Clarisse Karasira yarongowe (Amafoto)

Yanditswe na Uwiduhaye Theos
Kuya 3 Gicurasi 2021 saa 11:35
Yasuwe :
0 0

Umuhanzikazi Clarisse Karasira yarushinze na Ifashabayo Sylvain Dejoie bari bamaze igihe kundana.

Ni mu muhango wabereye kuri Christian Life Assembly [CLA], urusengero ruherereye i Nyarutarama mu Mujyi wa Kigali ku wa Gatandatu tariki 01 Gicurasi 2021.

Clarisse Karasira yanditse kuri Instagram ashima Imana, mu magambo make ati “Yadukoreye ibikomeye natwe turashima.”

Ubu bukwe bwabo bwitabiriwe n’abantu 20 mu rwego rwo kubahiriza amabwiriza yo kwirinda COVID-19. Umuhanzikazi Liza Kamikazi wamamaye mu muziki niwe wari ‘Marraine’ wa Clarisse Karasira.

Umugabo we Ifashabayo Dejoie yahisemo Umurinzi w’igihango Gasore Serge ko ariwe wamubera ‘Parrain’.

Mu bantu bazwi bitabiriye ubukwe bwabo harimo umuhanzikazi Mariya Yohana, Nyiranyamibwa Suzanne, Mariya Uwanjye Mukuru wa Mutamuliza Annonciata [Kamaliza] wari uhagarariye umuryango wabo.

Umuyobozi w’Urwego rw’Igihugu Ngishwanama rw’Inararibonye, Tito Rutaremara, uyu muhanzikazi aherutse guhimbira indirimbo yise ‘Rutaremara’ yari ahagarariwe n’umwe mu bo mu muryango we.

Aba bombi baherutse gusezerana mu Murenge wa Rusororo mu Karere ka Gasabo mu Mujyi wa Kigali, tariki 18 Gashyantare 2021.

Uyu muhango wo gusezerana imbere y’amategeko wabaye nyuma y’uko tariki 08 Mutarama 2021, Ifashabayo yafashe icyemezo cyo kwambika impeta uyu muhanzikazi amusaba ko yamubera umugore.

Clarisse Karasira na Ifashabayo bahuye mu 2017, mu gitaramo cyo kwibuka umuhanzikazi Kamaliza. Ifashabayo wari mu ikipe itegura iki gitaramo yahuye na Karasira ubwo yari agiye kukimutumiramo, ubushuti bwabo butangira ubwo. Uko ubushuti bwabo bwazamukaga, ni nako Ifashabayo yagendaga afata izindi nshingano nko gufasha umukunzi we mu by’umuziki n’ibindi.

Wari umunsi udasanzwe kuri aba bombi
Ubu bukwe bwatashywe n'abantu bake
Uhereye ibumoso: Umubyeyi wari uhagarariye Se wa Ifashabayo utakiriho, Ifashabayo Dejoie, Clarisse Karasira na Nyina wa Ifashabayo
Umugabo wa Karasira ni uku yaserutse ku munsi ukomeye w'ubukwe bwabo
Clarisse Karasira yaririmbiye umugabo we
Aba bageni n'uwari uhagarariye umuryango wa Tito Rutaremara utarabashije kwitabira ubu bukwe
Ifashabayo Sylvain Dejoie na ‘Parrain’ we Gasore Serge washinze ikigo Gasore Serge Foundation
Karasira Clarisse yari agaragiwe na Uwimana Console uri ibumoso na Mukakalisa Jeanne d’Arc (uri iburyo) wahoze ari Umusenateri
Liza Kamikazi yari marraine wa Karasira
Mariya Yohana ari mu bitabiriye ubu bukwe
Pasiteri Raphael Ndahayo wasezeranyije Clarisse Karasira n'umugabo we. Uri iburyo ni umugore we
Uyu muhanzikazi yari yaherekejwe n'abarimo Liza Kamikazi wari marraine we
Clarisse Karasira ari kumwe n'ababyeyi be
Nyiranyamibwa Suzanne ni umwe mu bari bitabiriye ibi birori
Nyiranyamibwa Suzanne yahaye Ifashabayo Dejoie impano y'ingabo yifashishwaga mu kwirinda ku rugamba

Amafoto: Perfect Creations


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .