Bashobora no kuba abicanyi: Ubuzima bushaririye bw’abana bakurira mu miryango irimo amakimbirane

Yanditswe na Mukahirwa Diane
Kuya 6 Gashyantare 2021 saa 10:50
Yasuwe :
0 0

Magingo aya biragoye ko hashira iminsi ibiri cyangwa itatu hatumvikanye inkuru y’umugabo cyangwa umugore wishe uwo bashakanye biturutse ku makimbirane arangwa mu miryango.

Iyi miryango igira amakimbirane kugeza ayigejeje ku kwicana iba ifite abana kandi ubwo bwumvikane buke hagati y’ababyeyi, buba bari kureba, bikaba byabatera ibibazo by’ihungabana.

Abahanga mu buzima bwo mu mutwe, bavuga ko abana bavuka ku babyeyi bagiranye amakimbirane arimo no kwicana, bahura n’ibibazo byo mu mutwe bibatera kujya mu mihanda, kunywa ibiyobyabwenge n’indi mico iterwa n’agahinda gakabije baba bagize.

Umuhanga mu mitekereze akaba n’umuganga mu bitaro bya Gihundwe, Mucyo Aline, yatangaje ko abana bavuka mu miryango iba yarabayemo ubwicanyi bahura n’ingaruka z’igihe kirekire zishobora kubaviramo guhinduka abagizi ba nabi.

Ati “Umwana uturuka muri iyi miryango usanga akura afite ipfunwe ryo kwegera abandi, aba yumva ko nawe bamubona nk’umwicanyi bigatuma ashaka ubundi buhungiro akajya mu biyobyabwenge ntiyegere abantu.”

“Kubera kugenda yihunza abantu, hari aho bigera agatangira kugira ihungabana, akagira uburwayi bwo mu mutwe, akaba yatangira kugirira nabi abantu ndetse no guhinduka umwicanyi.”

Kuba abana bahura n’izi ngaruka bituruka ku kuba batarakurikiranywe n’umuryango, abaganga ndetse n’inzego za leta kugira ngo umwana wahuye n’ibi bibazo aganirizwe areke kugira ihungabana.

Ikigo cy’Igihugu gishinzwe Imikurire no kurengera umwana, kivuga ko mu nzego z’ibanze hari abantu baba bagenewe kuganiriza abana bahuye n’ibyo bibazo.
Umuyobozi w’Ikigo cy’Igihugu gishinzwe Imikurire no kurengera umwana, Dr. Anitha Asiimwe, yabwiye TV1 ko bakunda guhura n’ibibazo by’abana baba basizwe n’ababyeyi babo muri ubu buryo, ariko hari uburyo bafashwamo.

Ati “Buriya ku mudugudu habamo abo twita inshuti z’umuryango kuri buri mudugudu, haba hari babiri bahuguriwe ibijyanye no kurengera umwana iyo byabaye, ni bo bafata iya mbere mu kureba uko byifashe.”

“Aba bakorana n’inzobere mu buzima bwo mu mutwe baba bari mu bitaro bakaba bafasha umwana mu bijyanye n’imitekereze ndetse n’iyo adafite umuryango umwakira ahabwa ba malayika murinzi bakaba bamurera mu gihe tugishaka igisubizo kirambye.”

Kuba iyo habayeho kwicana hagati y’ababyeyi hakurikiraho gukurikirana uwakoze icyaha agafungwa ariko hakirengagizwa ingaruka zigera ku bana nabyo bituma abana bahura n’ihungabana. Ibi bitanga umukora ku miryango irengera abana wo kujya bakurikirana abana bo mu miryango irimo amakimbirane.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .