Uwimana yeruye inkomoko y’amarira yasutse abonye Kagame

Yanditswe na Mathias Hitimana
Kuya 28 Nyakanga 2017 saa 02:11
Yasuwe :
2 0

Uwimana Yvonne w’imyaka 23 y’amavuko, umwana utaramenye ababyeyi be , yagaragaje amarangamutima adasanzwe, amarira ashoka ku matama yombi abonye umukandida Paul Kagame amaso ku maso.

Mu bikorwa byo kwiyamamaza kw’abakandida bahatanira kuyobora u Rwanda, ifoto ya Uwimana arira iri mu zikomeje guhererekanywa ku mbuga nkoranyambaga.

Uyikubise amaso akabona uko yazamuye amaboko yambaye ibirango bya FPR Inkotanyi, ahita yishushanyiriza ko isoko y’amarira yavubutse mu rukundo rukomeye.

Uhita atekereza atyo ntari kure y’ukuri, Uwimana wiga mu mwaka wa mbere muri Kaminuza y’Ubukerarugendo n’Amahoteli (UTB), Ishami rya Rubavu, yeruriye IGIHE icyatumye asuka amarira ubwo Paul Kagame yari i Rubavu.

N’amarangamutima menshi, Uwimana asobanura uko amarira yashotse yagize ati “Ikintu cya mbere cyabinteye ubusanzwe nkunda umusaza, nkunda Perezida Kagame Paul; nari narifuje kumubona kera nkiri umwana, ni ukuvuga ngo ni ubwa mbere nari mubonye imbonankubone. Numvaga nyine kumubona ari ibintu bidasanzwe kuri njyewe; namubonye numva birandenze cyane, mbese numvaga nshaka no kumukoraho nkumva byandenze, nkumva mbuze ukuntu nifata … n’ubu iyo mbitekereje ndumva ntazi ukuntu meze.“

Uyu mukobwa wakuriye mu kigo cy’imfubyi cya SOS Gikongoro ntiyagize amahirwe yo kumenya ababyeyi be, nta mateka na make ku nkomoko ye, uretse kumva ko akomoka i Kaduha.

Anyura muri make ku nkomoko y’urukundo afitiye Kagame, Uwimana avuga ko ashingira ahanini ku iterambere n’umutekano u Rwanda rufite ashingiye no ku mateka y’aho u Rwanda rwavuye, yabwiwe akimenya ubwenge.

Yagize ati “Nasobanukiwe FPR Inkotanyi, nsobanukirwa neza Kagame, mbona ahantu bakuye u Rwanda, mbona ahantu tugeze, mbona ukuntu agenda azamura u Rwanda, mbona ni umuntu w’umunyabwenge cyane, numva ndamukunze pe. Ni byinshi cyane, gusa ku mutima wanjye ndamukunda bikomeye, bikomeye. Na bagenzi banjye n’inshuti zanjye nkunda kubabwira ngo ni papa wanjye. Numva ari umubyeyi wanjye pe.”

Bitewe n’urukundo afitiye Kagame, umutima wa Uwimana nturatuza kuko agifiteho icyifuzo gikomeye.

Yagize ati “Mbonye ukuntu nabona umusaza [Kagame Paul]amaso ku maso, nkamusuhuza, nkamuganiriza mbese nk’uko numva ari umubyeyi wanjye koko, byaba ari akarusho, ndamukunda bikomeye.”

Uretse kuba Uwimana yaragaragaye arira abonye Kagame hafi ye n’ubusanzwe ngo n’iyo amubonye kuri televiziyo, nabwo asabwa n’amarangamutima.

Camera y’Umufotozi Nkurunziza Faustin, witegereje amarangamutima y’imbaga iba yaje aho umukandida Paul Kagame yiyamamariza, yatumye Uwimana Yvonne atangira gushakishwa ubutitsa kuri telefone bamubaza uko byamugendekeye.

Amarira y'ibyishimo ku matama ya Uwimana Yvonne
Uwimana yari ashyigikiye Kagame Paul n'umutima we wose
Umukandida wa FPR mu baturage rwagati...

[email protected]

Amafoto: Nkurunziza Faustin/RPF


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza