00:00:00 IGIHE NETWORK KN KINYARWANDA EN ENGLISH FR FRANCAIS

Miss Ingabire Grace yoroje ingurube abajyanama b’ubuzima bo muri Rwamagana (Video)

Yanditswe na Mukahirwa Diane
Kuya 2 Nzeri 2021 saa 10:09
Yasuwe :
0 0

Nyampinga w’u Rwanda 2021, Ingabire Grace, afatanyije n’Ikigo Africa Improved Foods, boroje ingurube koperative eshatu z’abajyanama b’ubuzima bo mu Murenge wa Muhazi mu Karere ka Rwamagana.

Uyu mushinga wateguwe n’iki kigo gisanzwe gitunganya ibiribwa muri gahunda yo koroza abajyanama b’ubuzima hirya no hino mu gihugu, wahisemo abajyanama kuko basanzwe bakorana mu kurwanya imirire mibi binyuze mu nyunganiramirire ya shisha kibondo.

Biteganyijwe ko uyu mushinga uzagera mu turere twose tw’igihugu ariko watangiriye mu ka Rwamagana aho hatanzwe ingurube esheshatu kuri koperative eshatu buri imwe ihabwa ebyiri.

Abahawe izi ngurube bazazorora nizimara kubwagura batange 60% z’umusaruro wazo ku yandi makoperative nyuma buri munyamuryango nawe azagenda ahabwa iye ku giti cye.

Inkunga yatanzwe ifite agaciro ka miliyoni 6 Frw ikaba ikubiyemo ingurube esheshatu ndetse no kuzikurikirana mu gihe cy’amezi atandatu haba mu bizitunga no kuzivuza.

Mu kiganiro na IGIHE, Miss Ingabire Grace yavuze ko afatanyije na Africa Improved Foods batekereje guha abajyanama b’ubuzima izi ngurube nk’abantu baba ku isonga mu kurwanya imirire mibi.

Yagize ati “Africa Improved Foods ishinzwe kurwanya imirire mibi n’igwingira mu bana, twashatse gukora igikorwa cyazamura sosiyete. Tubona ko abajyanama b’ubuzima aribo bari ku isonga mu kurwanya imirire mibi kuko badufasha gutanga shisha kibondo ku rwego rw’umudugudu.”

Ibi yabihuje n’uwari uhagarariye Africa Improved Foods muri iki gikorwa, Mutuminka Rwagasore, wavuze ko babonye imirimo abajyanama b’ubuzima bakora mu kurwanya imirire mibi bagahitamo kubatera ingabo mu bitugu.

Yagize ati “Twatekereje abajyanama b’ubuzima kubera ko dukorana na bo cyane mu gutanga shisha kibondo dukora y’abana n’abagore batwite, bamaze imyaka bakora iki gikorwa banatanga impuguro ku mirire mibi ubona ko bifitiye umumaro igihugu niko kubatekerezaho.”

Ku ruhande rw’abahawe izi ngurube, Umuyobozi w’Abajyanama b’Ubuzima mu Karere ka Rwamagana, Musoni William, yashimiye Miss Rwanda 2021 na Africa Improved Foods ku kuba baboroje abizeza ko bazita kuri izi ngurube zikabagirira akamaro.

Yagize ati “Turashimira abatworoje kuko iyo umuntu agutekerezaho aba agukunda turabashimira kandi tubizeza ko ubushobozi bashyize muri ibi bintu butazapfa ubusa.”

“Dusanzwe tworora ingurube mu myaka irenga umunani dufite umukozi w’umwuga ushinzwe kuzitaho, nta mpungenge dufite, tuzazitaho neza.”

Umuyobozi w’Akarere ka Rwamagana wungirije ushinzwe Imibereho myiza, Mutoni Jeanne, yashimye abatanze izi ngurube asaba abajyanama b’ubuzima kuzitaho zikazababyarira inyungu.

Yagize ati “Nabasaba gukomeza nk’uko bakoraga kuko basanzwe borora ingurube, bakaba hamwe bakumvikana n’ubuyobozi bwa koperative kandi natwe tuzababa hafi kugira ngo uyu mushinga utere imbere.”

Ingabire Grace yambaye ikamba rya Nyampinga w’u Rwanda 2021 ku wa 20 Werurwe 2021 akaba azarimarana igihe cy’umwaka.

Aba bajyanama basanzwe borora ingurube bakaba babimazemo imyaka umunani
Abajyanama b'ubuzima biyemeje gufata neza ingurube bahawe
Miss Ingabire Grace yoroje ingurube abajyanama b’ubuzima bo mu Karere ka Rwamagana
Uwari uhagarariye Africa Improved Foods muri iki gikorwa, Mutuminka Rwagasore, yavuze ko babonye imirimo abajyanama b’ubuzima bakora mu kurwanya imirire mibi bagahitamo kubatera ingabo mu bitugu
Uyu muhango wabereye aho iyi koperative isanzwe yororera ingurube
Ingurube bahawe zitezweho kubaha icyororo mu minsi ya vuba
Umuyobozi w'Akarere ka Rwamagana wungirije ushinzwe Imibereho Myiza, Mutoni Jeanne, wari witabiriye uyu muhango yashimye abatanze izi ngurube asaba abajyanama b’ubuzima kuzitaho zikazababyarira inyungu
Miss Rwanda 2021, Ingabire Grace, yavuze ko iri ari ishimwe abajyanama b'ubuzima bagenewe ku bw'umuhate bashyira mu kurwanya imirire mibi
Abari bitabiriye uyu muhango bashimye Miss Rwanda 2021 ndetse na Africa Improved Foods

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .