabare mu bitaro bya CHUB.

We n’itsinda ryashyizweho ku bitaro bahuguye abaganga n’abaforomo mu kuvura ububabare ku bufatanye bw’Abanyacanada (Queen’s University, Dalhousie University ndetse n’izindi kaminuza).

Yifuza ko CHUB yaba icyitegererezo mu kugabanya no kuvura ububabare ku buryo n’ahandi hose bajya kuyigiraho.

Dr Nyirigirayabaye Umunyafurika wa mbere wegukanye igihembo cyo kugabanya no kuvura ububabare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza