Masaka: Uruhu n’umugano byatumye urubyiruko ruryoherwa n’ubuzima

Yanditswe na Tombola Felicie
Kuya 12 Mutarama 2017 saa 11:22
Yasuwe :
0 0

Ubuzima bw’abayobotse kwiga umwuga wo gukora inkweto mu ruhu no gukora ububoshyi n’ububaji mu migano bwarahindutse kuko bavuga ko n’abagiyeyo baseta ibirenge ubu babyinira ku rukoma.

Bamwe mu banyeshuri bitabiriye kwiga imyuga mu Kigo cya Masaka Business Incubation Center cyashyizweho n’Ikigo gishinzwe guteza imbere imyuga n’Ubumenyingiro WDA, bo mu murenge wa Masaka mu karere ka Kicukiro, bagaragaje ko bavuye ibuzimu nyuma yo kwitabira imyuga.

Mu kiganiro IGIHE yagiranye n’abatangiye gukirigita ifaranga babikesha gukura amaboko mu mufuka bakiga umwuga, bagaragaje ko hari byinshi bamaze kugeraho kandi ko imihigo ari yose.

Dusabeyezu Alphonse w’imyaka 18 akimara gucikiriza amashuri yisumbuye yumvaga ubuzima burangiye ndetse ngo ajya gufata icyemezo cyo kujya kwiga ibyo gukora inkweto yadendaga aseta ibirenge.

Ati “Nyuma yuko uwandihiriraga amashuri yisumbuye yari amaze kwitaba Imana namaze igihe numva mbihiwe, nyuma naje gufata umwanzuro wo kuza kwiga umwuga kandi nabwo naje ari nko kubura uko ngira.”

“Ubu ngubu nibeshejeho kandi mfite uruhushya rwo gutwara ibinyabiza rwo mu rwego rwa B. Hari n’ibindi bikorwa nagezeho nko kugura amatungo magufi. Uruhu rurantunze , ku kwezi nshobora nko kubona inyungu y’amafaranga ibihumbi 130 bitewe n’izo nakoze.”

Niyomwungeri Jean Israel warangije amashuri yisumbuye we yatangaje ko amaze kwiyubakira inzu abikesha gukora inkweto.

Ati “Nkirangiza amashuri yisumbuye ubuzima bwari bugoye, kubyukira ku muryango ntafite icyo nkora byari ibizazo. Aho nziye kwiga gukora inkweto ubu maze kwiyubakira inzu mu rugo y’icyumba na salon ntabwo nkibyigana n’ababyeyi mu nzu.”

Niyomwungeri avuga ko nko ku kwezi yinjiza amafaranga ibihumbi biri hagati ya 100 na 150 bitewe n’uko akazi kabonetse.

Ati “Nihaye intego yo kuzigama ibihumbi 50 buri kwezi, andi nkayakoresha mu kurangura ibikoresho ndetse no gukemura ibibazo by’ubuzima busanzwe.”

Abakoresha imigano nab o bayivuga imyato

Bikorimana Bertin, umugabo warangije icyiciro cya mbere cya Kaminuza, avuga ko yatungwaga no gukora ubuyede n’utundi tuntu dutuma bucya bukira gusa.

Ati “Nk’umuntu warangije kaminuza nasanze nkwiye kuba nzi umwuga kandi bikaba akazi karambye gahoraho.Ni yo mpamvu umwaka ushize wa 2016 nize ibyo gukora ububoshyi mu migano, dukoramo ingofero, amavazi, ibikapu, intebe, ameza n’ibindi.”

Avuga ko bimuteye ishema cyane kuko ibyo yamuritse muri ‘Made in Rwada Expo’ byose byaguzwe kandi n’ubu akaba abona abakiriya bamubwira kubakorera ibikoresho bimwe na bimwe.

Ati “Niba rubanda rubikora rutarize bikarutunga ahubwo mbona ko uwize kaminuza we yabibyaza umusaruro kurenzaho akabicunga neza, agashaka amasoko mu buryo bugezweho ndetse no kwagura ibikorwa.”

Mbabazi Yvonne we n’abandi bagenzi be bane bakoze sosiyete ikora ibikoresho byo mu nzu mu migano bayita ‘Icyizere Ltd.”

Ati “Twasanze dufite ubuhanga n’abandi badafite kandi icyizere nkatwe ku bakobwa kirahari kuko duherutse gukorera amafaranga miliyoni enye n’igice binyuze mu guhugura andi makoperative y’urubyiruko yo mu Ntara y’Amajyaguru kugira ngo na bo baziteze imbere babikesha umugano.”

Uru rubyiruko rusaba ko abantu bakwiye gukunda kugura ibikorerwa mu Rwanda kuko ari byiza kandi biramba.

Ati” Nkatwe hano dukora utwihaganyuzo tw’amenyo (Cure dent ) kandi hari abakirangura ibiturutse mu Bushinwa, ni byiza ko abantu bakunda ibikorerwa mu Rwanda bagateza imbere igihugu cyayu.”

Umuyobozi w’agateganyo w’Ikigo cya Masaka Business Incubation Center, Kagango Diogène we yatangaje ko iki kigo cyakira abantu bose igihe bafite ubushake bwo kwiga kandi ko iyo basoje amasomo yabo y’igihe cy’amezi atatu bahabwa andi mezi atatu barimo gukoresha imashini n’ibikoresho by’ikigo kugira ngo nabo babashe kwikorera amafaranga yabo bazabashe kwigurira ibyabo bikoresho ubwo bazaba bagiye hanze ku isoko ry’umurimo.

Ikigo cya Masaka Business Incubation Center giherereye mu Kagali ka Cyimo, umurenge wa Masaka mu karere ka Kicukiro.

Cyakira abanyeshuri 150 buri mezi atatu bamwe bakiga ibyo gukora inkweto, gukora ububoshyi n’ububaji mu migano, gutunganya imbuto zigakorwamo imitobe ndetse no gutunganya ibikomoka ku mata.

Bakora inkweto mu ruhu zaba iz'abana n'abakuru
Ubuhamya uru rubyiruko rutanga ni uko gukora inkweto byabahinduriye ubuzima
Intebe zikoze mu migano zibinjiriza akayabo
Imigano ivamo ibikoresho bitandukanye birimo n'ingofero
Ibikoresho bikorwa mu migano
Bikorimana Bertin ni umugabo uvuga ko bitamuteye ipfunwe kuko abobonamo ahazaza heza
Uyu mugabo akora imirimo y'ubukorikori nyuma yo kurangiza amasomo ya kaminuza
Abakora aka kazi baba bafite akanyamuneza kenshi

Amafoto: Tombola Felicie

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244