IGIHE.com > Abantu > Kubaho
Kudahabwa agashimwe ntibyakagombye kwangiza serivisi nziza

Kudahabwa agashimwe ntibyakagombye kwangiza serivisi nziza


Yanditswe kuya 13-08-2012 - Saa 04:58' na Samuel Ishimwe

Ijambo ry’Igifaransa “pourboire” cyangwa “tip” mu Cyongereza risobanura agashimwe umukiriya aha ushinzwe gutanga ubufasha (service) mu mahoteli no mu buriro butandukanye. Iki kikaba ari igikorwa gikorwa ku bushake bw’uhawe ubufasha ibi bakunze kwita serivisi.

Iki ni kimwe mu bibazo byabarijwe mu nama y’abakozi ba RDB n’aba PSF i Gikondo, hagaragazwa ko impamvu abatanga serivise mu mahoteli n’amaresitora babikora nabi, ari uko abantu bataragira umuco wo gushimira nyine batanga “tip.”, ndetse no kuba abo bakozi bashobora kuba bahembwa amafaranga atari menshi bigatuma batanga serivisi mbi ku babagana.

Kubera iyo mpamvu Manzi Antoine, umukozi wa RDB yatangaje ko babinyujije mu bukangurambaga bwiswe “Nayombi”, ubu bari hafi gusaba ko ako gashimwe kashyirwa ku nyemezabwishyu zihabwa abakiliya kugira ngo abantu bajye bamenya kwibwiriza gushima ababahaye serivisi nk’uko bigenda henshi mu bihugu by’amahanga.

Mu gushaka kumenya ukuri kw’ibi, ikinyamakuru Izuba Rirashe cyegereye umwe mu batanga serivise mu mahoteli, Evariste Kayiranga ukora muri hoteli Impala, atubwira ko rwose ubusanzwe aka gashimwe ari ubushake bw’ugatanga, nta mabwiriza cyangwa itegeko risaba umukiliya kugatanga. Ati “Ubundi pourboire ikunze gutangwa n’abanyamahanga. Abanyarwanda ntibagira umuco wo gutanga agashimwe. Iyo uhaye umuntu serivisi nziza ukabona arishimye nicyo kiguha icyizere ko ukora neza kandi ko uzunguka.””

Ku kijyanye n’uko ngo abakora ubukangurambaga bwa “Nayombi” baba bari hafi gusaba ko pourboire yajya yongerwa ku nyemezabwishyu, Evariste avuga ko byaba ari bibi kuko ubundi pourboire ari agashimwe gatangwa ku bushake nta n’ugomba kubyibutsa undi.

N’ubwo kuri Evariste we bibangamye, ariko ngo mu bihugu yemwe byakataje mu iterambere nka z’Amerika, Uburayi n’ahandi, usanga ku nyemezabwishyu biba byanditseho nk’uko Wellars Muhoza, Umunyarwanda uba muri Leta Zunze Ubumwe z’Amerika yabitangarije Izuba Rirashe kuri telefoni.

Yagize ati “Ino aha, kuri fagitire haba hariho umwanya wanditseho 15% ahabwa uwatanze serivise, agafatwa nka “tip”, ibi bikaba ari ukubera ko bakunze kuvuga ngo abatanga serivisi mu mahoteli n’uburiro bahembwa umushahara muto.” Gusa ku gitekerezo cyo kubikora gutyo mu Rwanda, Wellars abona byatera ikibazo cy’izamuka ry’ibiciro n’ubusumbane bukabije ku bakiriya bagana ahantu hatandukanye.

N’ubwo bimeze bityo, hari aho noneho utatinyuka kugira uwo uha pourboire nko mu Butaliyani, kuko ngo iyo ubikoze uba usuzuguye ukoresha umukozi waguhaye serivisi, kuko byerekana ko aba ahembwa nabi.

Serivisi nziza mu Rwanda iragenda itera imbere binyuriye mu bukangurambaga butandukanye, yaba ubukorwa mu bitangazamakuru no mu bigo bishinzwe kunoza amasirivisi atangwa hirya no hino mu Rwanda.

Inkuru y’Izuba Rirashe

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO