Kwamamaza

Urugendo rw’itangazamakuru kuri Vincent Niyibizi usoma amakuru kuri Royal TV

Yanditswe kuya 29-11-2016 saa 09:26' na Rabbi Malo Umucunguzi


Mu myaka itandatu ishize, nibwo Vincent Niyibizi wavukiye mu Karere ka Gicumbi yinjiye mu itangazamakuru, urugendo rusa n’urutaramutwaye umwanya munini wo kurutekerezaho cyangwa kururwanira.

Niyibizi umenyerewe mu gusoma amakuru kuri Royal TV/FM, amaze kumenyekana mu itangazamakuru ryo mu Rwanda, aho yatangiye akorera Radio y’abaturage i Gicumbi, akorera Voice of Africa FM, Radio 1 na TV 1, ndetse muri Werurwe 2016 yatowe nk’Umunyamakuru uvuga amakuru neza kuri televiziyo muri Rwanda Broadcasting Excellence Awards.

Mu kiganiro na IGIHE, Niyibizi agaruka ku rugendo rwe mu itangazamakuru, noku buzima bwihariye bw’umuntu ukora kuri televiziyo.

Ni gute yaje mu mwuga w’itangazamakuru?

Ubwo yari arangije amashuri yisumbuye mu Rwunge rw’amashuri rwa Mutagatifu Yozefu i Kabgayi mu Karere ka Muhanga, ku myaka 23 Niyibizi yari ategereje ko amanota y’ibizamini ngo amenye niba ajya kwiga Kaminuza, hari ahagana mu 2011.

Ati “Twaje kumva itangazo bavuga ngo i Gicumbi hagiye gutangira Radio, abantu bafite impano bagende basabe. Ndabyibuka hasabye abantu bagera mu 160 barimo n’abaturutse ku zindi radio, kandi icyo gihe hashakwaga 25 bagomba gutangirana na Radio.’’

Yaratoranyijwe mu bandi bahawe amahirwe bakizamuka, atangira akora imyidagaduro, aza kuyifatanya n’amakuru y’imikino nabyo biza gusozwa no kwinjira mu makuru asanzwe.

Ati “Iwacu batubwiraga umuntu wigeze gusinda afite radio, arangije arayimena, ngo abantu bavuze bararuha, asukamo inzoga ngo abamare inyota. Barabivugaga, nkabyumva nti ariko buriya koko si abantu baba bari muri radiyo imbere bari kuvuga? Nkatangira kumva uko bavuga ndi umwana, nkavuga ngo nanjye nzaba umunyamakuru.’’

“Ukumva umuntu yavuze, abantu benshi nabo barakurikiye. Nkavuga nti ariko kuki atari njye baba barikumva, kuki ntakora namjye hakagira ubwo abantu birundanya bari kunyumva?’’

Umunsi wa mbere nyuma yo kuvugira kuri radio

Niyibizi avuga ko inzozi ze agenda azigeraho, ndetse bikaba bitaramugoye kuko akora ibintu akunda kuva kera.

Ati “Umunsi wa mbere navugiye kuri radio naratashye ngeze mu muhanda abantu bose bati ‘twakumvise, twakumvise’, njye rero byanteraga isoni kuko abantu banagushimye cyane, n’ubwana, nkagenda nihisha.’’

“Kubera ko rero aba ari n’ibintu batanasobanukiwe cyane ngo bakubwire ngo aha wabyishe, bo baba bavuga ngo unywa iki, unywa iki? Ahubwo icyambabaje nk’uko abaturage bandi babishimaga, mu rugo wasangaga wagira ngo nta n’ikintu bibabwiye, bavuga bati ese ubundi urabikora bizakugeza he?”

“Ubwa mbere nkicara kuri mikoro barambwiye ngo twereke ko uzi ibyo ugiye gukora, hari umwana twiganye w’umuhanzi, icyo gihe nahise muhamagara mukoresha interview atabizi, mubaza ibibazo, barambwira ngo ni byiza.’’

Royal FM yabaye indi ntangiriro

Niyibizi avuga ko kuri TV 1 ariho yakoze bwa mbere kuri televiziyo, yahakuye ubumenyi bukomeye nubwo uko umuntu atera intambwe buri munsi ariko aba yiga ibintu bishya.

Ati “Royal TV yaje ari ikindi kigo cy’Abanyakenya, hari ibintu byinshi bateyeho imbere twe tutazi. Ndabyibuka Umunyakenya yigeze kuza turi mu nama y’amakuru, areba amakuru dufite aravuga ati ariko se ko numva muri kuvuga ibibazo gusa, amakuru yo mu Rwanda ni ibibazo gusa, nta kintu kitari ikibazo wakora kandi abantu bakagikunda?”

Ibyo byatumye atekereza ikindi yakora cyanyura abareba televiziyo, agira igitekerezo cyo gushakisha abantu bafite impano zidasanzwe, bagakorana ikiganiro ndetse rimwe na rimwe bagahabwa umwanya wihariye mu makuru.

Umunsi wa mbere kuri Televiziyo

Gukorera radio ngo byoroshye kurusha televiziyo, kuko hamwe uba wiherereye ntawe ukubona, ariko kuri televiziyo banakwibutsa kumwenyura imbere ya Camera (soma kamera), mu mutwe ukiyumvisha ko bigera ku bantu utazi n’aho baherereye.

Ati “Ugiye bwa mbere kuri Televiziyo, uri kumva amabwiriza bari kuguha inyuma abari guhuza amajwi n’amashusho, noneho bari kubara ngo hasigaye amasegonda abiri, atatu ngo utangire, ukumva umutima wenda no guhagarara.’’

“Biragoye ariko nyine iyo ukoze ikintu ugikunze no kubera impano wenda uba unafite, birashoboka.’’

Ubuzima bwihariye ku bakora kuri televiziyo

Kujya kuri televiziyo utaragira ubushobozi ngo wiyubake ubwawe, ni nk’imwe mu mbogamizi Niyibizi agaragaza, kuko ngo abakubona kuri Televiziyo hari ibitekerezo bakugiraho, bagatangira no kwiyumvisha uko ubayeho n’aho utuye.

Ati “Njye umunsi wa mbere ninjiye mu kabari, umuntu bigaragara ko yasinze araza arankurura ati ‘si wowe nabonye kuri televiziyo? Nahise ntaha. Gusa naramuhakaniye nti ntabwo ari njyewe. Uko bakubona hari n’uvuga ngo uyu muntu ntabwo akwiye no kwicara muri tagisi. Umuntu yakubona agatangira gushushanya uko ubayeho ati uba agenda mu modoka imeze itya, inzu atahamo, kandi ntabwo ariko kuri.’’

Gukora kuri TV ni uburanga?

Niyibizi avuga ko gukora kuri televiziyo bidasaba isura yihariye nk’uko abenshi babivuga, uretse ko hari n’abakoresha babifasha bakabyemera batyo.

Ati "Ndabyibuka ubwo twari ku ishuri, bigeze kutubwira ko hari televiziyo ishaka abakozi, ariko amabwiriza ari ukuba azi indimi, bati ‘ariko agomba kuba afite ‘TV Face’, ngo umuntu agomba kuba afite isura ibereye Televiziyo."

"Bibaye ari ibyo twese twakwigira abazungu cyangwa tukibagisha (aseka). Urumva umuntu ntabwo ariwe wiremye. Numva atari ikintu abantu baha agaciro kuko hari n’abantu bari bafite amasura meza byananiye."

Inzozi ni zose…

Niyibizi avuga ko arebye urugendo arimo n’uko itangazamakuru birutana, asanga adasubira inyuma, bikanagaragarira no kumushahara agenda bona.

Ati “Niba narahembweho 20 000 Frw, inshuro maze kubikuba sinazivuga ariko sinabitekerezaga. Mu myaka itandatu maze navuga ko ari byiza, ariko ndacyashaka gukora, buri munsi uko nsomye amakuru kuri Televiziyo ndavuga ariko nti ‘ejo nzahindure iki, buri munsi mba numva bitagenze uko mbishaka.’’

Mu itangazamakuru kandi yakuze yumva abanyamakuru nka Umuhire Valentin wakoraga kuri Radio Rwanda, Niyibizi yiyemeje kureba no hanze uko bakora, agamije kwiyungura ubumenyi no kurushaho gutera intambwe.

Ati “Kuri NTV Kenya, umuntu bita Larry Madowo ukora ikiganiro cyitwa The Trend, atumira abantu bafite ibintu bidasanzwe, mbona ukuntu abantu babikunze, nkomeza kumukurikirana nanjye nkavuga nti iki kiganiro ngikoze byanshimisha. Ni ukureba hano hafi kuko ibya kure bishobora no kukugora, uvuze ngo urafatira urugero nko kuri Al Jazeera ugasanga umuntu arimo arakora ibintu bikurenze.’’

‘‘Mu gusoma amakuru ho hari umusore bita Trevor Ombija wo kuri NTV asoma amakuru atuje, akavuga ukabona arimo arakubwira nubwo waba udashaka ukabyuma, nkavuga nti uyu muntu ntabwo ndi ku rwego rwe ariko uwamureberaho.’’

Niyibizi muri studio za Royal TV, hano yari yatumiye umwana ufite ubuhanga bwihariye

Niyibizi akunze kwita cyane ku banyempano mu makuru atara


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved