Umubano w’akadasohoka w’u Rwanda na Steve Noah, Umunyamerika w’Indashyikirwa

Yanditswe na Philbert Girinema
Kuya 2 Gashyantare 2018 saa 08:47
Yasuwe :
0 0

Iterambere ry’u Rwanda by’umwihariko nyuma ya Jenoside yakorewe Abatutsi, ni kimwe mu byishimirwa n’amahanga bigatuma n’abataruzi bagira umwete wo gushaka kurumenya; abakora ibikorwa by’ishoramari bakarugana ubutitsa.

Ni ibintu byatumye u Rwanda rugira inshuti nyinshi, yaba izizwi n’izitazwi na benshi zarwihebeye ku mutima. Mu nkuru ya none turagaruka kuri rwiyemezamirimo w’imyaka 70 y’amavuko, Steve Noah ukomoka muri Leta ya Iowa, uhoza u Rwanda ku mutima akanabigaragaza.

Yakoze ibikorwa by’ubucuruzi muri Hongrie, Mexique no mu yahoze ari Leta y’Abasoviyete yaje kwibaruka ibihugu birimo u Burusiya bwa none.

Ni umuntu ubarizwa mu ishyaka rimwe na Donald Trump gusa ibitekerezo bye ntaho bihuriye na we ku ngingo nyinshi. Urugero ni umugabo ubona ko Abanyarwanda baba muri Amerika bakorera byinshi iki gihugu kurusha Abanyamerika baba mu Rwanda; ni bake babitekereza batyo.

Yagize ati “Njya mbwira abantu nti Abanyarwanda baza hano [muri Amerika] bari kudukorera byinshi kurusha ibyo tubakorera. Impamvu ni uko Abanyarwanda baza muri Amerika ni abakozi, bashyira umutima ku bintu, ni abaturage beza […] Ibyo njye n’umugore wanjye twakoreye u Rwanda, mwe [Abanyarwanda] mwadukoreye ibyikubye inshuro eshanu cyangwa icumi. Ibyo niko mbyizera.”

Uburyo Noah afata u Rwanda n’Abanyarwanda bisobanurwa neza na Prof. Silas Lwakabamba wabaye Umuyobozi w’iyari Kaminuza Nkuru y’u Rwanda. Yigeze kuvuga uburyo yagiye muri Leta Zunze Ubumwe za Amerika gusura abanyeshuri b’Abanyarwanda bigayo hanyuma ageze i Washington, Noah abimenye azana indege [Private Jet] ibakura aho ibatembereza Amerika.

Mu myaka 10 ishize, Noah amaze gusura u Rwanda inshuro 27, ni ukuvuga ko nibura nko mu mwaka arusura kabiri. Ntabwo ari uko ahafite ibikorwa by’ishoramari aba akurikirana ahubwo ni urukundo afitiye igihugu n’abagituye.

Bwa mbere ajya kumenya u Rwanda, yarusomaga mu gitabo akanaruganiraho n’umwana we. Nyuma mu 2007 yaje kwakirwa na James Kimonyo wari Ambasaderi w’u Rwanda muri Leta Zunze Ubumwe za Amerika nk’uwari Visi Perezida wa Kaminuza nto yo mu Mujyi wa Iowa yitwa William Penn University ariko biturutse ku mubano wari warabaye mbere ku bwa Ambasaderi Zac Nsenga.

Ibyo biganiro bye na Kimonyo byatanze umusaruro maze Abanyarwanda bane bahita bajya kwiga muri iyi kaminuza muri gahunda ya buruse zitangwa na Perezida wa Repubulika.

Steve Noah yatangiye ashyigikira Kaminuza ya Kibungo

Umubano wa Steve na Kimonyo watumye umunsi umwe asura Pariki y’Akagera mu Burasirazuba bw’Igihugu, aheraho afasha Kaminuza ya Kibungo dore ko yari mu Ntara Kimonyo yabereye Guverineri akaba n’umwe mu bayishinze.

Ati “Ubwo nazaga bwa mbere, njye n’umugore wanjye Kimonyo yatujyanye muri Pariki y’Akagera. Ubwo twagarukaga muri INATEK hari abantu bicaye mu kibuga, ndangije ndamubaza nti aba banyeshuri bategereje iki? Aransubiza ngo bategereje umuntu uza kubagezaho ijambo, ndamubaza nti ni inde? Aransubiza ati ni wowe. Navuganye nabo umwanya muto, sinzi umubare wabo, twavuganye uburyo koleji nkorera twakorana. Kubera icyo, William Penn University yasinyanye amasezerano n’Ikigo kimwe cyo muri Amerika na UNIK [yitwaga Inatek], ku buryo hakoherezwa abahanga mu Rwanda mu gufasha mu bintu bitandukanye.”

Steve yakomeje avuga ko abantu batandukanye baje mu Rwanda by’umwihariko muri iyi kaminuza, bagatangira gukora ibikorwa bimwe na bimwe bibyara umusaruro; barimo Perezida wa William Penn University, haza abandi bazobereye mu bijyanye n’ubworozi bw’inzuki … mu gihe cy’imyaka ibiri ikurikirana.

Kaminuza yayoboye yahaye Kagame impamyabumenyi y’ikirenga

Mu 2012 Kaminuza ya William Penn yahaye Perezida Kagame impamyabumenyi y’ikirenga, imushimira uruhare rwe mu iterambere ry’u Rwanda.

Icyo gihe na Perezida Kagame yashimiye Steve Noah ku buryo yakira Abanyarwanda bajya kwiga muri iki gihugu, akabafasha kwisanga nk’abari mu muryango.

Perezida w’iyi Kaminuza, Dr. Ann Fields, yavuze ko Perezida Kagame ari umwe mu bayobozi ku Isi bashimirwa uruhare mu guteza imbere urubyiruko n’abagore.

Rwanda Day zibera muri Amerika ntazitangwamo

Steve avuga ko ubwo yazaga bwa mbere mu Rwanda, byamusabye kuza yitwaje amafaranga yari gukoresha kuko mu gihugu nta ‘ATM’ n’imwe yari ihari yamufasha kubikuza.

Ati “Urugendo rwa mbere nagiriye hano mu myaka icumi ishize, nta hantu na hamwe muri iki gihugu hari hahari wakoresha ‘credit card’, nta na hamwe. Mu 2013 ubwo twazaga, umuvandimwe wanjye byamusabaga gufata ikarita ya ATM akavana amafaranga kuri banki muri Iowa akayazana inaha. Kuva mu 2008 nta hantu hari hahari wakoresha credit card.”

Ariko uko imyaka yashize, ntabwo ibyo byongeye kumubaho kuko yisanze ahubwo ashobora kubikuza amafaranga aho yaba ari hose mu gihugu bitandukanye n’uko byari bimeze mbere. Iryo ngo ni iterambere ryakomeje kumukurikira ahantu hose ku buryo igikorwa cyose gifite aho gihuriye n’u Rwanda yacyitabiraga, uhereye kuri Rwanda Day.

Ati “Rwanda Day muri Leta Zunze Ubumwe za Amerika yatangiye mu 2008. Nitabiriye zose usibye imwe, iheruka yabereye muri San Francisco kandi nabwo impamvu ni uko nari mu Rwanda. Byatumye mba inshuti na Perezida Kagame, ni umwe mu bayobozi bakomeye ku Isi.”

Amaze kuza mu Rwanda inshuro enye akaba ariho yizihiriza isabukuru. Umubano we na Minisiteri y’Uburezi watumye Abanyarwanda bagera kuri 38 bamaze kwiga muri Kaminuza ya William Penn, nubwo uyu mwaka ariwo wa nyuma hatazakirwa abandi kubera impinduka zakozwe muri iryo shuri.

Noah ahihibikanira iterambere ry’ubuhinzi mu Rwanda

Uyu mugabo ashimangira ko ubuhinzi ari kimwe mu bintu by’ingenzi mu iterambere ry’ibihugu by’umwihariko u Rwanda gusa aho Isi igeze, ahamya ko ari iby’agaciro gukora ubujyanye n’igihe.

Ibi byatumye agira uruhare mu kugeza muri Kaminuza ya Kibungo (UNIK) imashini izafasha urubyiruko ruyigamo kuzamura ubumenyi bwabo aho igitekerezo ari uko rwazabasha kwikorera izindi zimeze nkayo.

Ati “Mu gihe UNIK yaba imaze gukora inyigo igasanga ishobora gukorerwa mu Rwanda, tuzafasha Abanyarwanda ku buryo bubaka uruganda rwo gutangira gukora izi mashini imbere mu gihugu. Tuzakora nk’abajyanama, tuzafasha Abanyarwanda, nta nyungu dutegereje, turashaka gutangira ubushabitsi bw’Abanyarwanda, bubahesha imirimo, ku buryo byaba ari ibintu Abanyarwanda bajyana hanze.”

Usibye ibi bikorwa, Steve Noah asanzwe ari umujyanama mu mishinga igamije iterambere bihereye mu kumenya icyo umuntu yifuza kuba cyo mu mibereho ye binyuze muri porogaramu yiswe Kudler.

Umunyamerika Steve Noah, inshuti y'u Rwanda y'akadasohoka aganira n'Umunyamakuru wa IGIHE
Steve Noah ni umuherwe ubarizwa mu ishyaka ry'aba-Républicains rya Perezida Donald Trump
Steve Noah ahihibikanira icyateza imbere uburezi bw'u Rwanda binyuze mu gufasha abanyeshuri kwiga muri Kaminuza zikomeye muri Amerika
Steve yavuze ko Abanyarwanda baba muri Amerika bakorera byinshi iki gihugu kurusha ibyo Abanyamerika baba mu Rwanda bafasha urwa Gasabo
Steve Noah aganira n'abanyeshuri bo muri UNIK yabagaragarije ko ubuhinzi ari kimwe mu by’ingenzi mu iterambere ry’ibihugu ndetse bugomba gukorwa bijyanye n’igihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza