Uko Nkurikiye Solange yageze ku rwego rwo gutunga ‘Coaster’ 15

Yanditswe na Kanamugire Emmanuel
Kuya 17 Ukwakira 2016 saa 08:13
Yasuwe : XX
0

Rwiyemezamirimo w’umugore, Nkurikiye Solange ni umwe mu bavuga imyato ikigega BDF cyashimye umushinga we wo gutwara abantu muri Kigali kikamuha ingwate yatumye agera ku rwego rwo kugura imodoka (Coaster) 15.

Nkurikiye ni umubyeyi ufite umwana umwe, warangije Kaminuza mu by’ubucuruzi yiyemeza kwagura ibitekerezo abyaza umusaruro amahirwe Leta y’u Rwanda yashyiriyeho umugore, arimo n’ikigega gitera inkunga imishinga mito n’iciriritse y’abagore n’urubyiruko BDF.

Mu kiganiro cyihariye Nkurikiye yagiranye na IGIHE, yavuze ko mbere yagize igitekerezo cyo gushora imari mu gutwara abantu, akakigeza kuri Banki y’u Rwanda Itsura Amajyambere kuko yifuza gukorana na yo ikamufasha guhura na BDF.

Yagize ati “Natangiye muri 2014, BRD indangira BDF bituma niyumvamo kujya mu bwikorezi kuko numvaga hari icyo BDF iri bumfashe gikuru kandi cya ngombwa.

Yampaye ingwate ya 75% by’umushinga wose wo kugura Coaster eshanu numvaga nshaka gutangiza njye nitangira 25%.”

Akomeza avuga ko kugira intego no gukomeza gukorana neza na banki yishyura ku gihe, byatumye nyuma y’imyaka ibiri gusa yiyemeza gusubira muri banki ngo bamwongerere igihe cy’inguzanyo yagure umushinga we.

Ati “Nyuma y’imyaka ibiri nabitekerejeho ndavuga nti ‘ubwo mbona ko umushinga ugenda neza kuki ntasubira muri banki ngo mbagezeho igitekerezo’, nasubiyeyo bambwira ko bishoboka banyemerera kongera igihe cy’inguzanyo. Bansubije yego none natumijeho izindi Coaster icumi nishingiwe na BDF ngurizwa na BRD, nazo zizaza vuba.”

Izo modoka nizigera mu Rwanda ziziyongera ku zindi eshanu yatangiranye zibarizwa muri Koperative yo gutwara abantu n’ibintu RFTC, zikaba zikorera mu cyerekezo cya Kagugu na Kimironko.

Uretse kwiyubaka mu buzima busanzwe, ishoramari rya Nkurikiye rimufasha no guteganyiriza abana amashuri, kubaka inzu ndetse n’ibindi nkenerwa mu buzima bwa buri munsi akabasha kubibona.

Abandi bagore bakora iki?

Nkurikiye atanga inama ku bandi bagore akabibutsa ko kwitinyuka, kugira intego no kwihangana aribyo byatuma bagera ikirenge mu cye.

Yagize ati “Kwitinyuka no kumenya icyo ushoboye gukora no gukoresha ubushobozi buke bushoboka, bishobora gutangira ikintu bikagihagurutsa kandi mu myaka iri imbere kikagira icyo kikumariye.”

Akomeza ababwira ko gukorana n’amabanki ari kimwe mu byabateza imbere kandi bakabyaza umusaruro amahirwe Leta yabashyiriyeho nk’amabanki akorana n’abagore, ibigo n’ibigega by’imari bigamije kuzamura umugore.

Ku rundi ruhande ariko Nkurikiye agaruka ku mbogamizi zikigoye ishoramari mu Rwanda zirimo inyungu ku nguzanyo ikiri nini hagati ya 16-18%.

Mu myaka itanu, BDF imaze gushora 62 689 952 320 z’amafaranga y’u Rwanda, zafashije imishinga y’ubucuruzi mito n’iciriritse 23 411, mu guhanga imirimo ibihumbi 145 222.

Muri zo, miliyari 50 zatanzweho ingwate zifasha abantu kubona inguzanyo ya miliyari 174 965 270 853 z’amafaranga y’u Rwanda.

Urubyiruko rurenga 9000 n’abagore barenga 7000 bamaze guterwa inkunga na BDF muri gahunda zirimo guhabwa ingwate, ubujyanama n’ibindi.

Muri BDF imishinga y’Ubuhinzi n’Ubworozi ntijya irenza ingwate ya miliyoni 500, mu gihe iyindi itari iy’ubuhinzi n’ubworozi itarenza miliyoni 300.

Ubu BDF ikorera mu turere twose tw’igihugu ikaba ifitanye amasezerano n’ibigo by’imari bigera kuri 503.

Nkurikiye Solange yahawe ingwate na BDF, ubu ageze ku rwego rwo gutunga coaster 15

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza