Munyaneza Didier yasezeranye n’umukunzi we yambarirwa n’abakinnyi ba Team Rwanda (Amafoto)

Yanditswe na Eric Tony Ukurikiyimfura
Kuya 29 Ukuboza 2019 saa 10:35
Yasuwe :
0 0

Umukinnyi usiganwa ku magare, Munyaneza Didier uzwi nka Mbappé, yasezeranye n’umukunzi we, Niyomubyeyi Joselyne, imbere y’Imana kuri uyu wa Gatandatu, aho yari yambariwe n’abakinnyi bakinana mu ikipe y’igihugu ‘Team Rwanda’ ndetse na Benediction Excel Energy.

Munyaneza Didier na Niyomubyeyi Joselyne basezeranye kuri uyu wa Gatandatu mu muhango wabereye kuri Paruwasi ya Kora (Mubyeyi Ugiribambe).

Uyu muhango wo gusezerana imbere y’Imana wari wabanjirijwe n’uwo gusaba no gukwa, wabereye mu Nzu mberabyombi ya EAV Bigogwe mu gihe abatumiwe bakiriwe mu Nzu Mberabyombi ya Volcanoes Gate Motel iri i Sashwara ku mugoroba.

Munyaneza Didier yari yambariwe n’abakinnyi bakinana mu ikipe y’igihugu y’Amagare ‘Team Rwanda’ ndetse no muri Benediction Excel Energy akinira, barimo Areruya Joseph, Mugisha Samuel, Mugisha Moïse, Nkurunziza Yves, Uhiriwe Byiza Renus, Habimana Jean Eric n’abandi.

Ubukwe bw’aba bageni bamaze imyaka ine bakundana, bwitabiriwe kandi na Perezida mushya wa FERWACY, Murenzi Abdallah, watowe mu cyumweru gishize.

Munyaneza Didier na Niyomubyeyi Joselyne, basezeranye kubana akaramata nyuma y’ibyumweru bibiri basezeraniye imbere y’amategeko mu Murenge wa Jenda mu Karere ka Nyabihu.

Munyaneza Didier w’imyaka 21 ni umukinnyi usiganwa ku magare kuva mu 2016, aho yatangiriye muri Benediction Club ndetse aracyari no muri iyi kipe yashyizwe mu cyiciro cy’amakipe akina amarushanwa yo ku migabane muri uyu mwaka.

Mu 2017 yabaye uwa kabiri muri Shampiyona y’u Rwanda mu gusiganwa n’ibihe mu batarengeje imyaka 23 n’uwa munani muri Tour du Rwanda.

Mu mwaka ushize, Munyaneza yegukanye Shampiyona y’u Rwanda yo gusiganwa mu muhanda, aba uwa kabiri muri Africa Cup mu gusiganwa n’ibihe n’uwa karindwi mu gusiganwa mu muhanda.

Yakinnye kandi Shampiyona Nyafurika, aba uwa gatatu mu gusiganwa mu muhanda mu batarengeje imyaka 23 ndetse n’uwa cyenda muri rusange.

Muri Tour du Rwanda yabaye uwa munani naho muri Tour de l’Espoir aba uwa cyenda.

Munyaneza Didier ari mu bakinnyi bitwaye neza muri uyu mwaka wa 2019, aho aheruka kwegukana Tour du Sénégal yari yitabiriwe n’Ikipe ye ya Benediction Excel Energy.

Yabaye kandi umukinnyi ukiri muto witwaye neza kurusha abandi muri La Tropicale Amissa Bongo, aho kuri ubu aherutse gutoranywa mu bakinnyi 15 bazavamo umukinnyi w’umwaka wa 2019 muri Afurika.

Uyu mukinnyi ni we watsinze amarushanwa menshi mu masiganwa y’imbere mu gihugu (Rwanda Cycling Cup 2019), aho uyu mwaka yegukanye Farmers Circuit, Kivu Race n’isiganwa rya nyuma rya Kigali- Rwamagana- Kigali.

Munyaneza azagira ikiruhuko gito cy’ubukwe kuko mu cyumweru gitaha azasanga bagenzi be mu mwiherero i Musanze, aho bari kwitegura isiganwa mpuzamahanga rya La Tropicale Amissa Bongo rizaba hagati ya tariki ya 20 na 26 Mutarama 2020 muri Gabon.

Munyaneza Didier ’Mbappé’ yasezeranye n’umukunzi we, Niyomubyeyi Joselyne, imbere y'Imana
Perezida mushya wa FERWACY, Murenzi Abdallah, ni umwe mu bari bagiye gushyigikira aba bageni
Munyaneneza Didier yambariwe na bamwe mu bakinnyi bakinana muri Team Rwanda na Benediction Excel Energy
Uhereye ibumoso ni: Nkurunziza Yves, Habimana Jean Eric, Areruya Joseph, Munyaneza Didier, Niyomubyeyi Joselyne, Mugisha Moise, Uhiriwe Byiza Renus na Mugisha Samuel

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza