Muhanga: Intore zo ku rugerero mu bikorwa byo gushakira icumbi umwe muri zo

Yanditswe na
Kuya 13 Werurwe 2014 saa 08:44
Yasuwe :
0 0

Kuwa Gatatu tariki ya 12 Werurwe 2014 urubyiruko rwo mu kagari ka Remera, Umurenge wa Nyamabuye mu karere ka Muhanga rugizwe n’Intore zo ku rugerero rwakoze igikorwa cyo kubumbira amatafari yo kubakira inzu umwe muri bo utagira icumbi.
Uru rubyiruko rugera kuri 64 rutorezwa mu kagali ka Remera rwabumbye amatafari arenga magana atandatu mu gutanga umusanzu wo kubakira umwana w’umuhungu w’imfubyi ku babyeyi bombi udafite aho aba bitewe n’ibibazo yagiye acamo kuko ababyeyi be bapfuye akiri muto. (...)

Kuwa Gatatu tariki ya 12 Werurwe 2014 urubyiruko rwo mu kagari ka Remera, Umurenge wa Nyamabuye mu karere ka Muhanga rugizwe n’Intore zo ku rugerero rwakoze igikorwa cyo kubumbira amatafari yo kubakira inzu umwe muri bo utagira icumbi.

Uru rubyiruko rugera kuri 64 rutorezwa mu kagali ka Remera rwabumbye amatafari arenga magana atandatu mu gutanga umusanzu wo kubakira umwana w’umuhungu w’imfubyi ku babyeyi bombi udafite aho aba bitewe n’ibibazo yagiye acamo kuko ababyeyi be bapfuye akiri muto.

Kayisire Innocent, uhagarariye intore za Nyamabuye avuga ko iki gikorwa bagitekereje nyuma y’uko umwe mu ntore abagejejeho ikibazo cyo kuba atagira aho acumbika, hanyuma bakabigeza ku buyobozi bw’Akagari n’Umurenge bukabibafashamo kugira ngo uyu musore abumbirwe amatafari yamufasha kuzubaka inzu yabamo.

Ndahimana Jacques w’imyaka 22 y’amavuko wabumbiwe amatafari, avuga ko yahuye n’ibibazo byo kubura ababyeyi afite imyaka ibiri, kuva ubwo akarerwa n’imiryango nayo yagiye imuhererekanya ariko birangira agiye kuba mu kigo cy’imfubyi, aho yaje kuva agacumbikirwa n’inshuti ye bakiri kumwe kugeza ubu.

Ndahimana avuga ko igikorwa intore zimukoreye kimwubatse mu buryo bwinshi, ati “Ibyo bankoreye biranshimishije, kandi biramfasha kwiyubakamo ubumuntu, bimfasha kandi kugira ubusabane no kureka kwigunga.”

Umwe mu ntore ahereza Ndahimana impano y'isabune

Uyu musore kandi yagiraga ikibazo cyo gushaka kwiyambura ubuzima kubera ubuzima bwamugoraga ariko ubu avuga ko afite imbaraga zo gukomeza kwiyubaka kuko atari wenyine.

Nsanzimana Tharcisse, Umuyobozi mu Nama y’Igihugu y’Urubyiruko ushinzwe ishami ryo gufasha urubyiruko mu mibereho n’Ubukungu, avuga ko urubyiruko rukwiye gukomeza gufashanya mu gushaka ibisubizo, agashimira intore zo mu kagari ka Remera mu murenge wa Nyamabuye ku gikorwa cyiza batekereje.

Arashimira cyane abaturage bake babashije kwifatanya n’izi ntore mu kubumbira amatafari umuturanyi wabo (uyu mwana w’umusore utagira icumbi), yashimye kandi n’ubushake abayobozi babafitemo.

Uyu muyobozi yongeraho ko iki gikorwa gikwiye kubera inyigisho buri wese kuko kubakira umuturanyi ni ukwifasha.

Nsanzimana arasaba intore zo ku rugerero gukomeza kwitanga kandi bakitangira buri wese babona ubikeneye badategereje inzego zo hejuru.

Yagize ati “ntituzategereza ko inzego bwite za Leta zimanuka gukemura bimwe mu bibazo abantu bashobora kwikemurira igihe bishyize hamwe”.

Uyu muyobozi arasaba urubyiruko rwa Nyamabuye kubaho rufite intego kuko nibwo ibyo rwifuza ruzabigeraho.

Uyu muganda kandi wari witabiriwe n’abakozi b’Inama y’Igihugu y’Urubyiruko mu gufasha urubyiruko no kwifatanya narwo mu bikorwa bitandukanye harimo n’iby’Urugerero.

Ntakirutimana Imamu, ni umwe mu ntore, avuga ko yishimira gufasha abandi, akongeraho ko uku ariko kubaka igihugu mu bumwe, ati “Gukora igikorwa nk’iki ni ukubaka ejo heza hacu n’ah’igihugu mu bikorwa byubaka.”

Ubuyobozi bw’umurenge wa Nyamabuye buvuga ko bufite ingamba zo gukomeza gufatanya n’intore mu kurangiza iki gikorwa batangiye uyu munsi cyo kubakira uyu mwana w’umusore nibura bakageza hejuru ya 95%.

Abakozi b'Inama y'Igihugu y'Urubyiruko nabo barangajwe imbere na Nsanzimana Tharcisse (Wambaye umupira w'ubururu)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza