Kwiyandarika kw’ababyeyi kuri gutera abato kububahuka

Yanditswe na Ferdinand Maniraguha
Kuya 7 Kamena 2016 saa 01:41
Yasuwe :
0 0

Bamwe mu batuye mu Mujyi wa Kigali baravuga ko kutiyubaha kwa bamwe mu babyeyi bagakwiye gufatirwaho urugero ari kimwe mu bikomeye bituma basuzugurwa n’abo bibyariye ndetse n’abakiri bato muri rusange.

Abaganiriye na IGIHE mu bice bya Nyamirambo ,Kimisagara na Nyarugenge bahamije ko bamwe mu babyeyi haba ku bagabo n’abagore barangwa n’imyitwarire iteye isoni imbere y’abana irimo ubusinzi, ubusambanyi, amakimbirane mu ngo, kwambara utujipo tugufi ku bagore(mini-skirts) n’ indi myambaro igaragaza imiterere y’ibice by’umubiri nk’amabere.

Umwe mu basore wo mu gace ka Biryogo,yavuze ko ubusanzwe indangagaciro nyinshi umwana azigira ku babyeyi ariko ko biteye isoni kubona umubyeyi wagakwiye kwigisha umwana imyitwarire myiza ari we ugira uruhare mu kumwangiza.

Ati″ Ukabona umubyeyi ukuze yambaye akajipo kagufi kagaragaza ikimero cye kandi ari kumwe n’umwana we w’umukobwa ndetse ukaba utanatungurwa no kubona bagendana mu muhanda, Uko si ukwiyubaha! Ubwo se ni iki uwo mubyeyi yahanura umwana kandi bose bambara kimwe.”

Uwitwa Twahirwa Ngabo na we ati″Nka so ukamusaga mu kabari cyangwa mu muhanda yasinze kandi ari we wagakwiye kuguha urugero cyangwa ukumva ngo abana bafashe ba nyina basambana cyangwa ba se basambanya abandi bagore mu nzu iwabo.”

Uko byagenda kose abakiri bato basabwa kubaha abakuze n’abo bikaba bityo. Gusa aba baturage bavuga ko imyitwarire nk’iyo kuri bamwe mu babyeyi basanga ari imwe mu ituma ababyeyi basuzugurwa.

Hari uwagize ati″Ibyo byarasakaye kubona umubyeyi nawe ukumva ntiwamwubaha bitewe n’imyitwarire ye.Hari n’igihe umubyeyi ataha yasinze agashaka ku guhohotera .Ubwo se urumva wamwubaha ? Oya! Ashobora no kugutuka bitewe n’ubusinzi bwe kandi mwasangiye , ukaba wamukubita urushyi kandi ari umubyeyi wawe.”

Icyo ababyeyi babivugaho

Ku ruhande rw’ababyeyi nabo bemeza ko imyitwarire mibi kuri bamwe muri bo ihari nubwo n’abakiri bato atari shyashya.

Mugwaneza Assiah atuye mu Murenge wa Kimisagara avuga ko hari umubare munini w’ababyeyi batacyambara bikwije nkuko byari bimeze mu bihe byashize.

Ati″Urabona nk’ubu nta muntu ushobora kuba indaya ngo agende yambaye imyenda miremire, agomba kugenda yambaye ku buryo umubiri we ugaragarira abantu bose. Icyo gihe rero ntazatinyuka no kugurira umwana we imyenda miremire kuko ni we agomba gufatiraho urugero. Ikindi usanga mu ngo zimwe na zimwe harimo gucana inyuma bitewe n’imibanire yo mu rugo kandi urumva ko n’abana babireba batakubaha.”

Umusaza w’imyaka 54 waganiriye na IGIHE utashatse ko amazina ye atangazwa yagize ati″ Byarenze ihaniro ari umwana n’umubyeyi b’uyu munsi bose mbona ari kimwe kandi kugira ngo uzagire uwo ucyaha ngo akumve ni ikibazo. Ntawe ugitinya undi ni nayo mpamvu habaho gusuzugurana ugasanga nko mu modoka umuto ntakimukira umukuru. Uramubwira ati nanjye nishyuye.”

Uko byamera kose ariko asanga kugira ngo ikibazo gikemuke impande zombi zikwiye kwicarana zikaganira ku bikwiye gukorwa byabahesha agaciro.

Hari ababyeyi badatinya kwambara impenure imbere y'abana babo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .