Kwamamaza

‘Bridal shower,’ibirori byatangiye gutera ubwoba abakobwa bakiri ingaragu mu Rwanda

Yanditswe kuya 14-09-2016 saa 15:46' na Umutoni Rosine


Bridal shower ni ibirori bikorerwa umukobwa ugiye gushyingirwa ahanini bigamije kumushyigikira mu buryo bw’ubushobozi kugira ngo azabashe kujya kubaka urwe ntawe umunyujijemo ijisho.

Nubwo ibi birori byatangiye ahagana mu 1860 mu Bubiligi , byamamaye cyane mu bihugu nka Leta Zunze Ubumwe za Amerika ,Canada, Australia na New Zealand mu 1890 bigenda bikomeza n’ahandi.

Bijya gutangira, byategurwaga n’abakobwa cyangwa abagore b’inshuti z’ugiye gushyingirwa zikamufasha kumubonera iby’ibanze azakenera nk’umuntu ugiye gushinga urugo hirindwa ko umuryango we ukennye utagoka cyane.

Ikindi cyatumaga babikora, ngo hari ubwo umuryango w’umukobwa wangaga kugira icyo umufasha bitewe n’uko utishimiye umusore ugiye kumushaka, icyo gihe urungano n’abagore bafataga umwanzuro bakamushyigikira bakamuha ibyo ababyeyi be bamwimye maze agakunda akabana n’uwo yihitiyemo.

Byagiye bifata indi sura

Iyi nkomoko yo gushyigikira umugeni ku bijyanye n’ibyo azakenera ageze iwe, igenda ihindura isura kuko nko mu Rwanda uretse impano zihabwa uwateguriwe ibirori haniyongeraho umwanya twakwita rurangiza w’impanuro.

Nubwo bitazwi neza umwaka ibi birori byatangiriye kwitabirwa cyane mu Rwanda, bigaragara ko bitarasakara cyane mu gihugu kuko ubu ari bwo biharawe cyane mu banyamujyi n’abandi basirimutse.

Hazamo gutandukira

Nk’uko twabivuze, inkomoko ya ‘Bridal Shower’ yari igamije gushyigikira umugeni mu byo azakenera mu gushinga urugo rwe, abantu bakaza bitwaje impano zitandukanye bakishimana n’umugeni bagataha.

Kuri ubu nyuma yo gushyikiriza umugeni impano, usanga hakurikiraho igice twakwita ko ari rurangiza aho uwahageze wese yaba umukobwa cyangwa umugore afata ijambo agatanga impanuro.

Izi mpanuro hari bamwe zitera urujijo bitewe n’uko umuntu wese aba avuga ubuhamya bwe kandi urugo rwe rutubatse kimwe n’urw’undi , ndetse abakobwa bo bakaba baba bataranubaka ingo, bituma umugeni abura icyo afata n’icyo areka.

Havugirwamo amagambo ateye ubwoba

Umugeni umwe tutashatse gutangaza amazina, we ngo yahavuye yatinye abagabo cyane kuko usanga harimo ubuhamya bwo kuvuga ko umugabo ari umwana w’undi, ko ntawe ukwiye kumwizera, ibintu bituma cyane batinya ubuzima baba bagiye kwinjiramo.

Ati” Ikibazo nabonye muri Bridal Shower nagiye njyamo kugeza ubwo nanjye bayinkoreye ni uko usanga ibivugirwamo byinshi biba ari bibi bikanga ugiye gushaka kurenza ibyiza bivugwa."

"Mbere nari nsanzwe numvikana n’umugabo wanjye, amafaranga mfite akaba ayazi kandi nanjye ayo afite nkaba nyazi, ubwo bavugaga ku bijyanye no gucunga umutungo w’urugo muri Bridal Shower ,bambwiye ukuntu ngomba kugira konti yanjye umugabo atazi kugira ngo nampinduka nzabone ikimbeshaho.”

Yakomeje agira ati ” Nabishyize mu bikorwa , akajya ayoberwa aho amafaranga ajya, twari tugeze aho gutandukana ariko imiryango yacu yarahagobotse dusasa inzobe baratwunga ariko na n’uyu munsi umugabo ntabwo anyizera aba azi ko hari ibyo mukinga.”

Mukundente (izina ryahinduwe) ngo we bamukuye umutima ku bijyanye n’uburyo bafata umugabo mu buriri, bituma abanza kubira icyuya.

Ati” Njyewe bambwiye ko umugore agomba kwifata nk’indaya imbere y’umugabo we kugira ngo amushimishe bityo ye kuzamuca inyuma, ariko iyo umugabo wanjye yatahaga agasanga nambaye akajipo kagufi cyane , nkatangira kumusoma ataranaruhuka , yambwiraga ko atabikunda ndetse bitampesha icyubahiro, numvaga nkozwe n’isoni , ibyo bambwiye byose nasanze atari ukuri ntangira kubicikaho.”

Impanuro zo muri Bridal Shower zitera ubwoba abakobwa batarashaka

Bitewe n’uko Bridal Shower zitabirwa n’abakobwa batarubaka ingo, bamwe basanga ibihavugirwa byakagombye kugira umupaka kuko hari abakobwa bitera ubwoba.

Uwimpuhwe (amazina yahinduwe) akomoka mu Karere ka Nyarugenge, ngo amaze kwitabira Bridal Shower inshuro eshanu, gusa ku bwe ngo hari ibitagakwiye kuvugirwamo kuko n’ubwo bose baba ari igitsina gore ngo haba harimo n’abatarageza igihe cyo kubyumva.

Ati”Hari hamwe babikora neza bagera ku biteye isoni umugeni akaba ariwe bihererana abandi mwatashye, ariko hari n’ahandi usanga abagore bahita bavuga ibijyanye n’amabanga yo mu buriri, uko umuntu aryamana n’umugabo, uko amwinjiza mu gikorwa cyo gutera akabariro n’ibindi, abakobwa bataranateganya no gushaka bumva bibateye ubwoba.

"Njyewe mbona abagore bagakwiye kumenya ibivugirwa muri rusange no mu mwiherero kuko bishobora gutuma bamwe bararuka abandi bikabangisha abagabo”.

Hari abo ibivugirwa muri ‘Bridal Shower’ byubakiye

Ibivugirwa muri Bridal Shower ngo hari abo byubakiye bitewe n’icyo umuntu aba yahisemo gukurikiza mu biba byavuzwe.

Umutesi ni uwo mu Murenge wa Remera mu Karere ka Gasabo ati” Nta kintu nari nzi ku bijyanye n’inshingano z’umugore mu rugo, iby’uko ari we utuma imiryango isabana, ibyo gucunga neza umutungo n’ibindi nabyungukiye muri Bridal Shower kandi byangiriye umumaro”.

Ibi birori bitangiye gukura umutima abakobwa mu Rwanda bitewe n'ibisigaye bivugirwamo

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 30 Nzeri 2016
Copyright © 2009 -2014 - IGIHE Ltd - All Rights Reserved