Ruhango: Umunyapolonye Padiri Stany yarokoye Abatutsi barenga 500 muri jenoside

Yanditswe na

Jean Claude Ntawitonda

Kuya 18 Mata 2014 saa 08:09
Yasuwe :
0 0

Padiri Stany, ukomoka mu gihugu cya Pologne akaba yarabaye n’umupadiri kuri Paruwasi ya Ruhango mu karere ka Ruhango, yarokoye Abatutsi basaga 500 mu gihe cya Jenoside yabakorewe mu 1994.
Inkuru dukesha Rwanda News Agency yerekana ko Padiri Stany atigeze yifuza gusiga abari abayoboke ba Kiliziya Gatulika bamuhungiyeho ubwo bahigwaga ngo yisubirire mu gihugu cye nk’uko bagenzi be babanaga bahoraga babimusaba.
Abapadiri bagenzi be b’abanyamahanga bamubwiraga ko bamugurira tike y’indege (...)

Padiri Stany, ukomoka mu gihugu cya Pologne akaba yarabaye n’umupadiri kuri Paruwasi ya Ruhango mu karere ka Ruhango, yarokoye Abatutsi basaga 500 mu gihe cya Jenoside yabakorewe mu 1994.

Inkuru dukesha Rwanda News Agency yerekana ko Padiri Stany atigeze yifuza gusiga abari abayoboke ba Kiliziya Gatulika bamuhungiyeho ubwo bahigwaga ngo yisubirire mu gihugu cye nk’uko bagenzi be babanaga bahoraga babimusaba.

Abapadiri bagenzi be b’abanyamahanga bamubwiraga ko bamugurira tike y’indege aramutse yemeye kuko bo barimo bisubirira iwabo bahunga ibyo gihe by’icuraburindi.

Mu magambo make bivugwa ko yababwiye, yagize ati “Sinshobora gusiga intama zanjye mu maboko y’abicanyi, interahamwe.”

Padiri Stany warokoye Abatutsi basaga 500 muri Paruwasi ya Ruhango

Nyuma yo kubwira atyo, ba bapadiri bagenzi be bahise bamusiga barigendera, we asigarana n’abayoboke be.

Byageze tariki 13 Gicurasi 1994, ahagana mu masaha ya saa cyenda, interahamwe ziturutse i Gikondomu mujyi wa Kigali ziri mu makamyoneti agera kuri atanu, zahise zerekeza kuri iyi Paroisse ngo zitsembe abatutsi bahahishe.

Rwanda News Agency ikomeza ivuga ko Padiri Stany yatakambiye Imana cyane akimara kubyumva, hanyuma agerageza kwinginga interahamwe birangira zitegetswe n’umwe mu bari baziyoboye kugenda na we bivugwa ko yari ahishe umututsi umwe mu nzu y’abihaye Imana ya Ruhango.

Ikindi gihe hakurikiyeho igitero cy’interahamwe zari zivuye i Kibungo na Bugesera zabarirwaga mu bihumbi 60 zisa nk’aho ziri guhunga, zigeze kuri paruwasi ya Ruhango zigira inama yo kubanza kuhagaba igitero.

Kubera ko zari zishonje, mu by’amahirwe hahise haza amakamyo yuzuye ibyo kurya bigenewe abatutsi bari bihishe muri iyi Paruwasi Padiri yari yaranambyeho yanga ko abayoboke be bakwicwa urw’agashinyaguro, ahubwo akumva ko yapfana na bo.

Byabaye ngombwa ko Padiri Stany agabagabanya ibi byo kurya mu nterahamwe zari hanze anasagurira abatutsi bari bihishe muri Paruwasi imbere.

Hanyuma yabashije kugabanya kubikwiza mu nterahamwe zari zishonje zihitamo kutica abo batutsi baje kurokorwa n’ingabo za RPA ubwo zabohozaga igihugu zigahagarika na Jenoside.

Benshi bamera Imana bavuga ko ibyo Padiri Stany yakoze yabibashishijwe no gusenga kujyanye no kwizera Yezu Kiristu. Kugeza ubu Paruwasi ya Ruhango yabaye ahakorerwa urugendo rutagatifu bikaba binavugwa ko habera ibitangaza byinshi bya Nyagasani ndetse hakaba hariswe kwa Yezu Nyirimuhwe.

Buri cyumweru cya mbere cy’ukwezi hahurira abakiristu baturutse hirya no hino ku Isi baje gusengera ibibazo bafite hakaba hari abahava batanga ubuhamya ko basubijwe.

Padiri Stany kugeza ubu agejeje ku myaka 67 y’amavuko, akaba yarafashe ikiruhuko cy’iza bukuru guhera mu 2003, ariko akomeje kwibera muri Paruwasi ya Ruhango yatangiye kuyobora mu 1991.

Bivugwa ko yahageze avuye muri Paruwasi ya Rushaki iherereye mu karere ka Gicumbi, kuko amaze imyaka isaga 34 mu Rwanda. Bamwe mu barokokeye muri Paruwasi ya Ruhango basaba ko uyu mupadiri yazashyirwa mu ntwari z’u Rwanda.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza