Amavu n’amavuko ya Kaminuza yigenga ya Kigali, ULK: Ikiganiro na Prof.Dr Rwigamba

Yanditswe na Emma-Marie Umurerwa
Kuya 10 Nzeri 2018 saa 02:11
Yasuwe :
0 0

Prof.Dr Rwigamba Balinda ugiye kuzuza imyaka 70, ni umwe mu mpuguke u Rwanda rufite, akaba n’inkingi ikomeye y’uburezi bw’u Rwanda na Afurika muri rusange.

Ni umugabo witangiye uburezi atizigama. Uretse kwigisha muri za Kaminuza zitandukanye, yanashinze amashuri ahereye kuri Kaminuza ya Goma (UNIGO), muri Repubulika Iharanira Demokarasi ya Congo, yashinze akanabera Umuyobozi mu myaka 28 ishize, agurishije inka ze.

Mu myaka 22 ishize, yashinze Kaminuza yigenga ya Kigali (ULK) imaze kuba ubukombe muri Afurika. Ni nyuma yo gushinga ishuri ryigenga rya Gisenyi (EPGI), no gushinga ishuri ryisumbuye, Glory Secondary School mu Karere ka Gasabo mu 2007.

Prof.Dr Rwigamba wahawe impamyabumenyi y’ikirenga mu 1982, yabaye n’Umusenateri kuva mu 2003-2011, aba Umuyobozi wa Kaminuza zigenga n’amashuri makuru mu Rwanda, ubu ni umugaragu w’Imana wigisha ijambo ryayo.

Umunyamakuru wa IGIHE yagiranye ikiganiro na Prof.Dr Rwigamba, agaruka kuri byinshi bimwerekeyeho, ku burezi amazemo imyaka 40, Kaminuza ya ULK n’izindi ngingo zitandukanye.

IGIHE: Hashize imyaka 22 utangije Kaminuza ya ULK, igitekerezo wagikuye hehe?

Prof. Dr. Rwigamba: Dutahuka mu 1994 nari mfite icyo gitekerezo kuko nari mbifitemo ubumenyi ndetse n’uburambe.

Nubwo nta bushobozi nari mfite ariko nari mfite icyizere ko iyo kaminuza nifuzaga gushinga izagirira akamaro abanyarwanda mu gusana igihugu no gusana imitima y’abantu nyuma y’amarorerwa ya Jenoside yakorewe abatutsi n’ivangura mu kwiga byari byaragiye biranga iki gihugu.

Nifuzaga ko abanyarwanda bose bagira amahirwe angana, bakiga bakaminuza bagateza imbere igihugu.

Kaminuza yigenga ya Kigali (ULK) yatangiye mu 1996, itangirira mu bukode muri Centre Pastoral St Paul. Yatangiranye abanyeshuri 204, ubwitange n’ubushobozi bw’abarimu byatumye umubare w’abanyeshuri ugenda wiyongera uko bwije n’uko bukeye. Kuva mu 2002-2017 hamaze kurangiza abanyeshuri 30.992, mu ishami rya Kigali hamwe n’irya Gisenyi.

Prof. Dr. Rwigamba yatangaje ko umwanya munini we asigaye awumara mu bikorwa by'iyobokamana

IGIHE : Utangira ULK wari ufite igishoro cy’amafaranga angahe?

Prof. Dr. Rwigamba: Abahanga bashinze ibigo bikomeye nta mafaranga bahereyeho. Umuntu iyo agiye gukora igikorwa runaka bimusaba gutera intambwe enye. Intambwe ya mbere ni ibitekerezo, iya kabiri ni igenamigambi, iya gatatu ni imitunganyirize, uzakorera iki kintu azakorera he, nzakoresha ibihe bikoresho, intambwe ya kane ni amafaranga.

Ingengo y’imari yanjye ni ukwizera, udafite kwizera ingengo y’imari yagushirana ugacika intege. Nagurishije inka nkeya nari mfite muri Congo ndatangira ni aho nahereye. Ntangira ULK rero sinavuga ko nari mfite amafaranga ahubwo nari mfite ibitekerezo hamwe no kwizera.

Nubwo tudafite amashami mu bindi bihugu, ariko navuga ko kaminuza yacu ari mpuzamahanga kuko ubu dufite abanyeshuri bagera ku 1000 baturuka mu bihugu bitandukanye by’Afurika nka Repubulika iharanira Demokarasi ya Congo, u Burundi, Gabo, Tchad, Côte d’Ivoire n’ahandi, bava iwabo baje gushaka ubumenyi hano bamara kububona bakagenda bakatubera intumwa.

ULK imaze gutanga buruse zo kujya kwiga ikiciro cya gatatu cya kaminuza mu mahanga ku banyeshuri basaga 3000.

Uretse ubumenyi n’uburere kaminuza ya ULK itanga, inateza imbere igihugu mu buryo butandukanye kuko yatanze akazi ku bakozi 350 bahoraho, hamwe na ba nyakabyizi 250, mu mwaka umwe ishobora gutanga imisoro irenga miliyari n’ibihumbi 100.

IGIHE : Mwari mwahura n’urucantege ?

Prof. Dr. Rwigamba: Hari abantu badakunda ibyiza bagira ishyari, bakunda ibintu byo kunegurana kandi nubu barahari bagiye banca intege. Abo ngabo ubahuriza hamwe bose ukabasengera, ubundi ugakomeza ugakora wishingikirije ku Mana.

IGIHE : Ireme ry’uburezi ritangirwa muri za kaminuza zigenga rirakemangwa. Mubivugaho iki ?

Prof. Dr. Rwigamba: Ireme ry’uburezi ni uruhurirane rw’ibintu byinshi, uburezi mbumazemo imyaka hafi 40 nabikozeho n’ubushakashatsi.

Ireme ry’uburezi umuntu ahera ku isoko, uwashize ikigo cyangwa abagishinze ni inyungu cyangwa ni amafaranga bagamije, ese bagamije gutanga umusanzu wabo kugira ngo bateze igihugu imbere ?

Abantu baza muri kaminuza aba ari bantu bize neza amashuri yisumbuye kandi bahabwa impamyabumenyi habanje gukorwa isesengura ry’uburyo bagiye batsinda amasomo bigishijwe.

Tugitangira twafataga abanyeshuri bagize amanota 60%, izindi kaminuza zije ziramanuka zijya kuri 55% abanyeshuri baraducika, turamanuka natwe tujya kuri 58% nabwo baraducika.

Umuntu yakwibaza ngo abayobozi ba za kaminuza, abazishinga bagamije iki, ese iyo kaminuza ifite abarimu bazi icyo bakora, ifite ibikoresho, abanyeshuri bafite ishyaka, barashaka kwiga cyangwa barashaka ibipapuro gusa? Uvuga ireme ry’uburezi agomba kubanza gutekereza kuri ibi byose.

Abarangiza hano baragenda bakajya gushaka impamyabumenyi z’ikirenga muri kaminuza zo hanze bagatsinda bakaba aba mbere, hari abanyeshuri b’abahanga cyane badatakaza umwanya wabo, hari igice cya kabiri cy’abo usabwa guhozaho ijisho, hakaba abandi rero bashaka ibipapuro gusa, abo nibo badodesha ibitabo, basiba amasomo, abo nibo bateza ibibazo kandi iyo tubafashe turabirukana.

Ireme ry’uburezi rirahari keretse kuri bariya baba bashaka ibipapuro gusa. Abavuga ko nta reme ry’uburezi rihari bamwe ntibaba bazi ibyo bavuga.

IGIHE: Aho Kaminuza ya ULK igeze harakunyura?

Prof. Dr. Rwigamba: Hari ubushakashatsi bwakozwe bugaragaza ko 46% by’abakora mu nzego z’ubucamanza bize muri ULK, 30% by’abakora mu ma banki yo mu Rwanda bize hano, mu nzego z’ibanze bo ni benshi cyane bize hano. Hari n’abari mu zindi nzego z’ubuyobozi bose nk’abadepite, abaminisitiri n’abandi benshi bize hano.

Ibi rero ni ibintu twashimira Imana n’ubuyobozi bwiza bw’Igihugu cyacu burangajwe imbere na Perezida Paul Kagame, ubuyobozi budaheza, buha buri wese uburenganzira bungana n’ubw’undi.

Nubwo tutaragera aho twifuza nkurikije igishushanyo mbonera cyacu ntabwo twari twagera no kuri 40% y’ibyo tugomba gukora. Hari amacumbi tugomba kubaka, hari amashami yandi tugomba gutangiza harimo n’iry’ubuganga rizatangira mu myaka ibiri iri imbere turacyafite byinshi byo gukora.


IGIHE: Ninde w’icyitegererezo kuri mwe?

Prof. Dr. Rwigamba: Perezida wacu Paul Kagame mubonamo icyitegererezo muri Afurika yose. Iyo urebye ibyago n’ingorane igihugu cyanyuzemo, ukabona ukuntu yitanze, agaharanira ubumwe bw’abanyarwanda n’iterambere ryabo bituma mufata nk’icyitegererezo. Hari n’abandi bantu nka Mandela na Nyerere nabo mfata nk’ikitegererezo.

IGIHE: Ni iyihe nama wagira urubyiruko n’abandi bafite igiterekezo cyo kwihangira imirimo?

Prof. Dr. Rwigamba:
Dutinyura abanyeshuri bacu n’uyu munsi abanyeshuri bo mu mwaka wa mbere bose banca imbere yaba abiga ku manywa n’abiga n’ijoro nkabigisha isomo ryo kubatinyura ngo bahange imirimo, utabishoboye abe icyitegererezo mu byo akora byose.

Mpora mbabwira ko kwitinya bidindiza umuntu bigatuma ntacyo yimarira ngo akimarire n’igihugu. Buri wese akwiye kwiyumvamo ko hari icyo yashobora kandi ntiyizirikane ubwe wenyine.

Ubushakashatsi bwakozwe bwagaragaje ko hari abantu bagera kuri 300 bize hano bihangiye imirimo. Kwitinya no kutigirira icyizere ni ibintu bibi cyane nta kintu wakora, ariko abagiye bumva amasomo n’inama tubagira ubu bageze kure.

IGIHE: Ni uwuhe murage mwifuza kuzasiga ku Isi?

Prof. Dr. Rwigamba: Abo twakoranye, abo nigishije, abanyapolitiki n’abandi bose twagiye tumenyana nifuza kuzabasigira umurage w’indangagaciro y’urukundo no kwihangana, kwicisha bugufi.

Nifuza ko abantu bazasigarana umurage w’ibitekerezo byiza n’ingeso nziza no gukunda Imana no kwifuriza abandi ibyiza kandi bakagira icyizere gishingiye ku Mana.

Mu 2001 Prof.Dr Rwigamba Balinda yashinze umuryango witwa ‘Rwigamba Balinda Foundation’, ufasha abanyeshuri batishoboye barimo abacitse ku icumu rya jenoside yakorewe Abatutsi n’abandi, bose hamwe bakaba basaga 2882. Gufasha abandi ni umurange akura ku babyeyi be cyane cyane Mama we.

ULK yatangiriye mu bukode ariko ubu ifite inyubako zigezweho mu Mujyi wa Kigali ahitwa ku Gisozi
ULK ifite ibikoresho by'ikoranabuhanga bituma itanga uburezi bukenewe ku isoko ry'umurimo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza