Imirimbo abasore bishyiraho imenyerewe nk’iya kigore ntivugwaho rumwe mu Banyarwanda

Yanditswe na

Emma-Marie Umurerwa

Kuya 5 Ukwakira 2013 saa 12:18
Yasuwe :
0 0

Hirya no hino mu Rwanda uhasanga abasore bishyiraho imirimbo ikunze kubonanwa abagore, ariko nubwo bitangiye kumenyerwa, abantu batandukanye mu muryango nyarwanda ntibabivugaho rumwe kuko bamwe bavuga ko ari inzaduka, abandi bakavuga ko bidakwiye mu muco wa Kinyarwanda.
Imwe muri iyo mirimbo ahanini ivugisha abantu ni igaragara inyuma. Iyi irimo irebana n’imisokoreze iba isanzwe imenyerewe ko ari iya kigore, ariko usanga abasore n’abagabo bamwe na bamwe bayikunda bakayishyiraho. Ibi (...)

Hirya no hino mu Rwanda uhasanga abasore bishyiraho imirimbo ikunze kubonanwa abagore, ariko nubwo bitangiye kumenyerwa, abantu batandukanye mu muryango nyarwanda ntibabivugaho rumwe kuko bamwe bavuga ko ari inzaduka, abandi bakavuga ko bidakwiye mu muco wa Kinyarwanda.

Imwe muri iyo mirimbo ahanini ivugisha abantu ni igaragara inyuma. Iyi irimo irebana n’imisokoreze iba isanzwe imenyerewe ko ari iya kigore, ariko usanga abasore n’abagabo bamwe na bamwe bayikunda bakayishyiraho. Ibi byiyongera ku gusiga hina n’ibindi ku nzara, kwambara amaherena, kwambara ibikomo, kwitukuza n’ibindi.

Ibi byose ariko bikaba bitavugwaho rumwe n’abantu b’ingeri zitandukanye; hari ababyita uburara, gusirimuka, gusobanukirwa, kwigenga, kutubaha umuco nyarwanda, kunanirana, uburenganzira no kwisanzura, mu gihe abandi bavuga ko ari ukwigana umuco w’ahandi ngo kuko bitari bisanzwe mu muco nyarwanda.

Mukarutamu Godeliva ni umubyeyi utuye mu Murenge wa Jabana mu Karere ka Gasabo, afite umuhungu wisukisha inweri, akambara n’amaherena, yagize ati "Akibitangira byabanje kuntera agahinda, ariko nageze aho ndamwihorera kuko nabonaga yanze kubireka, sinakubwira ngo ndakibikunze, nabuze uko ngira!"

Ruberangeyo w’imyaka 55, atuye muri Gasabo, yagize ati "Abana b’iki gihe ntacyo batazatuzanira, ibi byose ni umuco w’ahandi bagenda bazana, ariko njyewe mbona ari bibi, umuhungu wanjye abikoze ntitwakiranuka, ndakurahiye!"

Abasore nabo hari icyo babivugaho

Kagabo w’imyaka 25 wo mu karere ka Kicukiro, yagize ati "Njyewe sinabikora, ariko mfite abasore b’inshuti zanjye babikora, ntawe ukwiye kubigiraho ikibazo, kuko ubikora aba abikunze kandi azi impamvu abikora, ikibi n’ukubikora utazi icy’ubikoreye."

Hussen w’imyaka 22, yambara amaherena akanasiga hina ku nzara. Yagize ati "Abantu bafite ikibazo cy’imyumvire; umuco bawurebeye ku byo umuntu yambaye cyangwa uko yasokoje, nta n’umwe waba awubahiriza, kuko uko bwije n’uko bucyeye, usanga hari byinshi bigenda bihinduka, uko ba sogokuru za bambaraga, si ko ba data bambara, umuntu apfa kwitwararika ku ndangagaciro z’Umunyarwada, naho ibindi numva ari uburenganzira bw’ubikora."

Muhirwa agira ati "Kuba umuntu yagira imisatsi imenyerewe ku bagore ntibisanzwe iwacu, ariko mba numva ari uburenganzira bwe mu kugira ubwisanzure. Mba mbona kandi asobanutse."

Abakobwa nabo bafite uko babona abasore bashyiraho iyi mirimbo n’imideri

Mutesi uri mu kigero cy’imyaka 24, arangije kwiga muri kaminuza nderabarezi ya Kigali (KIE), yabwiye IGIHE ati "Ntakubeshye sinshobora gukundana n’umuhungu wambara amaherena cyangwa usuka inweri, mbona yansebya rwose! Ababikora ni uburenganzira bwabo, ariko njye simbakunda!"

Kamaliza w’imyaka 37, yabwiye igihe ati "Iyo mbonye umuhungu afite imisatsi y’abarasita, mpita mufata nk’ikirara. Ntabwo bijyanye n’umuco wacu."

Dusabeyezu afite imyakak 22, nawe yabwiye IGIHE uko afata abahungu cyangwa abagabo baba bafite iyo mirimbo itabamenyereweho. Yagize ari "Iyo mbonye umuntu nk’uwo, ntekereza ko kubikora ari uburenganzira bwe, ariko nkanahita ntekereza ko itabi ryamwishe."

Nubwo hari abanenga abasore bashyiraho iyi mirimbo itandukanye, ngo hari n’ababibakundira ndetse bikabahesha akazi aho abandi bakaburiye nk’uko bamwe mu basore bafite imisatsi ifatwa nk’iya kigore mu muryango nyarwanda bakomeje kubibwira IGIHE. Ariko kandi banagaragaza impungenge z’aho bahabwa akato kubera imiterere yabo.

Wowe ufata ute umuhungu wisukisha inweri cyangwa ufite imisatsi nk’iy’abarasita?

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .