Gasore wakijijwe ibikomere bya Jenoside na siporo yitangiye abatuye aho yababarijwe

Yanditswe na Manzi Rema Jules
Kuya 16 Mata 2018 saa 04:06
Yasuwe :
0 0

Nyuma y’imyaka 24 Jenoside yakorewe Abatutsi ibaye, abari ibibondo bayirokotse ubu bahagaze bwuma, bamwe bubatse ingo, abandi bigarurira icyizere cyo kubaho, aho batanga umusanzu mu kunga umuryango Nyarwanda washegeshwe n’urwango rwabibwe n’ubutegetsi bubi.

Gasore Serge uvuka i Ntarama mu Karere ka Bugesera ni umwe mu barokotse Jenoside yakorewe Abatutsi, icyo gihe yari afite imyaka umunani. Yanyuze mu buzima bw’inzitane, anasigarana ibikomere byo kwicirwa mu maso abavandimwe be nawe amara igihe mu mirambo n’imivu y’amaraso.

Kuri ubu yabaye umugabo uhamye, afite umuryango n’abana batatu, n’icyizere cy’ahazaza cyaragarutse, yarenze ibibazo yaciyemo ariyubaka ariko by’umwihariko arenga kwirebaho ku giti cye, yitangira abatuye mu gace iwabo bari batuyemo i Ntarama.

Mu bikorwa byaguye yahakoreye birimo gutera kubaka inzu zifasha abafite ibibazo bitandukanye, amashuri, ivuriro ndetse ari no mu nzira zo kubagezaho amazi meza nka kamwe mu duce dukunda guhura n’iki kibazo.

Inzira y’umusaraba Gasore yaciyemo muri Jenoside

I Ntarama ni hamwe mu hantu Abatutsi bishwe mbere ya Jenoside. Gasore avuga ko nubwo yari muto, yatangiye kubona ivangura rikomeye mu mashuri mu 1992, biza kuba indengakamere mu 1994 muri Jenoside yakorewe Abatutsi.

Yagize ati “I Ntarama hari mu hantu hageragerejwe Jenoside, hakorwa ibikorwa bitandukanye by’ivangura ariko mu 1992 ho hatangiye gukorwa ubwicanyi, abantu bakicwa basanzwe mu ngo no mu nzira.”

Jenoside itangira, bamwe mu bagize umuryango wa Gasore babaga i Kigali ariko we yari i Ntarama aho yabanaga na nyirakuru, baje no guhungana muri Kiliziya y’i Ntarama ariko akaza kuhicirwa abireba.

Gasore n’abandi Batutsi bari basigaye mu Kiliziya ari bazima, bavuye i Ntarama bahungira i Cyugaro ku Mashuri Abanza, bahaba igihe aho bahararaga ariko ku manywa bakajya kwihisha mu rufunzo rukikije Akanyaru.

Interahamwe zimaze kumenya amakuru y’aho bahungiye zarabateye, zicamo benshi, abarokotse bajya kwihisha mu rufunzo. Aho bajyaga kwikinga hose, zakomezaga kubica ariko nabo bafata icyemezo cyo kwirwanaho bakoresheje amabuye gusa baza kunanirwa kuko bari bahanganye n’abafite imbunda, imihoro n’amacumu.

Gasore avuga ko nubwo byari bigoye cyane, kuko bataryaga, imbaraga zari zarabaye nke, bakomezaga kugira icyizere bakihagararaho kuko bumvaga amakuru ko Inkotanyi ziri hafi kubageraho. Inzozi zabo zaje kuba impamo, ingabo zari iza FPR Inkotanyi zihagarika Jenoside zisanga muri bo hari abagitera akuka zirabarokora, zibaha ibyo kurya n’imiti ku bari barakomeretse cyane.

Gasore Serge yakize ibikomere bya Jenoside kubera siporo nyuma yitangira abatuye aho yaburiye abavandimwe n'inshuti

Uko Siporo yamukijije ibikomere bya Jenoside

Gasore n’abo mu muryango we barokotse bafatanye urunana mu kwiyubaka nubwo bari bafite ibikomere byinshi ku mubiri no ku mutima.

Yagize ati “Nyuma ya Jenoside ntabwo byari byoroshye kuko twari twarabuze ababyeyi badukundaga, inshuti zatubaga hafi, tutakiri iwacu noneho hakiyongeraho ihungabana nta bumuntu bwari bukiturimo, umuntu yari yarabaye nk’agakoko.”

Yaje gusubira mu ishuri ariko yumva ntacyo abikorera kuko yari yarataye icyizere cy’ubuzima. Ageze mu mwaka wa Kabiri w’Amashuri Yisumbuye mu 2002 nibwo yicaye, areba ku byabaye byose n’inzira yanyuzemo akarokoka, afata icyemezo ko bigomba kumutera imbaraga ahubwo agakora cyane kugira ngo abeho neza, abamugize impfubyi batazishimira kumubona yarabaye uko bamwifuzaga.

Yatangiye kwiga ashyizeho umwete atangira no kwishakamo impano yaba afite aza gusanga ashoboye kwiruka ku maguru ‘Athlétisme’. Yabikoze mu mashuri yisumbuye bimufasha kwiga atishyura ahubwo atangira kugenda abona amafaranga make yamworoherezaga no kugira abo afasha bari bababaye.

Yagize ati “Maze kubona ko mfite impano yo kwiruka ku maguru byaramfashije cyane, nongera kwigirira icyizere. Nabanje gukinira ikigo nigagamo, ntangira gutsinda amarushanwa, bimfasha kwiga ntishyura, ngenda nzamuka no ku rwego rw’igihugu ntangira kwitwara neza.”

Yakomeje ati “Ndangije amashuri yisumbuye, Kaminuza zitandukanye hano mu Rwanda zarandwaniraga kugira ngo nzijyemo nzikinire nubwo nari mfite buruse ya Leta kuko nari nagize amanota meza. Nahise mbona Kaminuza yo muri Leta Zunze Ubumwe za Amerika yitwa ‘Abilene Christian University’ yashakaga ko nyijyamo nkayikinira, nkigira ubuntu.”

Muri iyi Kaminuza, Gasore yakomeje kuzamura urwego rwe mu gusiganwa ku maguru ayifasha kwegukana amarushanwa atandukanye nawe ariga ararangiza, bituma ahura n’abantu benshi, bafite inararibonye bimufasha kubona ko atariwe ufite ibibazo bikomeye wenyine.

Kuva mu 2008 akiri umunyeshuri yari yaratangiye ibikorwa byo gufasha abaturage i Ntarama, akoresheje amafaranga yari yaragiye azigama kuyo yabonaga akuye mu gukina.

Ishimwe ku mugore we, Esperance Gasore

Nubwo kuva mu 2008, Gasore yari yaragize ibitekerezo byinshi by’ibyo yakora ngo afashe Abanyarwanda bafite ibibazo by’umwihariko ahereye iwabo i Ntarama, aho yagiriye ibibazo bikomeye akanahaburira umuryango we, inzozi ze zabaye impamo nyuma yo gushaka umugore.

Yagize ati “Naratekereje nk’ikiremwamuntu nsanga kuba nararokokeye i Ntarama bidahagije ahubwo ngomba no kujyanayo ibikorwa byafasha abaturage baho. Nibwo natangiye gukora udukorwa duto nari nshoboye icyo gihe nko guha abaturage amatungo, kubishyurira mituweli n’utundi dutandukanye nkiri umunyeshuri.”

“Aho nshakiye umugore mu 2010 noneho imbaraga zari ziyongereye, nibwo natangiye gutekereza mu buryo burambye ibintu bizagera ku baturage haba i Ntarama no mu gihugu hose.”

Gasore ashimira bikomeye umugore we wakiriye neza ibitekerezo yari afite byo gufasha abaturage, ntiyirebeho gusa n’umuryango we, akanima amatwi abamubwiraga ko umugabo we yasaze arimo kwica nabi amafaranga.

Yashimiye Perezida Kagame watumye u Rwanda rwongera kuba igihugu kibereye bose, Abanyarwanda bakongera kubana mu mahoro, ari nayo mpamvu babasha kugira ibikorwa bitandukanye bakora kandi ntihagire uhutazwa.

Ku musozi Gasore yaburiyeho bamwe mu bo mu muryango we bishwe muri Jenoside, yahubatse inzu zifashishwa n'abatishoboye

Uko yatangiye kubaka inzu i Ntarama mu Kigo kizwi nka “Gasore Serge Foundation”

Mu 2014 Gasore yanditse igitabo kuri Jenoside yise ‘My Day to Die’ cyagurishijwe cyane. Amafaranga yavuyemo yongereye ku yo yari yarazigamye, atangira kugura ibibanza ahantu hari hasanzwe ari amashyamba.

Yaguze ubutaka, aza kugira ahantu hanini ndetse mu 2016 atangira ibikorwa byo kubaka inzu zitandukanye na byo akabikora uko abonye ubushobozi.

Kugeza ubu amaze kubaka inzu 15 zirimo amashuri y’incuke yigamo abana bo mu miryango ikennye y’i Ntarama, ivuriro ryita ku buzima bwabo umunsi ku munsi rikanafasha n’abandi baturage bahegereye, inzu zifasha kunga imiryango ifitanye amakimbirane, izikorerwamo n’abagore biga imirimo irimo kuboha uduseke no kudoda.

Abana bahabarizwa barimo abafite ibibazo, byatumye ashyiraho uburyo babona igikoma, ibiryo ndetse anahororeye inka zitanga amata banywa. Muri iki kigo hororerwa amatungo magufi ari nayo avamo ahabwa abaturage batishoboye buri mwaka.

Ikigo “Gasore Serge Foundation Community” gifite abakozi bahoraho 34 ahemba ku kwezi n’abandi 150 bakora nyakabyizi, bakora imirimo yose.

Ateganya ko mu gihe kiri imbere ibikorwa by’i Ntarama azabyegurira abaturage

Nubwo ibikorwa amaze kugira i Ntarama atatangaje agaciro kabyo, Gasore yavuze ko afite inzozi zo kubaka amashuri abanza kuva mu wa mbere kugera muwa gatandatu mu kurushaho kwegereza abaturage ibikorwa by’iterambere.

Yagize ati “Numva nzagarukira kuri iri shuri ribanza kuko nzaba ntanze inkunga nshoboye icyo gihe, nanjye nzajya muri gahunda zanjye zo kwiyubaka n’umuryango wanjye. Icyo gihe nzabishyira mu maboko y’abaturage. Iyo urebye n’uyu munsi baba bari hano, ibikorwa babyiyumvamo, ubwo nimbibegurira wenda sinzabajya kure kugira bitangirika ariko nibo bazaba babyicungira ubwabo.”

Muri Gashyantare 2018, Gasore yahawe igihembo na Abilene Christian University yo muri Leta Zunze Ubumwe za Amerika nk’umuntu wakoze ibikorwa bidasanzwe bifitiye akamaro abantu benshi; muri Werurwe kandi umugore we, Gasore Espérance bakorana muri ibi bikorwa akaba ari n’Umuyobozi w’Ivuriro bubatse, nawe yahembwe na Ambasade ya Amerika nk’umugore w’indashyikirwa wagaragaje umurava mu mirimo ye.

Gasore avuga ko ibi bihembo byabongereye imbaraga bumva ko ibyo bakora hari ababishima nubwo ku giti cyabo babiyoborwamo n’umutima w’urukundo utuma batirebaho gusa.

Umwarimu wigisha kudoda yerekana ibyo bakora birimo ibikapu
Abagore n'urubyiruko ni bo bitabira kwiga imyuga cyane
Bakora imitako y'uburyo butandukanye
Bimwe mu bikoresho bikorwa n'ababyeyi bigira kuboha kwa Gasore
Imiti yifashishwa mu Ivuriro ryatangijwe na Gasore Serge Foundation
Ivuriro rifite ibikoresho bitandukanye byifashishwa mu kureba uko ubuzima bw'abana baharererwa buhagaze
Mbabazi Sabine, umwe mu baganga bakora mu Ivuriro rya Gasore Serge Foundation
Umuganga w'Isanamitima, Umulisa Aimée Josiane
Gasore afite gahunda yo kuzegurira ibi bikorwa abaturage mu gihe kiri imbere
Muri Gasore Serge Foundation hari amashuri y'incuke, ivuriro n'izindi nzu zifasha mu kunga ingo zifitanye ibibazo
Gasore amaze kubaka inzu 15 ku ivuko i Ntarama
Gasore ari kubaka ibyumba bizakoreramo amashuri abanza i Ntarama mu Bugesera

Amafoto na Video: Kazungu Armand


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza