Uko Dusengimana yaretse kuvunisha umugore we bakubaka urugo ntangarugero

Yanditswe na Prudence Kwizera
Kuya 14 Nzeri 2018 saa 09:46
Yasuwe :
0 0

Dusengimana Jean Baptiste wo mu Murenge wa Save mu Karere ka Gisagara avuga ko yamaze imyaka igera ku munani avunisha umugore we mu mirimo yiganjemo iyo mu rugo ndetse anamujujubya kuko yamutukaga akanamukubita, ariko nyuma aza kubireka kubera ko yasanze bigiye kumusenyera burundu.

Uyu mugabo w’imyaka 31 y’amavuko atuye mu Mudugudu wa Gitwa mu Kagari ka Munazi aho abana n’umugore we Hategekimana Liberatha w’imyaka 30; bamaze kubyarana abana babiri.

Umunyamakuru wa IGIHE yigeze kubasanga ku Murenge wa Save muri Nyakanga 2018 baje gusezerana kuko bari basanzwe babana mu buryo butemewe n’amategeko.

Icyo gihe batanze ubuhamya bwakoze ku mitima ya benshi.

Icyo gihe Dusengimana yagize ati “Twahoranaga induru n’amakimbirane ku buryo byari bigeze aho ntaha abana bagahunga ngo ntabahitana. Ntabwo najyaga inama n’umugore kandi imirimo yose narayimuhariga ngo ayikore yabyanga nkamukubita.”

Kuri uwo munsi imbere y’imbaga y’abaturage Hagegekimana nawe yaragize ati “Nk’uko cheri (umukunzi) wanjye abivuze ntabwo twashyiraga hamwe. Ubu namwe murabibona ko nabaye umukobwa mwiza ndumva nishimye ku mutima wanjye hakeye, tugiye gufatanya twiteze imbere n’abana bacu tubarere neza.”

Umunyamakuru yabasuye mu rugo

Nyuma y’amezi abiri batanze ubuhamya imbere y’imbaga y’abaturage, umunyamakuru yabasuye aho batuye mu rugo abatunguye.

Ahagana saa yine z’amanywa ku wa gatatu tariki ya 12 Nzeri 2018, nibwo Umunyamakuru wa yageze mu rugo rwabo asanga hari abana babiri gusa, umwe w’ imyaka itandatu y’amavuko n’undi ufite ine.

Bamubwiye ko ababyeyi babo bombi bagiye kuvoma amazi mu kabande. Mu gihe cy’iminota 15 bahise baza bakurikiranye bikoreye amajerekani y’amazi, baganira ku buryo wabonaga ari ibintu bishimishije.

Bakimara kugera mu rugo, bagarutse ku nzira banyuzemo kugira ngo bave mu makimbirane ndetse bace ukubiri no kongera kuba umwe yavunisha undi mu mirimo.

Hategekimana Liberatha yagize ati “Urabona ko njye n’umutware wanjye tuvuye kuvoma amazi yo gukoresha mu rugo, ubu dusigaye dufatanya mu bintu byose. Mbere ntabwo twumvikanaga kuko nta nubwo twari twarasezeranye; nakoraga akazi kose njyenyine kuko yabaga yagiye.”

Dusengimana Jean Baptiste avuga ko kuvunisha umugore we no kumuhohotera yabicitseho nyuma yo kumva inyigisho yahawe n’ubuyobozi hamwe n’abafatanyabikorwa bakorera mu murenge wabo no mu Karere ka Gisagara.

Ati “Kugira ngo mpinduke byatewe n’inyigisho abayobozi baduheraga mu nama, nageze aho njya no mu matsinda hamwe no mu mugoroba w’ababyeyi baranyigisha mfata umwanzuro wo guhinduka kuko nabonaga urugo rwanjye rugiye kuzasenyuka burundu”.

Uyu mugabo w’imyaka 31 y’amavuko avuga ko kuri ubu afatanya n’umugore we indi mirimo yo mu rugo nko guteka, gushaka inkwi, kumesa imyenda, gukora isuku no guha abana uburere kandi biri kubyara inyungu yo kugera ku iterambere.

Umuyobozi w’Umudugudu wa Gitwa, Niyikiza Odette, avuga ko uwo muryango wahoraga mu makimbirane ariko kuri ubu ufite urugo ntangarugero mu kubana neza.

Ati “Uyu muryango warahindutse pe, urugo rwabo ni intangarugero mu mudugudu kuko bafatanya imirimo yose kandi nta makimbirane akigaragara hagati yabo.”

Umunyamabanga Nshingwabikowa w’Umurenge wa Save, Kimonyo Innocent, avuga ko hakiri ingo zitabana neza aho usanga hari abagabo bavunisha abagore babo cyangwa bagahohoterana ariko bakomeje kubigisha kandi hari benshi bamaze guhinduka.

Ati “Twari dufite ingo nyinshi zihora mu makimbirane ndetse badafatanya n’imirimo aho wasanganaga cyane cyane abagabo bahohotera abagore. Uko tugenda tubigisha hari benshi bamaze guhinduka ariko turakomeje kugira ngo bose bahinduke bose banane neza mu ngo nziza zifite icyerekezo.”

Kimonyo avuga ko imiryango ikunze kugaragaramo amakimbirane ari igizwe n’ababana batarasezeranye ariko bageze kure babigisha kandi biri gutanga umusaruro kuko muri uyu mwaka wa 2018 basezeranyije imiryango irenga 200 hakaba hasigaye 43 gusa.

Intego bihaye ni uko iyo 43 nayo bazayisezeranya bitarenze uyu mwaka wa 2018 kuko bageze kure bayiha inyigisho.

Dusengimana Jean Baptiste n’umugore we Hategekimana Liberatha basigaye bafatanya imirimo yose yiganjemo iyo mu rugo
Dusengimana n'umugore we Hategekimana ubwo bari bavuye kuvoma amazi mu kabande
Mu rugo basigaye bafatanya byose mu gihe mbere imirimo yari yarahariwe umugore gusa
Inzu Dusengimana Jean Baptiste n'umugore we Hategekimana Liberatha batuyemo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza