Dr Ntizimira yahawe igihembo mpuzamahanga kubera impinduka yaharaniye mu buvuzi

Yanditswe na Rabbi Malo Umucunguzi
Kuya 2 Gicurasi 2017 saa 01:36
Yasuwe :
2 0

Impuguke zigaragaza ko iyo umuntu arwaye indwara zikomeye kandi zidakira nka kanseri, diyabete, Sida n’izindi, uretse indembe iri mu bitaro ibarira iminsi ku ntoki, abagize umuryango na bo bahungabana, umutungo ukabashiraho ndetse bamwe bagatererana umurwayi agasiragara mu maboko y’abaganga gusa.

Nyamara hari uburyo butandukanye bushobora kwifashishwa mu kugarura icyizere cy’umurwayi cyangwa cy’umuryango nubwo indwara yaba ntaho igiye, uburibwe bukagabanuka umuntu akiremamo icyizere, haba mu buryo bw’umubiri, imitekerereze cyangwa imyizerere.

Guharanira isakazwa ry’ubwo buryo bufasha abarwayi buzwi nka “palliative care”, nibyo byahesheje igihembo Umunyarwanda Dr. Christian Ntizimira, agihawe n’Ishuri ry’Ubuvuzi rya Harvard. Yanashimiwe uruhare rwe muri komisiyo iharanira ikwirakwizwa ry’ubwo buryo bugabanya uburibwe buturuka ku ndwara zikomeye, ‘Lancet Commission on Global Access to Palliative Care and Pain Control’.

Icyo gihembo cyiswe “Distinguished Young Leader Award,” Dr Ntizimira yagishyikirijwe mu nama ngarukamwaka ya Global Health Catalyst Summit yabereye mu mujyi wa Boston muri Leta Zunze Ubumwe za Amerika, kuwa 28 Mata 2017.

Ubwo yakiraga icyo gihembo, Dr Ntizimira yashimiye Guverinoma y’u Rwanda, aho mu 2011 u Rwanda rwabaye igihugu cya mbere muri Afurika cyemeje gahunda y’ubufasha buherekeza ubuvuzi busanzwe, National Palliative Care Policy.

Nyuma ngo hanasohotse gahunda y’imyaka ine yagenaga uko ubu bufasha butangwa mu nzego zose z’ubuvuzi, ibintu byahaye umwanya abantu nka Dr Ntizimira bashishikajwe no guteza imbere uko umurwayi yitabwaho.

Ubwo yakiraga iki gihembo yagize ati “Kirumvikanisha ijwi ry’umurwayi n’iry’imiryango y’abantu barwaye. Si igihembo cyanjye bwite, ni icy’abarwayi n’imiyango mu Rwanda ifite uburwayi bukomeye. Bakwiye kwitabwaho bagahabwa agaciro, mu bumuntu, by’umwihariko mu bihe bikomeye.”

“Iki gihembo kiranyereka ko bishoboka kugira uruhare mu mpinduka mu buvuzi ku Isi uhereye ku rwego rwo hasi. Mu kurushaho kubyumvisha abafatanyabikorwa mu buvuzi, gukomeza gufatanya, gushyikirana no guhanga udushya, ingorane zihariye zishobora kurwanywa.”

Inama yatangiwemo icyo gihembo yitabiriwe n’impuguke zaturutse mu bihugu byo muri Amerika ya Ruguru, u Burayi na Afurika, intumwa z’u Rwanda zikaba zari ziyobowe na Minisitiri w’Ubuzima, Dr Diane Gashumba.

Dr. Ntizimira yize muri Kaminuza y’u Rwanda, mu Ishuri ry’Ubuvuzi (CMHS) ahabwa n’andi masomo mu Ishuri ry’Ubuvuzi rya Harvard, ubu akaba ari impuguke mu bijyanye na ‘Palliative Care’.

Ni umwe mu batangije Umuryango uharanira guteza imbere ubufasha mu guhangana n’uburibwe n’ibindi bikorwa ku bafite indwara zikomeye n’imiryango yabo, Rwanda Palliative Care & Hospice Organisation (RPCHO).

Mu kazi ke ubwo yari Umuyobozi w’Ibitaro bya Kibagabaga, Dr. Ntizimira yatangije uburyo bwo gufasha abantu bageze mu bihe bya nyuma kubera uburwayi budakira, kandi bigakorwa muri serivisi zose z’ubuvuzi.

Muri iyo gahunda, abaganga barenga 1500 bahawe ubumenyi mu birebana na ‘Palliative Care’, ibintu byanatumye itangwa ry’umuti wa ‘morphine’ ryikuba gatanu, umuti w’ingenzi ukoreshwa mu kugabanya ububabare.

Dr Ntizimira yahawe n’ibigo bisuzuma indwara ya kanseri, harimo icyiswe Young Cancer Leader Award yahawe n’Ikigo Nyafurika Kigamije Ubushakashatsi kuri Kanseri (AORTIC) mu 2015, n’ikindi cya African Cancer Leadership Award yahawe n’Ihuriro Mpuzamahanga Riharanira Kurwanya Kanseri (UICC), mu 2016.

Ishami ry’Umuryango w’Abibumbye ryita ku buzima, OMS, risobanura ko ‘Palliative care’ ifite akamaro gakomeye ko kwiyakira no gufasha abantu kugabanya ububabare, kugarura icyizere cy’ubuzima nubwo umuntu yaba ari mu marembera, gufasha umuryango kwakira uburwayi bwawujemo ndetse bigatuma umurwayi abasha kumarana igihe uburwayi bwe.

Dr Ntizimira yari kumwe na Ambasaderi w'u Rwanda muri Leta Zunze Ubumwe za Amerika, Mathilde Mukantabana(iburyo) na Minisitiri w'Ubuzima, Dr Gashumba Diane(ibumoso)
Dr Ntizimira(hagati) yashyikirijwe iki gihembo mu nama ngarukamwaka ya Global Health Catalyst Summit yabereye mu mujyi wa Boston muri Leta Zunze Ubumwe za Amerika, kuwa 28 Mata 2017
Igihembo Dr Ntizimira yashyikirijwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza