Kwamamaza

Ibikorerwa mu Rwanda bigiye gutangira gucururizwa kuri Internet muri USA na Canada

Yanditswe kuya 24-11-2016 saa 10:13' na IGIHE


Yicaye aho atuye i Sacramento muri Leta ya California, yari arimo kuruhuka asoma ku mutobe w’imbuto “Agashya” ukorwa n’uruganda rwa Nyirangarama, ubwo yarimo yumva uburyohe bw’ikirahure cya nyuma nibwo igitekerezo cyo gushinga urubuga rucuruza ibituruka mu Rwanda cyaje muri Keila Gasabwa amaze gushakisha ku mbuga za internet hose aho yakura Agashya ndetse no kubaza mu nshuti ze za hafi niba nta wenda guturuka mu Rwanda agaheba.

Uyu mukobwa ukiri muto wigaragaje bwa mbere mu ruhame muri Rwanda Day iherutse kubera i San Francisco muri California, mu kiganiro cyihariye yagiranye na IGIHE, yavuze ko amaze gushakisha Agashya akakabura yatekereje ko hari abandi bahuje ibyifuzo byo kubona ibituruka mu Rwanda maze ahita yiyemeza kuba umuyoboro w’ibicuruzwa biva mu Rwanda byerekeza ku mugabane wa Amerika maze we n’abo bafatanyije biyemeza gushinga urubuga bise www.madeinrw.com.

Kuri uru rubuga niho abatuye mu bihugu bya Leta Zunze Ubumwe za Amerika na Canada bazabasha gutumiza ibyo bakeneye biva mu Rwanda kuva muri Mutarama 2017, bikazajya bibasanga aho batuye mu rugo iwabo, si abo gusa ariko kuko na nyuma yaho n’abo mu bindi bihugu hirya no hino ku isi bazabasha guhaha ibituruka mu Rwanda bakoresheje uru rubuga.

Agashya, akanozo, akabanga, akarusho, akandi, isombe, ubugari bwa Kinazi, imyambaro n’ibindi bicuruzwa by’amoko yose birimo imyambaro ntabwo bizongera kubera ihuruzo ubishaka uri ku mugabane wa Amerika kuko azajya abasha kubitumiza yiyicariye iwe mu rugo bikahamusanga.

Kuri ubu Gasabwa n’abandi bafatanyije gushyira mu bikorwa iki gitekerezo barakora amanywa n’ijoro kugira ngo mu ntangiriro za Mutarama 2017 abazaba babishaka bazabashe gutangira umwaka wa 2017 bumva uburyohe bw’ibikorerwa i Rwanda.

Keila Gasabwa,umwe mu bagize igitekerezo cyo gushinga uru rubuga

Abo muri NAEB basanga iki gitekerezo ari inyamibwa

Aganira na IGIHE, Sandrine Urujeni, Umuyobozi w’Ikigo cy’Igihugu gishinzwe kohereza mu mahanga ibikomoka ku buhinzi n’ubworozi (NAEB ) yavuze ko uru rubuga rugiye kuba umuyoboro mwiza uzatuma ibikorerwa mu Rwanda bimenyekana ku ruhando mpuzamahanga.

Urujeni yashimangiye ko hari hakenewe uburyo butuma gahunda u Rwanda rwiyemeje yo guteza imbere ibikorerwa mu Rwanda imenyekana ndetse ikinjira mu bantu bikaba umuco.

Ati "Ni byiza cyane kuko bigiye gutuma ibikorerwa mu Rwanda bimenyekana ku ruhando mpuzamahanga cyane cyane nkatwe turi mu bikomoka ku buhinzi, bizadufasha cyane."

Ubu buryo buzafasha by’umwihariko mu kongera umusaruro w’ibyoherezwa mu mahanga wari warasubiye inyuma mu mezi atandatu ya mbere ya 2016 ugabanukaho 2.4%, uba miliyoni 268.57 z’amadolari uvuye kuri miliyoni 275.12 z’amadolari.

Umuyobozi w’Urugaga rw’Abikorera mu Rwanda, Benjamin Gasamagera yatangarije IGIHE ko icyo gikorwa nikiramuka kigezweho bizaba ari ingenzi kuko u Rwanda ruzaba rubonye isoko hanze handi ku buryo buhoraho.

Ati “ Bizadufasha cyane kuko nibyo duhora twifuza, ndetse bidufasha kugira ngo ibicuruzwa byacu bimenyekane hanze.”

Sina Gerald ucuruza ibikorerwa mu Rwanda, yakirije yombi iki gitekerezo avuga ko kuri we ari umugisha ukomeye kuko bigeye kumufasha kubona isoko ryo hanze.

Ati “Kuri twe tubihinga twarangiza tukabihinduramo ibindi bintu, ni amahirwe akomeye kubona iryo soko ryo hanze, kandi bizanadufasha kwinjiza ya madovize duhora twifuza.”

Mu ntego za Made in RW inc harimo kumara urukumbuzi abaguzi b’ibicuruzwa bituruka mu Rwanda aho umuguzi azajya asura urubuga www.madeinrw.com agahitamo ibicuruzwa yifuza ubundi bikamugeraho aho yaba ahereye hose muri Amerika ndetse na Canada.

Ikindi Made in RW Inc ishimangiye cyane ni uguteza imbere abacuruzi bo mu Rwanda, ikabaha ububasha bwo kugeza ibicuruzwa byabo ku masoko mpuzamahanga.

Mu gihe ibicuruzwa bizashyirwa ku mugaragaro muri Mutarama, birashoboka ko wasura urubuga rwabo maze ukabasha gutanga ibitekerezo cyangwa ibyifuzo ukaba wanabasha gutsindira bimwe mu bicuruzwa bituruka mu Rwanda bikakugeraho mbere ya Noheli.

Birashoboka kandi ko nawe waba wifuza gukorana na Made in Rwanda, icyo bigusaba ni ukwandika kuri [email protected], cyangwa ugakoresha zimwe mu mbuga nkoranyambaga kuri Instagram, Facebook na Twitter.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved