Ibyo abakundana bataryaryana bakorerana ntawe urindiriye kubisaba undi

Yanditswe na Umutoni Rosine
Kuya 16 Mutarama 2018 saa 08:19
Yasuwe :
0 0

Mu rukundo rw’abantu babanye neza, usanga hari ibintu umwe akorera undi atabisabwe ndetse adategereje ibihembo kuko biba bisa nkaho kugira icyo akorera mugenzi bimeze nko kucyikorera we ubwe.

Abakundana bya nyabyo usanga badategereza iminsi mikuru cyangwa ibirori ngo babone kugaragaza ibyiyumviro cyangwa impano zabo ahubwo babikora uko babonye uburyo kose.

Inkuru ya Huffington Post igaragaza ibyo inzobere mu bijyanye n’imibanire zibona abakundana bya nyabyo bakorerana ntawiriwe abisaba undi.

1. Kubazanya amakuru ya buri kanya

Abakundana bataryarya buri wese abaza mugenzi we uko yaramutse, uko yiriwe, ibyo ahugiyemo, ibimushimishije n’ibimubabaje. Buri wese aba afite amakuru yerekeye mugenzi we mu bihe bitandukanye.

2. Buri wese anyurwa na mugenzi

Nubwo habamo gukabya ugasanga umwe abwiye mugenzi we ko amurutira abari ku Isi bose ariko habaho no kumushimira mu byo yakoze, ibyo yitwayemo neza, niba yambaye neza n’ibindi bigaragaza ko mugenzi amunyura.

Gufata umukunzi wawe ukamusohokana mugasangira muganira ku bintu bitandukanye ni kimwe mu bimugaragariza ko umushimira niyo utaba wavuze ko ubikoreye kumushimira.

3. Bahana impano zitunguranye

Niba hari ikintu kigaragariza umukunzi wawe ko uhora umutekereza ni ukumutungura ukamuha nk’impano y’ikarita yanditseho amagambo runaka.

Umukunzi wawe ahita yiyumva nk’umuntu udasanzwe ndetse bimubera n’urwibutso uko abonye iyo mpano yawe akibuka ko umutekerezaho.

Inzobere mu mibanire Susan Pease Gadoua agira ati “ Ushobora nko gusiga agakarita kanditseho amagambo y’urukundo ahantu umukunzi wawe ari bukabone, nko munsi y’umusego yawufata agiye kuryama akagasoma.” Ni urwibutso rukomeye kuri we kandi abona ko umukunda buri gihe.

4. Ibikorwa by’ubumuntu utitaye ku nyungu zawe bwite

Umutima mwiza, ubumuntu, impano zidategereje inyiturano ni ibintu biranga abakundana by’ukuri. Muri bene urwo rukundo rutaryarya usanga buri wese yishimira gutanga kuruta uko yishimira guhabwa , buri wese agira ukwigomwa kugira ngo abashe akorere mugenzi we ikimunezeza.

5. Kubwizanya ukuri no kuganira ku buryo buri wese yiyumva

Inzobere mu byimibanire Samantha Rodman avuga ko igihe hatariho kuganira kuri buri kimwe cyose hagati y’abakundana, badashobora kubaho ubuzima bwishimye.

Ati “Kuganira ni kimwe mu biranga abashakanye bishimanye, buri wese anezezwa n’uko mugenzi we amutega amatwi kandi ko ari inshuti ye magara abwira byose.”

Yongeraho ko ku babanye neza, urukundo rwabo rurangwa no kuganira buri kimwe, gituma barushaho kuba inshuti magara, buri wese akihutira kubwira undi uko amerewe.

6. Gutungurana mu mafunguro buri wese akunda

Amafunguro nubwo atunga abantu ari no mu bituma bahura bagashyikirana cyane cyane iyo bayahuriyeho mu kuyakunda.

Iyo utahanye ifunguro cyangwa ikintu umukunzi wawe akunda kurya aba ari uburyo bwo kongera kumubwira ngo ndagukunda ariko noneho ukabikora mu bundi buryo.

7. Kugira umurimo umukorera

Iyo abantu bakundana usanga baba baziranye, iyo rero uzi ikintu gikunze kugora umukunzi wawe ukaba wamutungura ukakimukorera, bigaragaza ko umukunda by’ukuri. Abona ko umenya ibimushimisha n’ibimugora akarushaho kukwiyumvamo.

8. Kugira umuco wo gushimira

Kugira ngo umuriro w’ikibatsi cy’urukundo ukomeze kugurumana mu bakundana ni uko gushimira bihinduka ibikorwa byabo bihoraho. Gushimira umukunzi wawe bigaragaza ko ubona uruhare n’akamaro afite mu buzima kandi bituma urukundo rwanyu rutajya rukonja.

Abantu bose bakunda gushimira, iyo rero ushimira uwo mwashakanye kandi ukabikora mu buryo buhoraho ni ikimenyetso cy’uko mubana mwishimanye.

9. Kubwirana ijambo ‘Ndagukunda’
Usanga iyo umwe mu bashakanye ariwe ukunda kubwira mugenzi we ko amukunda gusa, buri gihe umwe ahora yibaza impamvu mugenzi we atabimubwira maze bakagirana intonganya.

Nyamara Kurt Smith inzobere mu kugira inama abagabo avuga ko biba bisaba kubibwirana ndetse mu buryo buhoraho kandi mu kabigaragarizanya kuko bitaba byumvikana kubwira umuntu ngo ndagukunda kandi uhora umubabaza.

Igihe ubona uwo mwashakanye atabikora, mushobora kubiganiraho kuko hari igihe aba abona ntako atagize.

Hari ibikorwa byinshi birimo nko gutemberana bigaragaza urukundo hagati y’abantu babiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza