Ubuhamya bukomeye bwa Muneza umaranye Virusi itera Sida imyaka 21

Yanditswe na Evariste Nsengimana
Kuya 2 Ukuboza 2019 saa 04:56
Yasuwe :
0 0

Muneza Sylvie avuga ko abamenye bwa mbere ko bafite virusi itera Sida mu Rwanda bahuye n’ibibazo birimo ihezwa n’akato, bamwe ikabica kubera ko imiti igabanya ubukana bwayo yari itaragera kuri bose ariko nyuma Guverinoma ikaza kubigira iby’ibanze bagafashwa.

Amateka agaragaza ko umuntu wa mbere ufite Virusi itera Sida ku Isi yakorewe isuzuma ribyemeza mu 1981 ariko mu Rwanda ibipimo byayo bihagera mu 1987.

Muneza w’imyaka 47 watangiye ubuhamya mu Nama Mpuzamahanga ya 20 yiga ku Cyorezo cya Sida n’Indwara zandurira mu mibonano mpuzabitsina muri Afurika, ICASA, iteraniye i Kigali ku wa 2-7 Ukuboza 2019, avuga ko yayanduye mu 1998.

Bisobanuye ko iyi virusi yamenye ko ayifite nyuma y’imyaka 11 umuntu wa mbere mu Rwanda bigaragaye ko ayirwaye. Kuri ubu ayimaranye imyaka 21 ariko ni umubyeyi ushikamye ubona uguwe neza.

Uyu mugore udafite umugabo, yamenye ko afite virusi itera Sida nyuma yo kumarana igihe inkorora idakira ariko agiye kwa muganga aza gusanga ari igituntu arwaye, atangizwa imiti yacyo.

Yakomeje ati “Ni bwo icyo gihe bahise bampima, basanga mfite virusi itera Sida. Muri icyo gihe kumva virusi itera Sida byari ikibazo gikomeye cyane ko nta muti cyangwa urukingo yari ifite. Nkimara kumva ko nyifite ndabyibuka icyo gihe nashatse kwiyahura mu modoka ngo ingonge.”

Nubwo yatekereje kwiyahura kubera kudahita yiyakira ntabwo ubuzima bwarangiriye aho kuko Imana yakinze ukuboko agataha amahoro.

Gusa muri icyo gihe yahuye n’akaga kuko abaturanyi bamuhaye akato bikomeye.

Ati “Mu baturanyi no mu miryango yanjye hari harimo akato kenshi cyane, kunyegera byari ikibazo. Bumvaga ko nabanduza. Muri icyo gihe, abantu benshi twari duturanye barimo kugenda bapfa bazize Sida, imfubyi zari zihari ari nyinshi, biba ngombwa ko mu buzima bubi nari ndimo negerana n’imfubyi za Sida n’abandi bari bameze nkanjye.”

Muneza icyo gihe ubuzima bwe bwari mu kaga kuko yari asigaranye ibilo 20 gusa, imisatsi ye yaramaze gucurama kubera ingaruka za Virusi itera Sida yari amaranye igihe atabizi.

Kubera kunywa imiti y’igituntu neza byatumye ubuzima bwe butangira kugaruka.

Ati “Abaturanyi bagenda batuvamo bazize Sida, imfubyi ziraho ari nyinshi biba ngombwa negeranya abana bagizwe imfubyi na Virusi itera Sida n’abandi bari bameze nkanjye dushinga ihuriro ryitwa IGIHOZO.”

Iri huriro ryashinzwe ari iry’abafite virusi itera Sida n’abagizwe imfubyi na yo.

Muneza avuga ko we na bagenzi be bari kumwe mu Mujyi wa Kigali byabaye ngombwa ko bihuza n’abandi bari hirya no hino mu gihugu kugira ngo nibagira n’ubufasha bakenera kuri Guverinoma bubagereho byoroshye.

Ati “Leta twayeretse ikibazo cy’ingutu twari dufite, by’umwihariko icy’imiti igabanya ubukana cyari kigoye, akato n’ihezwa byadukorerwaga mu baturanyi byari bigoye n’abana b’imfubyi za Sida.”

Nyuma yo gushinga iryo huriro Leta yabafashije kubona imiti igabanya ubukana ku buntu, abenshi batangira kuyinywa ndetse banafashwa kwivuza indwara z’ibyuririzi zari zugarije abatari bacye muri icyo gihe.

Umuryango Imbuto Foundation uyobowe na Madamu Jeannette Kagame wagize uruhare rukomeye mu gufasha abafite virusi itera Sida kubona ubwishingizi no kwivuza izo ndwara zari zugarije benshi mu bari bayimaranye igihe batabizi.

Ati “Muri icyo gihe nibwo twakomeje kwicara tureba ibibazo byari bihari ari byinshi, icyo gihe abana bavukanaga Virusi itera Sida ari benshi ariko Nyakubahwa Jeannette Kagame yafashe iya mbere mu gufasha umubyeyi ufite virusi itera SIDA kubyara umwana utanduye.”

Ni igikorwa cyafashije u Rwanda by’umwihariko mu kugabanya umubare w’Abanyarwanda bashya bandura Virusi itera Sida.

Muneza avuga ko uyu munsi nta kibazo afite ndetse ashimishwa no gusangiza abandi ubuhamya bw’ubuzima yanyuzemo.

Ubushakashatsi buheruka gutangazwa mu Ukwakira 2019, bwerekenye ko umubare w’abantu bashya bandura Virusi itera Sida mu Rwanda ugenda ugabanuka uko imyaka ishira, by’umwihariko ukaba waravuye kuri 3/1000 (barenga ibihumbi 10) mu 2014 ukagera kuri 1/1000 (barenga 5400) mu 2019. Bivuze ko habayeho igabanuka risatira 50% mu myaka itanu ishize.

Mu mwaka wa 2000 abana hafi 10% bavukanaga Virusi itera Sida. Iyo mibare yaragabanutse ku buryo umuntu 1% ni we uyivukana.

Muneza Sylvie yatanze ubuhamya bw'uburyo amaranye Virusi itera Sida imyaka 21 ariko ubu akaba agikomeye, anahumuriza abandi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza