Urwibutso n’ibanga bya Nyabyenda watunganyije nyinshi mu ikinamico zamamaye kuri Radio Rwanda

Yanditswe na Ferdinand Maniraguha
Kuya 1 Kamena 2018 saa 10:00
Yasuwe :
0 0

Kera habayeho! Buri wa Kabiri saa mbili n’iminota 45 byabaga ari ibicika, abato barimo abava kuragira cyangwa kuvoma bacicikana, abakuru bakubana barangiza uturimo tw’umugoroba ngo badacikwa n’ikinamico kuri Radio Rwanda.

Ni yo Radio yabaga mu gihugu, televiziyo zari zitaraza, film za Nǃxau ǂToma uzwi nka “Sagatwa” na ba Jet Li zitaragera i Kanombe.

Na n’ubu abumvise Ikinamico zo ha mbere nk’Icyanzu cy’Imana, Inseko ya Kiberinka, Mazi ya Teke, Kavuna, Urwabya rwa Nyabyenda n’izindi, bitsa ku buhanga zabaga zikinanye n’inyigisho z’umwimerere zatangaga.

Imyaka 36 irashize ikinamico zitangiye guca kuri Radio Rwanda. Ubu siyo yonyine zigicaho kuko amaradiyo yabaye menshi, amatsinda azikina nayo agenda yiyongera.

Nyabyenda Narcisse, ni umwe mu bagize uruhare runini mu ikinwa ry’Ikinamico zahogoje benshi kuri Radio Rwanda, aho iyo yabaga atari umutoza w’abakinnyi, yabaga yafashe amajwi yabo. Ikinamico 380 zamunyuze imbere, izo atanditse yarazitoje, izindi azifata amajwi.

IGIHE yaganiriye n’uyu musaza utagikora kuri Radio Rwanda, ahishura byinshi ku mikinire y’izo kinamico za karahanyuze n’amayeri yakoreshwaga kugira ngo zizahore mu mitwe y’abazumvise.

Nyabyenda, umusaza w’umusirimu uhorana akanyamuneza ku maso avuga ko yatangiye gukora kuri Radio Rwanda mu 1977. Ahagera Ikinamico zari zitaratangira gukinwa ahubwo yakoraga muri serivisi tekiniki.

Izina Ikinamico ryaje nyuma

Ibi byitwa Ikinamico siko byatangiye byitwa. Mu mwaka wa 1982 nibwo byatangiye ariko byitwaga Théatre kuko byari bije bivuye mu ndimi z’amahanga.

Nyabyenda avuga ko bamaze imyaka igera muri itanu ari uko byitwa nyuma baza kwifuza ko bishakirwa irindi izina, abantu bakabyiyumvamo kurushaho.

Abigishaga muri Kaminuza ya Leta i Nyakinama barahamagawe ngo bashake izina rya Théatre mu Kinyarwanda. Mu bahamagawe harimo Gasimba François Xavier uzwi mu bitabo nk’Isiha Rusahuzi, Indege y’Ubumwe Rwanda rw’Ubu n’ibindi.

Izina ryarashatswe, bahitamo Ikinamico ariko bamwe bararirwanya bashaka ko byitwa Ikinangeso.

Nyabyenda ati “Uwategekaga ORINFOR icyo gihe yaravuze ngo ‘abantu ntabwo izina bazarifata, ahubwo batangira kuvuga ngo ntabwo ari Ikinamico ahubwo ni Ikinangeso kuko ibyo twakinaga wumvaga ko harimo ingeso nyinshi.’ Duti ‘Mureke rizafata’ kandi urabona ko ryafashe.”

Umwanditsi n'Umuyobozi w'Ikinamico, Nyabyenda Narcisse/ Ifoto ya Niyonzima Moïse

Ibanga ry’ikinamico zakunzwe

Nyabyenda avuga ko buri kwezi basabwaga gusohora ikinamico ebyiri nshyashya. Yajyaga gusohoka abantu amatsiko ari menshi biteze ko ubwiza bwayo buza buruta ubw’iyabanje.

Ubwo bwiza n’abavutse vuba barazumva bakabushima kandi wenda ikinamico imaze imyaka 30 ikinwe.

Nyabyenda avuga ko ibanga bakoreshaga ari ukwitonda igihe bayandika ndetse no kuyunguranaho ibitekerezo.

Ati “Hari ikinamico nyinshi twagiye dukina zaranditswe n’abandi, tukajyaho nk’ikipe y’abantu icumi, tukayimukosorera, tukamushyiriramo ibirungo. Ikinamico kugira ngo iryohe nuko iba itera amatsiko, iyo atari uko nta kintu uba uri kwandika.”

Yakomeje agira ati “Buriya abantu bandika ikinamico, hari ibintu byinshi bagombye kubanza kureba. Umuntu wandika ikinamico inyura kuri Radio agomba kwandikira ugutwi kureba. Ni ukuvuga ngo umuntu uza kuyumva, ayishyire nk’ahantu abone imeze nka film. Bisaba igihe kirekire cyo kubitegura, ntuyivane muri mudasobwa ngo uhite ujya kuyikinisha. Yivane muri mudasobwa uyisome, uhe n’abandi bandike ikinamico bakurebere niba igitekerezo gifite ireme, gifite inyigisho ushaka gutanga.”

Nyabyenda abona ko nibura amezi abiri cyangwa atatu ariyo make kugira ngo ikinamico yawe ibe yanonosowe aho kuyandika ugahita uyikina.

Abakinnyi ba mbere b’ikinamico bari bafite umwihariko

Benshi bibaza ubuhanga bwa Sebanani Andereya wacurangaga muri Orchestre Impala, ubwa Mukandengo Athanasie, Mukeshabatware Dismas n’abandi.

Nubwo yari umutoza w’abakinnyi, Nyabyenda avuga ko abantu batangiye bakina Ikinamico za Radio Rwanda bari bafite umwihariko ku buryo atakwemeza ko ari we wabatoje.

Ati “Sebanani yari umukinnyi cyane. Sinakwiyemera ko arinjye watoje abantu tugitangira […] Nka Mukandengo washoboraga kumuha role iyo ariyo yose, ari iy’abakecuru, ari iy’abakobwa ndetse n’iy’utwana duto akayikina.”

Icyakora, mu bari abahanga bamwe ntibakiriho, bazize Jenoside yakorewe Abatutsi mu 1994. Nyabyenda avuga ko byabaye igihombo gikomeye ku iterambere ry’Ikinamico mu Rwanda.

Imbogamizi bahuraga na zo…

Nta mwuga utabamo ibibazo nubwo byose bitanganya uburemere. Kubera ibyo bakinaga hari abashoboraga gutinya gukina ku mwanya runaka ngo hato bitabateranya n’umuryango cyangwa bagafatwa uko batari.

Nyabyenda ati “Washoboraga kuba wahaye role umuntu, agakina ari nk’indaya kandi ari umudamu ufite abana mu rugo akagira ubwoba ati ‘ibi bintu nimbikina, umugabo wanjye arabifata ate, abana banjye barabifata bate? Ariko mu mayeri y’ikinamico, iyo ugiye gukina witwa nka Agnes ubusanzwe witwa Chantal, jya muri studio witwa Agnes, uze kwambara Chantal nyuma. Icyo gihe ukina neza.”

Ibyo Nyabyenda kandi avuga ko bijyana no gusoma ikinamico zanditswe zikanakinwa n’abandi kugira ngo wigiremo amayeri bakoresheje na we uyigane.

Pasiteri Rutayisire Antoine umwanditsi w’umuhanga atazibagirwa

Nyabyenda avuga ko habayeho abanditsi benshi b’abahanga ariko ngo biragoye kwirengagiza ubuhanga bwa Pasiteri Rutayisire Antoine, Umushumba wa Paruwasi ya Remera mu Itorero ry’Abangilikani mu Rwanda.

Uyu mugabo yandikaga ikinamico mbere ya Jenoside ariko aza kubivamo, ibintu Nyabyenda avuga ko ari igihombo, ati “Uriya Rutayisire! Ni umuhanga cyane rwose. Ni we wanditse ya kinamico y’Umupadiri wateye inda umukobwa akanga kwemera umwana ku mugaragaro ahubwo akaza kumubyara muri batisimu kugeza abana yagiye abyara bashakanye.”

Nyuma ya Jenoside, Nyabyenda yinginze Rutayisire ngo bongere kwandika ikinamico, aramuhakanira, ati “Naranabimubwiye Jenoside irangiye , nti twongere tujye mu nganzo, ati ‘Nyabyenda rero, keretse nanditse kuri Bibiliya.”

Inama ku bakinnyi b’ubu

Nyabyenda avuga abakina ikinamico ubu bakeneye amahugurwa kugira ngo babashe kugera ku rwego rwiza kandi ibyo bakina abantu babikunde cyane.

Ati “Nk’abana bakina muri iyi minsi bagomba amahugurwa. Iyo wabonye uko abandi bakina ugasoma n’amakinamico menshi y’abandi bazanditse biguha imbaraga zo kumenya kwandika n’izo kumenya gukina.”

Amafaranga ni make

Nubwo gukina ikinamico ari umwuga usaba ubuhanga n’impano, Nyabyenda avuga ko atari akazi karimo amafaranga menshi nyamara agashimangira ko aribwo buryo bwiza bwo gutanga ubutumwa.

Ati “Iyo utanga ubutumwa ukoresheje ikinamico yumvikana kurusha gusoma imbwirwaruhame gusa. Iyo utanga ubutumwa ubinyujije mu ikinamico hari ikintu gisigara […] ariko keretse iyo ukinnye wenda nk’ikinamico zatewe inkunga n’ibigo runaka mu bukangurambaga nk’ubwo kurwanya SIDA, Malariya n’ibindi nibwo biguha amafaranga ariko iyawe kuvuga ngo uzayikinisha mu ruhame ubone amafaranga, Abanyarwanda ntabwo babyitabira.”

Icyakora yizera ko kuba harashyizweho Ishyirahamwe ry’Abahanzi baba ab’indirimbo, film, ikinamico n’ibindi ngo bizagira icyo bitanga kuko bazihuriza hamwe bagashaka n’umuti w’uburyo babyaza umusaruro ibyo bakora. Nyabyenda kuri ubu ni Umujyanama waryo.

Uretse kandi gukina ikinamico, Nyabyenda ni na we wanditse film ya mbere yaciye kuri Televiziyo Rwanda igitangira mu mwaka wa 1992.

Iyo film nto yayise Nkore iki? Yari irimo umwana watsindiye kujya mu mashuri yisumbuye, agiye gutega imodoka imugeza ku kigo yoherejweyo arayibura birangira agiye kwibera mayibobo i Kigali.

Yakurikiwe n’indi yise “Twari amabuye’’ yavugaga ku buzima bukomeye bw’abakozi ba Leta bahembwaga make nyamara ibibasaba amafaranga ari byinshi.

Indi nkuru wasoma: Urugendo rw’imyaka 55 ya Radio Rwanda, radiyo yihariye mu gihugu cy’amateka

Video: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza