Kwamamaza

Ibyiza byo kuba umugore yakwambura agakingirizo uwo bakoranye imibonano

Yanditswe kuya 5-08-2016 saa 20:58' na Tombola Felicie


Indwara zandurira mu mibonano mpuzabitsina nka Sida n’Umwijima(hepatite) zigenda zifata indi ntera uko bukeye nuko bwije, gusa ni nako hakorwa ubukangurambaga kugira ngo abantu babashe kuzirinda kuko amagara aseseka ntayorwe.

Mu imurikagurisha mpuzamahanga rya 19 ririmo kubera i Kigali mu Rwanda, Umuryango uharanira imibereho myiza y’abaturage, Society for Family Health (SFH) Rwanda urimo gupima SIDA ku buntu ndetse hakanatangwa ubujyanama n’ubukangurambaga mu gukoresha agakingirizo kuko usanga hari abanduzwa no kutagakoresha neza.

Mu kiganiro na IGIHE Charmante Rugomwa wamurikaga ibicuruzwa by’ubuzima yatangaje ko nubwo SFH Rwanda ifite ibikorwa byinshi isobanurira abayigana muri Expo, ishyize imbaraga cyane cyane ku mikoreshereze y’agakingirizo.

Ati “Turibanda ku mikoreshereze y’agakingirizo kuko ubu ntabwo ikibazo kikiri Sida gusa kuko n’indwara z’umwijima zigenda zifata indi ntera mu banyarwanda kandi zikandurira mu mibonano mpuzabitsina idakingiye.”

Yakomeje avuga ko ubu agashya bazanye ari ugusobanurira yaba umugore cyangwa umugabo ibyiza byo kuba umugore ariwe wambika cyangwa akambura umugabo agakingirizo mu gihe cyo gutera akabariro.

Ati “Usanga iyo dusobanura uburyo agakingirizo gakwiye gukoreshwa neza, iryo jambo ‘neza’ risa nkaho ritumvikana. Ubu rero abatugana turabereka uko umuntu yambika agakingirizo igitsina cyafashe umurego(hifashishwa imfashanyigisho z’igitsina gabo gikozwe mu giti) ,tukamusobanurira uburyo ari byiza ko umugore cyangwa umukobwa akwiye kuba ariwe wambika umugabo agakingirizo kugira ngo yizere neza ko akambaye neza gafashe.

Ikindi n’uko dusobanurira abatugana ko ari byiza kuba umugore ariwe wakwambura uwo bakoranaga imibonano mpuzabitsina agakingirizo kuko nibwo niba umugabo afite udukomere ku ntoki, amatembabuzi avuye mu mugore atabasha kumwanduza.

Ikindi kandi iyo umugabo ariwe wiyambuye agakingirizo haba hari ibyago ko agakingirizo kahengama amasohoro akaba yagwa ku mugore akandura cyangwa akaba yasama inda zitateguwe.”

Yakomeje atangaza ko kwitwa ko wakoresheje agakingirizo bikarenga ukandura bifatwa nk’uburangare kuko icyo bisaba ari ukubishyiraho umutima gusa.

Ati “Ku muntu ukunda ubuzima bwe aba agomba no kwitwararika ntagire uburangare kuko iyo wanduye biba bibaye burundu ntiwasubiza ubuzima inyuma.”

Kubwimana w’imyaka 37 wari umaze guhabwa ibisobanuro no kwipimisha Sida ku buntu yatangaje ko yungutse ubumenyi ku mpamvu umugore bakoranye imibonano ariwe ukwiye kumwambura agakingirizo.

Ati “Ntabwo nari nzi ko ndamutse ngakozeho wenda nakomeretse ku ntoki gashobora kunyanduza igihe yaba arwaye,ni jyewe wagakuragamo ariko sinzongera kuko nsanze ndi muzima.”

SFH Rwanda ishishikariza abayigana muri Expo kubageraho bagahabwa ubusobanuro ndetse no gusuzumwa SIDA ku buntu.

SFH Rwanda ni umuryango utegamiye kuri Leta ukora ubukangurambaga ukanatanga ibyangombwa byo kwita ku buzima nk’udukingirizo mu kurwanya indwara zandurira mu mibonano mpuzabitsina, utanga imiti isukura amazi yitwa SurEau, P&G, kurwanya malaria, kwigisha imirire myiza ndetse no kugira uruhare mu bikorwa by’isuku n’isukura hirindwa indwara zituruka ku mwanda.

Asobanura uburyo agakingirizo kambarwa
Rugomwa yerekana uko agakingirizo kambikwa igitsina cyafashe umurego
Rugomwa yahamagariye abantu gusobanukirwa uburyo agakingirizo gakoreshwa

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 Nzeri 2016
Copyright © 2009 -2014 - IGIHE Ltd - All Rights Reserved