Joseph Habineza yatangiye gukora Makaroni yise ‘Pasta Joe’

Yanditswe na Kanamugire Emmanuel
Kuya 8 Ugushyingo 2016 saa 09:02
23 22

Ambasaderi Joseph Habineza yamaze kugeza ku isoko ryo mu Rwanda Makaroni zahawe izina rya ‘pasta Joe’, akorerwa n’uruganda rwo mu Misiri rwitwa ‘Antoniou’.

Ni igitekerezo Ambasaderi Habineza avuga ko yagize hambere aha, ubwo yari yagiye gutanga ikiganiro ku rubyiruko rwarokotse Jenoside yakorewe Abatutsi i Huye, mu Ntara y’Amajyepfo.

Ati “Ndabyibuka icyo gihe bari mu ngando i Huye, n’uko mu gihe turimo kuganira ku ndangagaciro z’umuco wacu nza kugeraho ndavuga nti ‘iyi ni nk’ivanjiri ya "Saint Joe". Nyuma ndi mu nzira ntaha mbitekerejeho, nibuka ko rimwe nkikora muri Heineken i Lagos, Umupasitori w’Umunye-Congo yigeze kumbwira ngo naza mu Rwanda azasanga narabaye Pasiteri. Ni ho nakuye igitekerezo cyo guhanga ‘brand’ yitwa "Pasta Joe", nsanga natangirira mu kugaburira imibiri mbere y’uko nazagira umuhamagaro wo kugaburira roho.”

Yakomeje agira ati “Naje kuzajya mbiganira n’abantu batandukanye ariko nkabona bitabashishikaje, aho mboneye umwanya uhagije wo kwikorera nahise ntangira gushakisha uko nashyira mu bikorwa izo nzozi zanjye.”

“Nabanje gushakira mu bantu nzi mu Bushinwa nkoresheje internet, nyuma nshakira mu Butaliyani kugira ngo mbone abafatanyabikorwa b’inzobere mu gukora Makaroni, maze nyuma mfata icyemezo cyo kubanza kubaka izina mbere yo kubaka uruganda.
Nagiye mu Misiri nsura uruganda rwitwa "Antoniou" mbasaba kuzajya bankorera Makaroni ariko mbanza kuzizanira Ikigo cy’Ubuziranenge, RSB bampa icyemezo ko zujuje ibyangombwa byose.”

Nk’uko nyir’ubwite abyivugira, izi makaroni zifite umwihariko mu buryohe, zishya vuba kandi zibereye cyane abakora siporo.

Kugeza ubu zamaze kugezwa ku isoko ry’u Rwanda, ndetse hari gushakwa uburyo zakwirakwizwa hirya no hino mu gihugu no mu Karere ka Afurika y’Iburasirazuba.

Mu gihe byagaragara ko zikunzwe, Ambasaderi Habineza avuga ko hazafungurwa uruganda ruzikora mu Rwanda.

Joseph Habineza mbere yo kwikorera ku giti cye, yarakoreye uruganda rwa Heineken i Kinshasa, mu 1994-1998, ndetse aza no kuba Umuyobozi ushinzwe ikoranabuhanga muri Heineken muri Nigeria, mu 1998-2000.

Muri Nzeri 2004-Gashyantare 2011 yabaye Minisitiri wa Siporo n’Umuco, mu 2011- 2014 agirwa Ambasaderi w’u Rwanda muri Nigeria.

Amb. Habineza afite umugambi wo kubaka uruganda rukora makaroni mu Rwanda, mu gihe izo yatangiye gukoresha hanze zaba zikunzwe
Izi makaroni ngo zifite umwihariko wo kuba zifite uburyohe butagereranywa

[email protected]


Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE