Wasubiza iki bakubajije iki kibazo mu kizamini cy’akazi?

Yanditswe na Nshimiyimana Gonzalde
Kuya 19 Mata 2017 saa 10:23
Yasuwe :
0 0

Iyo habayeho amahirwe yo kugera mu kizamini cya nyuma cy’ibazwa mu magambo (interview) ni umwanya mwiza wo kugaragaza ubushobozi bwawe kandi na none uba ugomba kwitonda kuko ubyitwayemo nabi ushobora kubura akazi nyamara waratsinze icyanditse.

Mu kazi gatandukanye bakunda kubaza bati “Kuki twaguha akazi?”Iyo ubajijwe iki kibazo baba bashaka ko ubumvisha mu buryo budasubirwaho uko uri umuntu wari ukenewe muri ako kazi kabo. Kugira ngo rero ubashe gusubiza ibijyanye no gushaka kwabo ni ngombwa ko ubanza gushaka amakuru ku bijyanye n’akazi usaba ukamenya ibigakorerwamo n’aho katagendaga neza bityo mu ibazwa ukagaragaza neza ko uri igisubizo cya byose.

Lynn Taylor, umwanditsi w’ibitabo akaba n’impuguke mu bijyanye n’imirimo, yagaragaje uburyo wakwemeza abakubaza avuga ko bakubajije impamvu baguha akazi ko wasubiza, ati: “ Mukeneye umukozi ukora ibi n’ibi kandi ndabizeza ko uwo mukozi ari njye kuko mbifitiye ubushobozi mu buryo bwose kandi yaba ari amahitamo meza mukoze mwiteganyiriza ejo hazaza heza.”

Mbere y’uko witabira ikizamini cyo kubazwa uba ukwiye kubanza gufata akanya ukitekerezaho ukiga uburyo ugomba kwitwara. Uburyo bwiza ni ukubanza ugatekereza impamvu wumva ko uri umukozi urenze abandi bakenewe mu kazi ugiye gukora, ibi iyo wabashije kubishakira igisubizo wowe n’umutimanama wawe uba ushobora kwitwara neza mu kizamini cy’ibazwa.

Uburyo butanu bwagufasha gusubiza ikibazo kivuga ngo “kuki twaguha akazi”

1. Umva neza ibisabwa

Igihe wabwirwaga ibisabwa ku kazi wanditse usaba, jya ugerageza ukuremo amwe mu magambo y’ingenzi maze uyagendereho uyahuze n’umwirondoro wawe utanga uherekeza ibaruwa kuko bizagufasha igihe uzaba uri kubazwa impamvu bakwiye kuguha akazi. Ukubaza azahita akubita amaso kuri wa mwirondoro wawe maze abone ko ibyo akubaza wabishyize mu mwirondoro wawe kandi bifitanye isano n’ibikenewe. Ikindi kandi uba ugomba gutumbira ukubaza ntugaragaze ko ufite isoni kuko aba ashaka kureba niba ibyo wiyanditseho ubihagazeho.

2. Mu gihe usubiza jya wibanda ku ngingo nyamukuru gusa

Taylor agira inama abasaba akazi kugaragaza ishusho yabo mu bijyanye n’uburambe bagafiteho, nk’imyaka wamaze ukora akazi gasa n’ako uri gukoraho ikizamini, ibigo bihambaye wabayemo kandi bizwi n’imyanya wagiye ukoramo, ubumenyi wahungukiye, amahugurwa wakoze uri muri icyo kigo n’ibindi. Avuga kandi ko ubazwa adakwiye kwibagirwa no kuvuga uko yagiye azamurwa mu ntera akongererwa inshingano bigaragaza icyizere yagirirwaga.

Mu magambo make utarondogoye jya wibuka kubagaragariza ibyo wagezeho ubwo wakoraga akazi runaka warangije. Gendera ku bifatika ugaragaza neza ukuntu uburambe n’ubuhanga wifitemo bizagirira akamaro ikigo uri gusabamo akazi usanisha n’ibyo wagezeho aho uheruka gukora.

3.Garagaza ko uzaba uri nk’imari idahomba

Taylor avuga ko umukoresha wese aba ashaka kumva neza ukuntu umukozi mushya uje atazabarumbira ahubwo azaba umusemburo w’impinduka nziza n’iterambere ry’ikigo akorera. Aba ashaka kandi guca ukubiri n’ibihombo bya hato na hato mu kigo no kugira abakozi batanga umusaruro mu buryo butameze nko gucirira imbwa mu rugo kuko zo ntacyo ziba zinjiza ari ukuzitunga gusa. Aya ni amahirwe usaba akazi aba abonye kandi agomba kubyaza umusaruro akagaragaza impamvu bakwiye kukamuha. Aho bishoboka anemera ko azajya yitanga ku mutungo we bwite abikorera inyungu z’ikigo cyamuhaye akazi.

4. Garagaza ko ushimishijwe n’ako kazi

Taylor yavuze ko ari byiza gutanga ingingo nshimangirabusabe zidakakaye ahubwo ugomba koroshya imivugire ugaragaza ko ako kazi usanzwe unagakunda ndetse ko gasubiza ibyifuzo byawe. Uretse no kuba wumvise bashaka umukozi, ugaragaza uburyo wari usanzwe ushimishwa cyane no gukora ibisa n’ibiri muri ako kazi.

5. Jya urasa ku ntego uvuga ibikenewe byerekeranye n’ibyo ubazwa

Kuri iyi ngingo Taylor yavuze ko uba ugomba kwitonda ugakoresha amagambo abaze kandi yuje ubuhanga atarimo gukabya. Yemeza ko nubwo wabazwa ikibazo gikomeye wirinda kugira ubwoba ahubwo ugasubiza ugaragaza ko ibyo uvuga ubihagazeho.

Taylor atanga inama ko igihe wakoze imyitozo neza mbere yo kugera mu kizamini ndetse ukagaragaza ko wifitiye icyizere, bigufasha kugera ku byo umukoresha yateganyaga kubona ndetse binakugira umuntu w’akataraboneka uhabwa akazi mu buryo bunoze.

Ubazwa asabwa kureba mu maso y'umubaza agaragaza ko nta soni afite/Ifoto: Internet

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244