Nyatanyi Marie Pierre yasohoye igitabo kivuga ku bagore 20 b’intangarugero muri Afurika

Yanditswe na Kanamugire Emmanuel
Kuya 17 Nzeri 2016 saa 02:46
Yasuwe :
0 0

Nyatanyi Marie Pierre, Umunyarwandakazi utuye mu Bubiligi yashyize ahagaragara igitabo yise “Plurielles Femmes de la diaspora africaine", kivuga ku buzima n’amateka y’abagore 20 baturuka muri Afurika, babaye intangarugero muri Sosiyete yo kuri uyu mugabane.

Aba bagore barimo n’umunyarwandakazi Cécile Kayirebwa, bakaba bamaze igihe bakorera kandi batuye mu Bubiligi.

Nyatanyi Marie Pierre, ni Umunyarwandakazi, arubatse, afite abana babiri, yize “Sciences politiques et Droit Internationales”,arangiza masomo ya Kaminuza yanditse igitabo ku ruhare rw’umugore mu iterambere ry’umuryango nyarwanda ashaka kugaragaza ko u Rwanda ruha agaciro umugore.

IGIHE : Wandika iki gitabo washakaga kugaragaza iki?

Nyatanyi : Ndabashimiye kumpa uyu mwanya wo gusobanura uyu mushinga wo kwandika nakozeho.

Nashatse kwerekana uburyo abagore baturuka mu bice bitandukanye by’umugabane wa Afurika bashoboye kugera ku isonga mu kazi kabo ka buri munsi.

IGIHE : Wagendeye kuki uhitamo abo wanditseho?

Nyatanyi : Mu by’ukuri ni benshi ntabwo bose nari kubashyira mu gitabo, byabaye ngombwa ko mpitamo 20 gusa, nibanda ku bo twabonaga koko babaye intangarugero, duhereye ku babaye aba mbere mu gukora imyuga imwe n’imwe.

Navuga nk’umugore wabaye Ministiri wa mbere w’Umunyafurika hano mu Bubiligi witwa Gisèle Mandaila, dufata nk’abagore babashije kumara igihe kirerekire mu kazi bihangiye, nka Monique Foderie, umugore ufite Restaurant imaze imyaka 25 ikora, n’abakora imyuga umuntu atari asanzwe ababonamo, nk’umudamu ukora ibijyanye no kubaga amaso(chirurgienne ophtalmologue) n’abandi.

IGIHE : Mu by’ukuri intego yo kwandika iki gitabo ni iyihe ?

Nyatanyi : Intego cyangwa impamvu yari ukugira ngo abo bagore babere intangarugero abakiri bato, ntabwo twashakaga kugaragaza amashuri n’akazi bafite gusa ahubwo twifuzaga ko badusobanurira uburyo bageze aho bari ubu, uburyo bakiriwe mu Bubiligi nk’abimukira, imbogamizi bagiye bahura na zo n’uko babashije kubyikuramo kugira ngo bagere aho bageze ubu, bityo abakiri bato bajye babareberaho nibahura n’inzitizi, be gucika intege.

IGIHE : Ni iyihe nama wagira umwana w’Umunyarwanda ushaka gutera ikirenge mu cyawe nk’umwanditsi n’umushakashatsi ?

Nyatanyi : Ikintu cya mbere ni ukudacika intege, kumenya amategeko amurengera kuko arahari.

IGIHE :Nyuma y’ubu bushakashatsi watubwira uko urungano rwagiye rwitwara n’inzitizi bahuye na zo mu myaka 30 umaze hano mu Bubiligi?

Nyatanyi : Nibyo koko, ni yo mpamvu twashatse kwerekana abaje kera, kugira ngo habeho kumva ko inzira baciyemo itari yoroshye ariko kandi bagera kuri byinshi bishimishije.

Urugero nabaha ni uko mu myaka nka 20 ishize kubona akazi uri umugore w’umunyafurika byari bigoye cyane;byonyine kubona utuzi bita Job-étudiant, mu buganga cyangwa ahandi mu tuzi twiyubashye ho rwose byari bigoranye.
Uretse no mu kazi, natanga urugero jye nkiga wasangaga hari nk’amashami (Sections) abirabura batigagamo kubera ko nta kazi bari kubonamo cyangwa ntibabemerere no kuyajyamo gusa.

Ariko ubu ibintu byarahindutse, uriga icyo ushaka kandi ukanakora. Ubu haba hano mu Bubiligi haba mu Rwanda abagore bahawe agaciriro kabo.

Igitsinagore kirahamagarwa hose ku Isi na Loni mu byerekeranye n’imirimo yo kugarura amahoro ku isi kuko bafite ikindi kintu bongeramo bafatanyije n’abagabo.

Iki gitabo rero turifuza ko kitubera iteme ryo guhuza imishinga y’abato n’abakuru, abakiri bato bakumva ko bishoboka nubwo bahura n’inzitizi, uwifuje kuba umuganga, umunyamategeko, Ingénière n’ibindi avuge ati aba kera bari bafite imbogamizi nyinshi babigezeho nanjye nzabigeraho.

IGIHE : Ni iyihe nama wagira undi muntu wese wifuza kwandika ?Usanga abantu kenshi babikunze ariko bakabura imbarutso wowe wabigenje mute ?

Nyatanyi :Kuri icyo kibazo cyo kwandika, rwose ndashishikariza buri wese waba wifuza kwandika, kuko birafasha gushyira ibitekerezo mu nyandiko bikava mu magambo bikaba byafasha n’abandi babikeneye, rero imbogamizi navuga ntabwo zituruka cyane mu byo wandika cyangwa ushaka kuvuga , bigoranira mu kubishyira mu bikorwa, kumenya inzira bikorerwamo, gushaka abazagufasha nk’inzu zishinzwe gushyira ibitabo hanze, kubona abaterankunga igihe biri ngombwa n’ibindi.

Ibi rero byose ni ugushirika ubute ntucike intege, kuko bisaba kubasobanurira bakumva.

Ikindi nakongeraho ni uko nafatanyije n’abandi bagore babiri mu kwandika iki gitabo nkaba mbashimira cyane. Abo ni Véronique Vercheval ufotora by’umwuga kandi ukora ibijyanye n’uburenganzira bw’umugore na Jacinthe Mazzocchetti, umuhanga mu by’inkomoko n’imiterere ya muntu akaba n’umwarimu muri Kaminuza ya UCL (Université Catholique de Louvain) watuzaniye ubunararibonye ku bushakashatsi yakoze ku bimukira baturuka mu bihugu bya Afurika.

IGIHE : Ese uyu mushinga uhagarariye aha cyangwa urateganya gukomeza kwandika ?

Nyatanyi : Umushinga ndawufite kandi undi ku mutima, urebye amateka igihugu cyacu cy’u Rwanda cyaciyemo ukareba uko umugore yahawe umwanya we muri byose, ndifuza kuzakora ubushakashatsi kuri bamwe mu bagore b’abanyarwanda bagize akamaro mu iterambere no mu mizamukire myiza y’aho u Rwanda rugeze ubu.

Ariko kandi sinarangiza iki kiganiro ntashimiye cyane aba bagore 20 batugiriye icyizere, bakaduha umwanya wabo. Bakaba barumvise rugikubita akamaro k’uyu mushinga wo kwandika kuko na bo ni ababyeyi bifuza gusigira umurage mwiza abo babyaye n’abazabakomokaho.

IGIHE :Tugushimiye umwanya waduhaye tukagirana iki kiganiro, ugire ibihe byiza.

Nyatanyi :Urakoze Karirima kuba wampaye umwanya wo gusobanura iki gitabo no gushishikariza abandi kugisoma, uwaba acyifuza ubwo yarebera mu iguriro ry’ibitabo rya Fnac cyangwa kuri site y’inzu y’icapiro bita KARTHALA.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza