00:00:00 IGIHE NETWORK KN KINYARWANDA EN ENGLISH FR FRANCAIS

Ibiba mu ntekerezo no mu mubiri w’umuntu usatira urupfu

Yanditswe na Zigiranyirazo Bajecteur
Kuya 10 Gicurasi 2021 saa 08:52
Yasuwe :
0 0

Ibintu bitatu bigenga urugendo rw’ubuzima bwa muntu ni ukuvuka, akabaho hanyuma agapfa. Nubwo bishoboka ko abantu bamenya igihe uruhinja ruzavukira, ntawe umenya uwavutse igihe ashobora kuzamara cyangwa ngo amenye umunsi azashiriramo umwuka nubwo intekerezo n’umubiri bishobora gucira amarenga nyirabyo ko asatira indunduro y’ubuzima bwe.

Umuntu ashobora gupfa mu buryo butunguranye azize impanuka, indwara yo guturika udutsi tw’ubwonko cyangwa indwara y’umutima. Uyu aba apfuye bitandukanye cyane n’undi ushobora gupfa azize izindi ndwara cyangwa azize izabukuru kuko we agenda agaragaza ibimenyetso by’uko urugendo rwe rw’ubuzima bwo ku Isi agiye kuruhinira bugufi.

Umuyobozi mu Bitaro byitiriwe Mutagatifu Vincent by’i Melbourne muri Australie, Prof. Mark Boughey, yavuze ko abantu baba badashaka kumva no gutekereza iby’urupfu kugeza rugeze imbere yabo.

Ati “Abantu bamwe na bamwe babihungira kure abandi ntibanashake kubitekerezaho kugeza ubwo bisanze mu mboni z’urupfu, ariko si ko byagakwiye kumera.”

Avuga ko gutekereza ku rupfu bituma yaba umurwayi cyangwa n’umuryango we babasha kururutsa umutima bagasa n’ababyiteguye kandi bigafasha n’umurwayi gupfa mu mahoro n’umutuzo.

Bimwe mu bimenyetso biranga umuntu wenda gushiramo umwuka nk’uko Boughey abigaragaza harimo guhumeka insigane, kubura amaramu (appétit) gutakaza ibiro, kugira isesemi, kugira umunaniro, gucika intege n’ibindi.

Akomeza avuga ko umuntu wenda gupfa atangira kumva adashishikajwe no kumenya amakuru, kuganira n’abandi ahubwo agakunda kugira ibitotsi cyane akava mu Isi mpangwamboni akinjira mu Isi ndengashusho aho ashobora kwibona ari kumwe n’abantu akunda kandi ahoza ku mutima.

Umuntu wenda gupfa atakaza ububasha bwo kumva uburyohe n’impumuro, akumva ntagishaka kurya ndetse umuvuduko we w’amaraso ukagabanuka cyane.

Prof. Boughey avuga ko mu guhumeka insigane k’umurwayi usatiriye urupfu, rimwe na rimwe ahumeka gahoro cyane, undi mwanya agahumeka vuba cyangwa se hakanacamo akanya runaka atari guhumeka.

Umuganga wibanda ku kwita ku bantu benda gupfa, Prof. Ken Hillman, avuga ko kimwe mu bibazo bikomeye abazwa n’abarwaza ari ugusubiza igihe umurwayi asigaje ngo ashiremo umwuka.

Ati “Iki ni ikibazo gikomeye gusubiza neza. Birangira mbabwiye ko atari ibintu umuntu yapfa gupimanya ngo abimenye.”

Avuga kandi ko umuntu umuntu wagaragaje ibimenyetso ko ashobora gupfa adaciye mu buribwe bwinshi ahubwo gahoro gahoro ashobora kugenda yitiranya ibintu, ku buryo n’iyo agize ububabare ashobora guhabwa imiti imugabanyiriza ububabare agapfa atababaye bikabije.

Ken yavuze ko kandi kuba byagaragara ko umurwayi afite ibimenyesto bica amarenga ko adashobora gukira, iyi mpamvu itabuza abaganga kuguma kumukurikirana no kumwitaho neza.

Hari ikimenyetso abantu basigaje umunsi umwe cyangwa ibiri ngo bapfe bakunda kugaragaza nk’uko Prof Boughey abihamya. Ati “Ku muntu wenda gupfa hashobora kuba icyumviro kigaragaza ko yiteguye kugenda, nko kwibona abumbatiwe ahantu hatunganye mu gihe cy’umunsi umwe cyangwa ibiri.”

Prof. Boughey yavuze ko yizera ko hari imbarutso yemerera umuntu gupfa akagenda.

Ati “Hari ibyo tubona aho umurwayi akenera kubona umuntu ufite icyo asobanuye mu buzima bwe bisa n’aho aba amusaba uburenganzira bwo kugenda. Hari n’abo nabonye bavugisha abavandimwe babo bari mu mahanga kuri telefoni barangiza bakazirambika hasi bagahita bashiramo umwuka.”

Uko wafasha umuntu uri mu masaha ya nyuma y’ubuzima

Ubushakashatsi bwerekana ko kumva ari cyo cyumviro cya nyuma umuntu asigarana mbere yo gupfa. Abantu bagirwa inama yo gukomeza kumuganiriza mu buryo butuje kugira ngo bimufashe gupfa ari mu mahoro kabone nubwo yaba atabasha gusubiza ariko aba arimo yumva.

Umuforomokazi w’umunya-Australie, Jane Phillips, yavuze ko we nk’umunyamwuga, iyo abona umurwayi ari muri icyo gihe arushaho kumuba hafi.

Ati “Nk’umuforomokazi, nkomeza kubwira abarwayi ko mpari, nkabakoraho nkanakomeza kubavugisha. Ibi kandi ni byo ngiramo inama abarwaza.”

Mu nama zitangwa n’abaganga kandi harimo kwicara iruhande rw’umurwayi, ukamufata mu kiganza, ukamukorakora mu gahanga ukamuganiriza ku byo mu rugo ndetse n’amatungo kandi ukizera y’uko arimo kukumva.

Gupfa ntibiba mu munota umwe ngo bibe birangiye, ahubwo ni uguhagarika gukora kw’ibice by’umubiri ariko bikaba buhoro buhoro kimwe ku kindi. Abaganga ni bo bemeza ko umuntu yapfuye kandi bakabisinyira.

Umuhanga w’Umudage mu mitekerereze ya muntu, Arthur Schopenhauer, we avuga ko ubuzima ari urugendo rw’intambwe imwe ku yindi rwerekeza ku rupfu.

Abahanga mu mitekerereze ya muntu, bavuga ugihumeka wese aba akwiye gutekereza ko hari igihe kizagera uwo mwuka ugahagarara

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .