Musanze: Ntibanika afite imyaka 106 n’abamukomokaho 102 kandi aracyakomeye; ibanga ryo kuramba

Yanditswe na Claude Bazatsinda
Kuya 29 Mutarama 2021 saa 04:10
Yasuwe :
0 0

Ntibanika Agnes, ni umwe mu Banyarwanda bake bariye ingoma ya Yuhi V Musinga kuri ubu bakaba bari no gusogongera ku byiza bya Leta y’Ubumwe. Afite imyaka irenga 100 kuko yavutse mu 1915 nk’uko bigaragara mu byangombwa by’irangamimerere.

Uyu mukecuru utuye mu Karere ka Musanze, Umurenge wa Rwaza mu Kagari ka Kabushinge avuga ko atibuka neza igihe yavukiye gusa ibyangombwa bye bigaragaza ko yavutse mu 1915, ubwo Intambara ya mbere y ’Isi yari irimbanyije, bivuze ko afite imyaka 106.

Yabaye mu Rwanda rutagira imodoka, rutagira umujyi, rutagira inkweto ndetse rutarangwamo n’urukarango, none ubu imihanda y’umukara yo mu Karere ka Musanze arayogoga nk’abandi. Yariye Ingoma araziyongeza.

Kuramba ni umugisha ndetse abandi babibona nk’amahirwe cyane cyane iyo bigeze mu bihugu bikiri mu nzira y’amajyambere aho na 40 kuyirenza aba ari Imana bitewe n’ubuzima bugoranye abaturage babyo banyuramo umunsi ku munsi.

Ku Isi yose byumvikana nk’igitangaza ko umuntu arengeje imyaka 100 y’amavuko kuko uhiga abandi ari Umuyapanikazi, Kane Takana w’imyaka 118.

Mu kiganiro kirambuye uyu mukecuru yagiranye na IGIHE yahishuye byinshi mu buzima bwe yemeza ko ari byo byamufashije kuramba.

IGIHE: Ese waba wibuka igihe wavukiye?

Ntibanika: Nakwibuka se gute? Ntabwo nibuka igihe navukiye; cyakora ba mama bambwiraga ko navutse inzara yarateye ariko icyo nibuka ni uko navukanye n’undi twari impanga ngo njye nasigaye mu nda mvuka bukeye undi yaraye hanze.

IGIHE: Wibuka se aho wavukiye?

Ntibanika: Navukiye Kirama ( Ubu Ni mu Murenge wa Gacaca muri Musanze) hakurya y’uruzi rwa Mukungwa.

IGIHE: Ufite urubyaro?

Ntibanika: Oya hasigaye umukobwa umwe abandi baratashye.

IGIHE: Tubwire muri make uko ubayeho kuri uyu musozi?

Ntibanika: None se mbayeho ku bwanjye? Mbayeho ku bw’ Imana; Nyagasani niwe umbeshejeho n’abangaba ( Yavugaga abagore b’abuzukuru be bari aho).

IGIHE: Nonese, ni utekereza ari iki cyatumye ugira imyaka 100?

Ntibanika: Umva nariye neza kandi n’aha nashakiye umugabo nashatse yandishije neza!

IGIHE: Ni iki wakundaga kurya?

Ntibanika: Sinakunze kurya ibidasanzwe kuko twaryaga byinshi twiyejereje, gusa naryaga n’akanyama, umuceri yewe nariye neza ntacyo nigeze nicuza kuko byose twabaga tubifite.

IGIHE: Naho mu byo kunywa wakundaga iki?

Ntibanika: Nakundaga kunywa akagwa kuko twari dufite urutoki rwera cyane, tugakama kandi kera ntibasengerezaga (Kugurisha inzoga), abagabo bacu bari abantu bashyize hamwe bagatumirana, bakanywa, tugateka ibishyimbo, amateke, ibihaza, ibijumba n’ibindi kandi n’ubu ni uko sinigeze mbura ibyo kurya rwose.

IGIHE: Ni gute kera mwarimbaga ?

Ntibanika: Ni impu twambaraga zivuye ku ntama bakazinyuka zanoga tukazambara n’imishumi, tugashyiraho ingimba n’imihagatiro mu mutwe. Twiyambariraga impu rwose.

IGIHE: Ni iyihe nama wagira urubyiruko rw’ubu ugendeye ku mahirwe ubona ahari?

Ntibanika: Urubyiruko rw’ubu rufite amahirwe menshi tutigeze tugira ariko bararangaye!

Twe kera ntitwigaga ariko bo bariga bakagera n’aho baba Abaminisitiri, Abadepite bakaba n’abategetsi bakomeye, gusa icyo nababwira gikomeye urubyiruko ry’ubu ni rwirinde ubusambanyi.

None ubu abakobwa bariraye, bari kubyara uko bishakiye, abahungu bari kubatera inda bakiri bato bikabicira ubuzima, bitware nk’uko twitwaraga.

IGIHE: Ni iki wumva wicuza utakoze mu buzima bwawe wumva wicuza?

Ntibanika: Ntacyo! Ntacyo nicuza rwose!

Ntibanika ari mu kuri

Kuba kwitwara neza Ntibanika avuga byatuma umuntu aramba binemezwa n’impuguke mu by’ubuzima Dr. Nduwumukiza Olivier uvuga ko igihe umuntu amara ku Isi kigenwa n’uko yitwaye.

Yagize ati " Ni ukuvuga ngo ibijyanye n’imisazire y’umuntu cyangwa umubiri biterwa n’uburyo umuntu aba yaritwaye mu buzima busanzwe; ibi bijyana n’imirire, iminywere n’uko yitwaye mu guhangana n’ibibazo biterwa n’umunaniro. Ibyo rero ntabwo ari buri wese ubasha kumenya uburyo yabyitwaramo"

"Ku bijyanye n’imirire, turabyiga ariko usanga akenshi na kenshi ababyize aribo babirengaho"

Yakomeje ati “Tuvuze ku guhangayika (Stress), nabyo byongera ibibazo mu mubiri, iyo ukora akazi cyane cyane ak’ijoro nturuhuke nabyo byaba intandaro."

"Ibi nabyo bisaba kumenya ngo ni gute nakwitwara mu gihe cyo guhangayika ariho hakenewe ibiribwa bifite intungamubiri”

Yakomeje avuga ko kuba uyu mucekuru yararambye bijyanye n’uburyo kera babagaho barya ibiribwa by’umwimerere kandi byabonekaga mu buryo bworoshye harimo kuba byareraga mu mashyamba yabaga abakikije.

Ntibanika ni umupfakazi kuva mu 1987 ubu afite abamukomokaho bagera ku 102 harimo abuzukuru n’abuzukuruza.

Ntibanika afite imyaka 106 yemeza ko akesha neza ubuzima bwiza yanyuzemo
Abagore b'abuzukuru be bamuba hafi buri gihe
Ntibanika Agnes iyo ari mu rugo akora imirimo yoroheje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .