Kigali: Yahamagariwe akazi ko mu rugo atungurwa no kubwirwa kwinjira mu ko mu buriri

Yanditswe na Thamimu Hakizimana
Kuya 17 Mutarama 2021 saa 11:57
Yasuwe :
0 0

Umukobwa w’imyaka 19 y’amavuko utuye mu Kamenge mu Murenge wa Kimisagara, Akarere ka Nyarugenge yatengushywe n’uwamuhamagaye ashaka kumuha akazi ko mu rugo atungurwa no kwakirizwa ako mu buriri ariko arakanga.

Iyo uganiriye na Umutesi Marie Claire [izina yahawe] ubusanzwe uvuka mu Karere ka Gisagara, akubwira uburyo yaje gushaka akazi ko mu rugo mu Mujyi wa Kigali hanyuma agashishikarizwa gukora ak’uburaya.

Yabwiye IGIHE ko amaze ibyumweru bitatu gusa muri Kigali, aho yaje aje kureba mugenzi we wari wamubwiye ko yamuboneye akazi ko mu rugo. Uyu mukobwa yemeza ko ari bwo bwa mbere yari akandagiye mu mihanda yo mu mujyi.

Mu rugendo rwe ngo yari afite amatsiko yo kureba uwo Murwa Mukuru w’u Rwanda wirahirwa n’abawuzi. Aya mashyushyu ngo yaje gushira ndetse atangira kuzinukwa Kigali nyuma yo kumenya akazi uwari umuzanye yiteguraga kumwinjizamo.

Ati “Njye naje ari mugenzi wanjye umpamagaye kuri telefoni ambwira ko yamboneye akazi naho njye simenye ko ari akazi k’uburaya yashakaga ko nkora. Nyuma nibwo naje kumenya ko ari indaya.”

Umutesi akomeza avuga ko nyuma y’iminsi ibiri ageze muri Kigali yasabye mugenzi we kumujyana aho azakora akamubwira ko hari akandi kazi gahari kandi karimo amafaranga menshi.

Ati “Mbere ntabwo nari nzi ko ari indaya gusa numvaga mu cyaro babivuga nyuma yo kuza rero nibwo nabonye bwa mbere ararana n’abagabo imbonankubone kuko yabinjizaga ndeba.”

Ahamya ko yatunguwe n’ukuntu uwo mukobwa yazanye umugabo aho yabaga yinjira mu cyumba arangije amusaba kumusangamo.

Ati “Icyo gihe agace kose karabimenye kuko twahise twiteza abantu kuko yarambwiye ngo ngende turyamane aranyishyura ibihumbi 20 Frw ndanga, noneho umugabo aza kunyifatira mu ruganiriro ndasakuza ahita andeka kuko yumvaga abantu benshi hanze bahuruye."

Kuva icyo gihe ngo yicujije icyamuzanye i Kigali ndetse yemeza ko kuri ubu atindiwe n’uko gahunda yo guhagarika ingendo zihuza uturere irangira akisubirira ku ivuko i Gisagara.

Si rimwe cyangwa kabiri humvikanye inkuru nyinshi zivuga abakobwa bizezwa imirimo haba mu Rwanda no mu mahanga ya kure ariko bahagera bagasunikirwa kuryamana n’abagabo kugira ngo babone amaramuko. Inzego zitandukanye zitanga inama ko bakwiye gushishoza mbere yo gufata icyemezo cyo gukurikira umuntu wabijeje akazi.

Umutesi ahamya ko yazinutswe Kigali ndetse ko yiteguwe gusubira ku ivuko igihe ingendo zizaba zimaze gufungurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .